48 A sɔnda ka a janto n dɔ, a la jɔnmuso fanmajiini. Wo bolo ma, ka damira bi haan ka wa, mɔɔ ri a fɔ n ma ko barakaden,
49 baa Alla Sebɛɛtii ra ko ba kɛ n yɛ. A tɔɔ sɛniman dɛ!
50 Alla ri kininkinin mɔɔilu ma mɛnilu ka a bonya, a ni ie denilu ni ie mamarenilu.
51 A ra ko ba siyaman kɛ a la fanka rɔ. A ra doilu gbɛn a rɔ, mɛnilu ye jɛrɛdaba ri.
52 A ra mansaya bɔ mansailu bolo, kɔni a ka mɔɔ fanmajiininilu kɔrɔta.
53 A ra kɔnkɔtoilu sɔ damunun ɲuma rɔ foo ka iwasa, kɔni a ka nanfulutiilu gbɛn ka ie lawa bolokolonya rɔ.
54 A ma ɲina a la kininkinin mɔɔilu kɔ. Wo rɔ, a ra a la jɔnilu dɛmɛn, Isirayɛli mɔɔilu kɔnin.
55 A tun ka wo lahidi ta an benba Iburahima ni a bɔnsɔn yɛ foo ka wa kadawu.»
56 Nba, Mariyamu mɛnda Elisabɛti tɔrɔfɛ ye. A ka karo sawa ɲɔɔn kɛ, ka ban ka wa a wara.
57 Nba, Elisabɛti moyi lon sera. A moyira dencɛ la.
58 A siiɲɔɔnilu ni a badenmailu ka a mɛn ko Maari Alla ra kininkinin a ma ka ko ba kɛ a yɛ. Alu bɛɛ sewara.
59 A sɔrɔn tele seyin, alu bɛɛ nara ka den kojiiya kɛ. Alu tɛrɛ ye a fɛ ka a tɔɔ la a fa Sakariya la.
60 Kɔni a na ka ie jabi: «Wo tɛ bɛn. A tɔɔ le ko Yaya.»
61 Alu ka a sɔsɔ ko: «Ai badenmailu rɔ mɔɔ si tɔɔ tɛ Yaya.»
62 Alu ka kuma Sakariya yɛ ie bolo la, ka a maɲininka den tɔɔ ma.
63 Sakariya ka ie jabi a la kuma la a bolo la ko alu ye walan do don a bolo. Alu ka do don a bolo. A ka a ta ka sɛbɛli kɛ a kan ko: «Den tɔɔ le Yaya.» Alu bɛɛ ka wo yen ka kabannakoya.
64 I kɔrɔ ye, Sakariya da lakara. A sera kumala ikɔ tuun. A ka Alla tando bakɛ.
65 Wo ka ye mɔɔilu bɛɛ masilan. Mɔɔilu bɛɛ tɛrɛ ye a barola ko ɲinilu kan Jude koyinkɛ yɔrɔ wo fan bɛɛ rɔ.
66 Mɛnilu ka kibaro wo lamɛn, woilu tɛrɛ ye i mirila ko: «Den wo ri kɛ mɔɔ su ɲuman di?» Baa, alu ka Alla la baraka yen den kan.
67 Alla la Nin Sɛniman jiira Sakariya rɔ, ka kelaya ko:
68 «Tandoli ye Isirayɛlikailu Maari Alla yɛ, baa a ra na ka a la mɔɔilu hɔrɔya.
69 A ra Kisiba di an ma ka bɔ a la jɔn Mansa Dawuda bɔnsɔn dɔ.
70 A ra wo kɛ iko a la nabiɲuma sɛnimanilu ka a fɔ ɲa mɛn ma kɛbi waati jan.
71 Kisiba wo ri an kisi an juuilu ma, ka an bɔ an kɔniyabailu bɛɛ bolo.
72 A ra hina an failu la, baa a ra a janto a la teriya sɛniman dɔ,
73 a ka mɛn sidi an benba Iburahima yɛ kɔnin.
74 A ko, ko a ri an kisi an juuilu fanka ma. Kosa an kana silan mɔɔilu kɔrɔ, fo ka Alla bato
75 sɛniya rɔ, a ni telenbaya rɔ. An di baara kɛ a ɲana wo ɲa ma, haan ka an si tele bɛɛ ban.»
76 «N den, mɔɔilu ri i kili ko: ‹Alla Kɔrɔtaninba la nabiɲuma.› Ka a masɔrɔn i ri wa Maari ɲɛ, ka a la sila rabɛn a yɛ.
77 A ri kisi ko lɔnniya di a la mɔɔilu ma, tuma mɛn na alu julumun ye a makotola,
