34 O Isus phenđa lenđe: “O manuša ko akava sveto lena pe hem dena pe.
35 A okola kolen o Devel smatrini dai dostojna te oven vazdime taro mule hem te živinen ko sveto savo avela, ni ka len pe ni ka den pe.
36 Adalese so našti više ni te meren: ka oven sar o anđelja. On ka oven čhave e Devlesere, adalese so o Devel ka vazdel len taro mule.
37 A da o mule uštena, mothovđa hem o Mojsije ked ko than oto Sveto Lil kote pisini oto grmo o Gospod vaćeri dai 'Devel e Avraamesoro, e Isaakesoro hem e Jakovesoro.'
38 A o Devel nane Devel e mulengoro, nego Devel e dživdengoro. Adalese soi e Devlese on pana dživde.”
39 Nesave učitelja e Mojsijasere zakonestar phende e Isusese: “Učitelju, šukar vaćerđan!”
40 I na tromandile ništa više te pučen le.
41 Tegani o Isus pučlja okolen so ine šunena le: “Sar o učitelja e Mojsijasere zakonestar vaćerena dai o Mesija e carosoro e Davidesoro potomko?
42 A o David korkoro phenela ano Lil oto Psalmija: 'Phenđa o Gospod mle Gospodese e Mesijase: “Beš ko počasno than uzala mande
43 đikote na pašljarava te dušmanjen talo te pre!”'
44 O David e Mesija vičini 'Gospode'. Sar onda o Mesija šaj te ovel lesoro potomko?”