55 Eme momori jaŋe sacmaŋko raʒirâ ʒoc ruqerâ ruahuc ŋehapie Petoro e iŋuc jaha raʒirâ ŋondeŋ‐jeŋicko ŋewec.
56 Ŋehame kiŋaŋ naru moczi fisirâ hone dedeŋnehuc muwec, “Ŋic keci ehec juekac wâc.”
57 Eme Petorozi mic bahuc muwec, “Ŋokac, no e mi honeekopac.”
58 Iŋuc murâ ŋeme mi ʒorahame ŋic moczi honerâ muwec, “Go hâcne jaŋere guruonec.” Eme Petorozi muwec, “Ŋic go, no aricne.”
59 Eme ʒâhec ŋic moczi fisirâ musanaŋkehuc muwec: “Â ŋic kecʒi jâmbomac ehec juekac, e Galilaia ŋic jaha.”
60 Mume Petorozi muwec, “Ŋic go dâŋ mutec kâuc bakopac.” Muhame izia qâqâczi dâŋewec.
61 Eme Wofuŋzi forisierâ Petororao ʒâŋe fime Petoro e Wofuŋzi dâŋ ʒiŋuc âzâcnewec i manasuwec: “Qâqâczi mi dâŋehame go jahec â moc mic bacnucmu.”
62 Dâŋ i manasurâ bune herickeme ra kio sâqorewec.
63 Jesu soŋaŋkehuc domambiŋ ŋic i jaŋe mu ʒerec ecnehuc
64 ʒâŋe maine bâsoŋkerâ qahuc mumbiŋ, “Go porofete jukomeczi ŋic gukac ere ʒâŋe muc.”
65 Erâ âke sisic wiac gâcne mâmâc ecnembiŋ.
66 Ehapie hae fureme micne guru, taha bapa micne â miti qaqazu hâcne, jaŋe sasawa tumaŋne‐fârerâ mupie Jesu guru‐jeŋicko bafepie dâŋ ʒiŋuc âzâcnembiŋ:
67 “Go Kristo jukomecko mufua‐nârec.” Mupie ʒiŋuc jazawec: “No ŋazape mi mananiŋmu,
68 me indiŋ‐ŋopape ŋifecne sâcne wâc mi nazaniŋmu.
69 Ʒi ine Ŋic Fâri Wâtuŋne e Anutu tâpiri rune fârenao ŋeocmurâ dameŋne maickekac.”
