5 Ndipo iwo akhambabvundzana okha-okha acimbati:''Tikalewa kuti nda Mulungu, ndipo iye an'tibvundza kuti: 'Thangwe ranyi mudasaya kubvuma?'
6 Tsono tikalewa kuti nda wanthu, ndipo mbumba yentseneyi in'tiboma na minyala. Thangwe iwo akhadandziwisisa kale kuti Juwau akhali mpolofeta.”
7 Ndipo iwo adadzatawira kuti: “Ife tin'dziwa lini.”
8 Na tenepo Jezu adawatawirambo kuti: “Napo ndinembo ndin'kuwuzani lini kuti ndiri kucita bzimwebzi na mphambvu zayani.”
9 Pomwe adamala kulewa bzimwebzo, Jezu adayenda kukawatsikira matere aciti: “Munthu m'bodzi adalima munda wace wa uva. Ndipo iye adakumbiza anyakulima winangombo. Na tenepo adayenda kukakhala kudziko linango la kutali nthawe ikulu.
10 Pomwe nthawe yakubvuna idakwana, iye adatumiza nyabasa wace m'bodzi kuna anyakulima wale kuti akamupasembo bzisapo bza m'mundamo. Tsono anyakulimawo ndipo adam'menya acimubweza cimanja-manja.
11 Ndipo iye adatumiza pomwe nyabasa winango basi. Tsono iwo adamumenya acimunyoza. Na tenepo adamubweza pomwe cimanja-manja.
12 Ndipo iye adatumiza pomwe wacitatu. Tsono iwo adam'kweteka acimukwekwetera kunja.
13 Ndipo mwenekaciro mundayo adalewa kuti: “Kodi ine-pano ndin'cita tani? Ndin'tumiza mwanangu wa pantimayu, pinango iwo an'kamugopa.”
14 Pomwe iwo adawona mwanaceyo adalewa kuti: “Uyu ndiye mwenekaciro utaka. Mbatimupheni kuti mundayu ukhaliretu wathu!”
15 Ndipo iwo adamukwekwetera kunja kwa mundayo acikamupha. “Kodi mwenekaciro mundayo an'dzawacitanyi?
16 Ndipo iye an'dzabwera aciwaphambo anyakulima wentsenewo. Ndipo an'dzawatengera mundayo acipasa winango.” Pomwe adabva bzimwebzo iwo adalewa kuti: “Bzingacitike lini!”
17 Tsono Jezu adawanyang'anisa aciwabvundza kuti: Bzakunembedwa bzimbalewa kuti: “Mwala omwe amisiri wakumanga nyumba adaulamba, omweyo ndiwo udadzakhala wakufunidwa kwene-kwene paphampha la nyumba.” Kodi bzimwebzi bzimbathandauza ciani?
18 Munthu omwe an'gwera pamwala omweyo iye an'bzichola. Ndipo ule omwe unimugwerayo iye an'nyodoka ninga mufu.
19 Panthawe imweyo apfundzisi wa ntemo na akulu wa azibaba wa ntsembe akhafuna kumumanga. Nakuti adadziwa kuti materere adatsikayo, Jezu akhalewa iwo. Tsono iwo akhana mantha na wanthu.
20 Ndipo iwo akhamubenda. Na tenepo adatuma wanthu anyakutapa mkanwa omwe akhabzilatiza ninga wanthu wabwino. Na tenepo iwo akhafuna kumuphata na mafala yomwe angadalewayo. Ndipo acimupereka kuna anyakutonga na kuna acikunda wa mtongi.
21 Ndipo iwo adamubvundza kuti: “Misiri tin'dziwa kuti umbalewa na kupfundzisa bwino. Ndipo ulibe tsankhulo na wanthu. Tsono umbalewa na kupfundzisa njira ya Mulungu mwa cadidi. .
22 Kodi n'bzabwino kupima mtsonko kuna Seza aya, n'bzabwinoa lini?
23 Tsono Jezu akhadziwa kale ndzeru zawo ndipo adawatawira kuti:
24 “Ndilatizeni kobiri ibodzi kuno. Kodi nkhopei na dzinali n'bzayani?” Na tenepo iwo adatawira kuti: “N'bza Seza.”
25 Ndipo iye adawawuza kuti: “Pasani Seza bzomwe n'bza Seza. Ndipo pasanimbo Mulungu bzomwe n'bza Mulungu.
26 Tsono iwo alibe kukwanisa kumutapa mkanwa na bzomwe iye adatawirabzo. Na tenepo iwo adadabwa na matawiriro yaceyo ndipo adanyamaliratu.
27 Ndipo adabwera asaduseu winango, omwe akhalewa kuti palibe munthu ambalamuka paimpfa.
28 Na tenepo iwo adamubvundza kuti: “Misiri, Mozeji adatinembera mtemo kuti: 'Munthu akafedwa m'bale wace acisiya mkazi alibe wana, ndipo m'bale waceyo mbaapite nthaka kuti abalire wana m'bale wace adafayo.
29 Ndipo pakhana wanthu anomwe umbale bwao: Na tenepo wakuyamba adalowola mkazace, iye acifa. Na tenepo iye alibe kusiya wana.
30 Ndipo waciwiri
31 na wacitatu adapita nthaka ninga bzibodzi-bodzibzo anomwe wentsewo adapitambo nthaka acifa. Ndipo iwo alibe kusiyambo wana.
32 Ndipo mkaziyo adamalizira kufambo.
33 Kodi mkaziyo an'dzakhala wa yani pantsiku yakudzamuka paimpfa? Nakuti wentse anomwe akhali mkazawo.
34 Ndipo Jezu adawatawira aciti: “Wanthu wa pantsi pano ambalowola na kulowozana.
35 Tsono wale omwe ambayesedwa walungama kuti adzawone bzakutsogolo na kumuka paimpfa ndipo iwo an'dzalowola lini ayai kudzalowozana.
36 Na tenepo iwo an'dzafa lini pomwe thangwe an'dzalinganira na anjo. Ndipo iwo ni wana wa Mulungu, nakuti adabadwa kale papsa.
37 Ndipo anyakufa an'dzamuka pomwe paimpfa. Nakuti Mozeji adawonesedwa kale pacitsamba comwe cikhagaka moto pomwe iye adacemera Mbuya kuti Mulungu wa Abramu, Mulungu wa Izaki na Mulungu wa Jakobi.
38 Nakuti Mulungu ngwa anyakufa lini. Tsono ni Mulungu wa wanthu wa moyo. Na tenepo wanthu wantse mbamoyo kuna iye.
39 Ndipo apfundzisi wa mtemo winango adamuwuza kuti: “Misiri watawira bwino.”
40 Na tenepo kucokera pamwepo mpaka kutsogoloko, alibe kudzamubvundza pomwe cinthu.
