9 Erâ ʒika biŋe â râsi fânâŋ manarâ jajaŋ bibisac mi enʒepieŋ. Wiac iŋucne hâcne qanaŋ fuaocte mukicne, erâ fuame sifu dameŋ biac mi taraocmu.”
10 Iŋuc murâ muwec: “Mâreŋne mâreŋne ŋic guru sâko guru pitic jaŋe rârâsi efârerâ ra qa ware qa ehuc qaqac ranʒoŋgopieŋ.
11 Erâ homeŋ kâcɋene sâko samarierâ bazokac, erâ roroc â huc mimicne ra fua ware fua ezokac. Erâ sambâŋko sowi â wiac hâhâwicne fuazokac.
12 “Wiac i mi fuahame jaŋe qanaŋ rocŋopaniŋmu â ŋopa jâpec eŋareniŋmu. Erâ wâc dâŋficko â kâpâcwâru ficko râec‐ŋopaniŋmu â ŋicwofuŋ â kia jaŋerao bacŋopa raniŋmu, i ŋoŋe nore ʒâŋe bajuŋgopieŋte iŋuc eŋareniŋmu.
13 Eme ira fuŋne mumutaniŋ gie maic‐ŋopaocmu.
14 Eme jaŋere maio domahuc dâŋ weniŋuc mupene sâckeocmu muhuc mana wosâc mi enʒepieŋ.
15 No nahac mic â mamana baafecke‐ŋarepe dâŋ mupie kisâfâc‐ŋeŋic jaŋe dâŋŋeŋic bawaharâ qatara‐ŋareniŋte eipieniŋmu.
16 Erâ omanezi sawa wiac mi eŋareniŋmu, neŋgoc mamac, hahac ɋa, seŋ sâme, âgo bago jaŋe wâc doc bacŋopaniŋmu. Eme ŋoŋeraonec gâcnezi ʒika kirâ hâmoniŋmu.
17 Eme ŋic mâmâc sasawa jaŋe ʒâŋe biŋe‐nanere erâ ŋoŋere manapie aaricnehec eocmu.
18 Wiac iŋucne eŋarehapie noni ŋezic‐ŋopape qizec susuc‐ŋeŋic moc mi sifuckeocmu.
19 Dodocke tâmiric juraku juju‐ŋeŋic bâfuaniŋmu.
20 “Momori jaŋe fisirâ Jerusalem hae somâckepie honerâ munʒepieŋ, ‘Miti hae qizec‐nâŋec tuhu eocte dameŋne maickekac.’
21 Eme Judaia mâreŋko juniŋmuzi tiki mâreŋko wiserâ ranʒepieŋ, â miti hae qizecko juniŋmuzi iŋuc jaha biac waha wise ranʒepieŋ.
22 Dameŋ ira hâcne okacne babazu fuaocmu, ehuc mitio dâŋ mukicne i fideteŋ efâreocmu.
23 Jei, ŋokac kiwecheczi â susuonecheczi dameŋ ira weniŋuc enʒoŋgopieŋ? Ŋicguru ʒi jaŋerao kiŋ babatara fuame bâŋeŋkerâ weaŋsicne nâniŋmu.
24 Eme râsi jaŋe ŋic gâcne ʒika mimicnezi jopa miziehuc gâcne mâreŋ sâc amec‐jopa rapie kiŋaŋ qaqafâc‐jeŋic erâ juniŋmu. Erâ qâpuc jaŋe Jerusalem haeo ima gie bahuc juhapie mâreŋ sâc ŋic qâpuc dameŋ‐jeŋic hesackeocmu.
25 “Eme ʒâhecko ʒoaŋ mosa bâpiŋko wiac ʒâŋe furu fuazokac, â mâreŋko hâwec sirizi â temboŋzi fânâŋ sâko eme hazec guru‐ŋeŋic fuazokac.
26 Erâ wâc sambâŋ qiriŋ qame tâpirine ŋeŋgoroŋkezokac. Eme ŋic jaŋe wiac fua taraocte woŋec juhuc hobu‐jeŋic taŋtaŋ âeckehame nokafe tataeŋ erâ domanʒoŋgopieŋ.
27 Ehame Ŋic Fâri Wâtuŋnezi karorac faio domahuc ɋuŋɋasaŋ bâric bâric‐ticnehec fisime hone ʒâirenʒoŋgopieŋ.
28 Wiac iŋucne hâcne fuame honerâ qâhâŋnerâ fie ruruckehuc ʒiŋuc munʒepieŋ: ‘Roroc‐nâpo dameŋ maickekac hâcne.’”
29 Iŋuc murâ dâŋ suŋsuŋne moc ʒiŋuc ʒuhuckewec: “Ŋoŋe jâmiŋ â jâc gâcne gâcne honehuc fuŋne mananʒepieŋ.
30 Jaŋe gitec herâ fiepie honerâ mueŋgopieŋ: ‘Ʒoaŋ dameŋ maickezo ekac.’
31 Eme wiac mukopac i fuame honerâ munʒepieŋ: ‘Anuture uucmaŋ fua tâcnezo ekac.’
32 No jâmbomac ŋazape: Ŋicguru ʒi jaŋe mi sirowehapie wiac mukicne i deŋke‐fâreocmu.
