1 Jekh đive kana o Isus sikada e manušen thaj vačarda o Lačho Lafi, avile e šerutne sveštenikura, e učitelja tare Mojsijaso zakono, thaj e phuredera ano Hramo.
2 Pučlje le: “Vačar amenđe kotar tuće pravo kava te čere? Ko dijatu kava pravo?”
3 A o Isus vačarda lenđe: “I me tumen ka pučav. Vačaren manđe:
4 O Dol li vačarda e Jovanese te krstil e manušen, il e manuša vačarde lese gova te čerol?”
5 Thaj von vačarde maškar peste: “Te vačardam kaj si taro Dol, ka vačarol sose ni pačajam le.
6 A te vačardam kaj si tare manuša, savore ka čhuden bara pe amende, golese kaj savore pačaje kaj o Jovane o krstitelji sasa proroko.”
7 Thaj von vačarde e Isusese: “Ni đana ko dija pravo e Jovane te krstil.”
8 A o Isus vačarda lenđe: “Ni me ni ka vačarav tumenđe kotar manđe kava pravo.”
9 Thaj o Isus lija te vačarol kaja paramič: “Jekh manuš sadisada drakha, thaj iznajmisada e manušenđe i phuv te čeren buči gothe, a vov đelo ko foro te bešol pherdo berša.
10 Thaj kana barili i drakh, bičhalda pe sluga ke gola manuša te čiden o kotor (deo) taro bijandipe e drakhako so lese preperol. A e manuša save čerde buči ki drakh marde le, thaj bičhalde le čuče vastencar.
11 Thaj bičhalda avere sluga, a i gole marde thaj lađarde thaj bičhalde le čuče vastencar.
12 Thaj bičhalda tritone; a le ratvarde le, thaj tradije le.
13 Tegani o manuš kasi sasa i drakh vačarda: “So te čerav? Te bičhalav me mangle čhave, šaj le ka poštujin.”
14 A e manuša save čerde buči ki drakh kana dikhlje lese čhave, dije gođi ane peste vačarindoj: 'Kava si leso čhavo. Aven te mudara le te ačhol gova amenđe so si leso!'
15 Thaj ikalde le avral tare drakha thaj mudarde le. So den gođi so ka čerol o manuš so si lesi drak kale manušenđe kana ka šunol so čerde?
16 Ka avol thaj sa ka mudarol e bučarnen, thaj i drakh ka iznajmil averenđe.” A kala save šunde e Isuse vačarde: “Ma te dol o Dol gova te avol!”
17 A o Isus dikhlja ane lende thaj vačarda: “A so ačhol ano Sveto Lil: 'O bar so čhudije e manuša save vazden e duvara čerdilo em glavno bar taro ugao?'
18 Savo perol pe gova bar, o bar ka phađol le ke kotora, a ako perol gova bar pe nekaste ka mudarol le.”
19 Thaj dikhlje e šerutne e sveštenikurenđe thaj e učitelja tare Mojsijaso zakono ane gova časo te vazden po va pe leste, al darajle tare but manuša, golese kaj haljarde kaj kaja paramič vačardi lenđe.
20 E učitelja tare Mojsijaso zakono thaj e šerutne sveštenikura dikhlje po Isus thaj bičhalde ke leste špijunuren save ka šunen e Isuse, save čerde pe čačutne, te bi tužina e Isuse kaj vačarda khanči bišukar te bi dena le ko rimsko upravitelji.
21 Thaj pučlje e Isuse: “Učitelju! Đana kaj šukar vačare thaj sikave, thaj ni dičhe ko si ko, nego čače sikave o drom e Devleso.
22 Vačar amenđe trubul li te da o porezi e carose il na?”
23 A o Isus dikhlja lengo lukavstvo thaj vačarda lenđe:
24 “Sikaven manđe jekh rupuni para savesa počinen o porezi. Kaso muj si kate ke pare thaj kaso alav?” A von savore vačarde: “E caroso.”
25 A vov vačarda lenđe: “Den so si e caroso e carose, a so si e Devleso den e Devlese.”
26 Thaj naštine aračhen khanči bilačhe ane lese lafura angle manuša, thaj divisajle pašo leso vačaripe, thaj khanči ni vačarde.
27 Gija avile nesave sadukejura save vačarena kaj khoni ni ka uštol tare mule, thaj pučhlje e Isuse:
28 “Učitelju! O Mojsije amenđe dija zakono kana merol nekaso phral, thaj ačhavol romnja a ni sasa len čhave. Gova manuš trubul te lol pe phralese romnja te šaj bijanol čhave savese ka preperol sa o barvalipe e muleso thaj te phiravol leso alav.
29 Sesa efta phrala, a angluno lija romnja thaj mulo bize čhave,
30 thaj o dujto lija la, thaj vov mulo,
31 thaj o trito lijala, i gija so efta. Thaj ni ačhade čhaven pal peste, thaj savore mule.
32 Thaj empalal muli i romni.
33 Kana ka ušten e mule, kasi romni ka avol golese kaj sasa so eftanenđi romni?
34 “Thaj o Isus vačarda lenđe: “Manuša kale svetose len pe thaj den pe.
35 A okolen saven o Dol dičhol sar dostojna te ušten tare mule, thaj ka aven đuvde an kova sveto savo avol, ni ka len pe thaj ni ka den pe.
36 Golese kaj nakašti ni meren, golese kaj ka aven sar melekura. Von si e Devlese čhave, golese so o Dol ka vazdol len tare mule.
37 A kaj e mule ka ušten, thaj i o Mojsije vačarda andaro Sveto Lil kaj pisil taro grmo kaj e Rajo dol vika sar Devle e Avraameso thaj Devle e Isakoso thaj Devle e Jakoveso.
38 A o Dol naj Dol e mulengo nego e đuvdengo, golese so si lese savore đuvde.”
39 A nesave učitelja tare Mojsijaso zakono vačarde e Isusese: “Učitelju! Šukar vačardan.”
40 Thaj khanči ni tromaje te pučenle.
41 Thaj o Isus pučlja len: “Sar gova vačaren kaj si o Hristos čhavo e caroso e Davideso?
42 Kana korkoro o David vačarol ane po psalmo: 'Vačarda o Rajo e Rajose mingrese: 'Beš ko počasno than paše mande
43 đi kaj ni pašljarav e dušmanen ćiren.'”
44 O David akharda le Rajo, pa sar šajine te avol leso čhavo?”