31 “Simoŋ, Simoŋ, padi saja bapie wosâeekac iŋuc jaha Sataŋzi ŋoŋe ere meo fepie saja bacŋopaocte mujec.
32 Eme noni ine mamanasiŋge omaezacte gore erâ numupac. Irec go miti hatao mocwâc risierâ qomâfâcge keteŋ‐jopazemec.”
33 Mume Petorozi ʒiŋuc âzâcnewec: “Wofuŋ, go kâpâcwâruo me hâmocko fâtec fâpemu.”
34 Eme Jesuzi muwec, “Petoro, no gazape manac, qâqâczi miŋecgac ŋafeo mi dâŋehame goki jahec â moc micnucmu.”
35 Iŋuc murâ muwec, “Noni moneŋ tâmiric â he tâmiric â kikehuhu tâmiric sorec‐ŋopape ra basac qasac moc embiŋ me?” Eme jaŋe mumbiŋ, “Iŋuc aricne jâmbâŋ.”
36 Mupie ʒiŋuc ʒuhuckewec: “Â dameŋ ʒiŋuczia ine moc e moneŋ focnekacko ro bajuzejec, â moc e hemotec focnekacko rupe juzejec, â moc e ʒika basahuc ŋaqi qikiŋneme moc kitâcnecnezejec.
37 No mupe mananiŋ, findaŋdâŋ moc ʒiŋuc qâreŋkekicne: ‘E ʒika qaqa jaŋere guruo râembiŋ’, dâŋ i norao fârinehuc eocmu. Erâ nore dâŋ mukicne i mâmâc sasawa sanaŋke‐fâreocte dameŋ maickekac hâcne.”
38 Mume motec jaŋe ʒiŋuc âzâcnembiŋ: “Wofuŋ honec, ʒi ʒika jajahec fokopirec.” Eme muwec: “Sâcne.”
39 Eme ŋeku Jesu e ŋafe sâc ejujec iŋuc erâ hae beherâ Oliwa tikio feme motec jaŋe bâjâpembiŋ.
40 Eme jujujecko fisirâ motecfâcne ʒiŋuc jazawec: “Ŋoŋe eesâicko dockenʒipiŋte numuniŋ.”
41 Iŋuc murâ qânâ wickepene raekac irec sâc rarâ dieŋzi herâ ʒiŋuc muhuc numuwec:
42 “Mamac, go manatec sâckeme mutec ʒâic guru ʒizi nowaruoc. Erâ nore dâŋ mâcne, gore dâŋ sanaŋkezejec.”
43 Iŋuc muhame sambâŋkonec aŋelo moczi waharâ basanaŋkewec.
44 Eme maŋzi ʒâic hâhâwicne ecneha fotariehuc numuwec. Ehame fofoŋac‐ticne soc ʒâmbâŋ iŋucne tâcnehuc mâreŋko wahawec.
45 Numuku faharerâ motecfâcne jaŋerao rarâ honec‐jopawec: Jaŋe busâqoczi bâdoc‐jopame betaŋkerâ guŋ fombiŋ.
46 Fohapie jazarâ muwec: “Ŋoŋe wemocte guŋ foŋgopieŋ? Eesâicko dockenʒipiŋte faharerâ numuniŋ me!”
47 Iŋuc muhuc domahame mi râsi guru ututuŋ fisinʒepieŋ i! Eme motec jaŋere âgo moc ʒâŋene Juda, eki micne bajarehuc Jesurao rarâ muduckewec.
48 Muduckeme Jesuzi ʒiŋuc âzâcnewec: “Juda, go wemocte Ŋic Fâri Wâtuŋne e muduckehuc doc bakomec?”
49 Eme Jesure kikefuŋfâc jaŋe wiac fuazo eme honerâ mumbiŋ, “Wofuŋ, ʒikazi jopanaŋ me?”
50 Iŋuc murâ jaŋeraonec moczi taha bapa sâkore kiŋaŋ motec ʒikazi qaocte hazecne fâreopec i qatarawec.
51 Eme Jesuzi i honerâ muwec: “Ŋoŋe beheniŋ.” Iŋuc muhuc ŋic hazec‐ticne bâuahuc bâsomiewec.
52 Erâ taha bapa micne â ufuŋte polisman micne â soŋaŋ e roniŋte fisimbiŋ jaŋe ʒiŋuc jazawec: “Ŋoŋe nore manapie ʒika qaqa eme ʒika qaruc‐ŋeŋichec fisirâ rocnuŋgopieŋ me?
53 No ʒoaŋne ʒoaŋne taha ufuŋko ŋoŋehec juekopac, ehame ŋoŋe ira mi rocnumbieŋ. Ʒi ine ŋoŋere dameŋ maickekac â dapâcte tâpiri fua tâcnekac.”
54 Eme jaŋe Jesu rorâ bararâ taha bapa sâkore ficko bafembiŋ. Ehame Petoro e fisi fâresuc ehuc ʒâhec rawec.
55 Eme momori jaŋe sacmaŋko raʒirâ ʒoc ruqerâ ruahuc ŋehapie Petoro e iŋuc jaha raʒirâ ŋondeŋ‐jeŋicko ŋewec.
56 Ŋehame kiŋaŋ naru moczi fisirâ hone dedeŋnehuc muwec, “Ŋic keci ehec juekac wâc.”
57 Eme Petorozi mic bahuc muwec, “Ŋokac, no e mi honeekopac.”
58 Iŋuc murâ ŋeme mi ʒorahame ŋic moczi honerâ muwec, “Go hâcne jaŋere guruonec.” Eme Petorozi muwec, “Ŋic go, no aricne.”
59 Eme ʒâhec ŋic moczi fisirâ musanaŋkehuc muwec: “Â ŋic kecʒi jâmbomac ehec juekac, e Galilaia ŋic jaha.”
60 Mume Petorozi muwec, “Ŋic go dâŋ mutec kâuc bakopac.” Muhame izia qâqâczi dâŋewec.
61 Eme Wofuŋzi forisierâ Petororao ʒâŋe fime Petoro e Wofuŋzi dâŋ ʒiŋuc âzâcnewec i manasuwec: “Qâqâczi mi dâŋehame go jahec â moc mic bacnucmu.”
62 Dâŋ i manasurâ bune herickeme ra kio sâqorewec.
