Luka 1:38-80 in Gourmanchéma

³⁸ Maliyama den yedi: “N tie o Diedo yonbo, lan tua npo nani ŋan yedi maama.” Maleki den ñani o kani.

³⁹ Laa yogunu Maliyama den fii ki jaligi ki gedi ya dogu n ye a juana po, Jude diema nni.

⁴⁰ O den kua Sakali deni ki fuondi Elisabeta.

⁴¹ Elisabeta n den gbadi Maliyama fuondi ya yogunu, o biga den jeli o tugu nni, U Tienu Fuoma Yua den gbieni Elisabeta

⁴² ke kpaani: “A baa li seli ki cie bi puoba kuli a tugu nni biga mo baa li seli.

⁴³ Be n teni ke n baa ke fini n Diedo naa cua n kani?

⁴⁴ Diidi, min gbadi a fuondi ya yogunu liga, ki biga ban jeli n tugu nni leni li pamancianli.

⁴⁵ Li pamanli ye leni a fini yua n daani ke wani o diedo n soani ke bi yedi a ya bonla baa tieni.”

⁴⁶ Maliyama den yedi: “N kpiagi o Diedo,

⁴⁷ n pali mani ŋali boncianla kelima wani U Tienu n candaano po,

⁴⁸ Kelima o laa npo, mini o yonbo yua n tie taliga. Dinla liiga nifiima n tu nifiima kuli baa yedi li pamanli ye leni nni,

⁴⁹ Kelima wani U paaciamu kuli daano tieni npo ya bonla n pia pakili o yeli gagidi ki ŋani.

⁵⁰ O baa gba mi niŋima yaaba n fangi o nifiima n tu nifiima kuli po.

⁵¹ O doagidi o nu paalu, ki yadi ti yantia-japaadi danba.

⁵² O jiini i paaciami danba bi balikalikaani po ki fiini taliginba.

⁵³ O guoni a konkonba li bonŋanla, ki cabi a piada u nukuomu.

⁵⁴ O todi o naacenba Isalele yaaba. Waa sundi ki doagidi o niŋigbadima,

⁵⁵ nani wan den yedi ti yaajanba maama, Abalaŋama leni o puoliŋuani po ya yogunu kuli.

⁵⁶ Maliyama den kali Elisabeta kani ke li bua ki pundi ŋmaalita, ki goa ki kuni o denpo.

⁵⁷ Elisabeta mayogunu den pundi ke o mali bonjaga.

⁵⁸ O yegininlieba leni o kpiiba den gbadi ke o diedo gbadi opo mi niŋicianma, ki taani ki mangi bi pala leni o.

⁵⁹ Li daniili daali bi den cua ki baa kuani ki canpandiga ku koanciagu. Bi den bua ki yini o o baa yeli Sakali.

⁶⁰ Ama o naa den yedi: “Yeni ka, o baa yi Jan.”

⁶¹ Bi den yedi o: “A kpiiba siiga ki pia yua n yi laa yeli.”

⁶² Bi den maadi o baa mi muulima, ki bua ki bandi wan bua ki biga n ya yi maama.

⁶³ Sakali den mia wan baa diani naani, ki diani lipo: “o yeli yi jan.” Li den paki bikuli.

⁶⁴ Lanyogunu lanyogunu Sakali lanbu den tabidi, ke o fidi ki yaadi ki pagi U Tienu.

⁶⁵ Ti jawaandi den cuo bi yieninlieba kuli. Yaaba n den ye Jude diema nni kuli den maadi laa bonla kuli bi siiga.

⁶⁶ Yaaba n den gbadi likuli den kubi la bi pala ki tua: “Ki naa biga baa tua be.” Moamoani, o Diedo nu den kubi o.

⁶⁷ Ki baa Sakali den gbie leni U Tienu Fuoma Yua ki pua sawali ki yedi:

⁶⁸ “O Diedo Isalele Tienu n baa ti pagidi, kelima o laa o niba po ki da ki faabi ba.

⁶⁹ Ki fiini tipo o naacemo Dafidi diegu nni ya candaano n pa.

⁷⁰ O tieni wan den teni ke o sawalipua-gagidikaaba maadi yaala ŋali yogu.

⁷¹ O den niani ke o baa ga ti ti yibalinba nuu nni.

⁷² Yeni o gbadi ti yaajanba po mi niŋima, ki tiadi o ŋantaado yua n gagidi ki ŋani po,

⁷³ Wan den poli ki kuani yua leni ti yaaja Abalaŋama,

⁷⁴ Ke o baa ga ti ti yibalinba nuu nni ki teni tin ya jaandi o kaa jie,

⁷⁵ Ki ya cuoni o nintuali leni mi gagidiŋanma leni mi teginma ŋali ti miali dana kuli.

⁷⁶ Fini ki canpandiga bi baa yi ŋa Tienu yua n ye ŋali tanpolijoma ya sawalipualo Kelimaa baa ga o Diedo liiga, ki ya ŋanbidi o sani,

⁷⁷ Ki teni o niba n la o tindima, Kelima o tieni bi po sugili bi tuonbiadi po,

⁷⁸ Kelima ti Tienu ya niŋigbadima yaapo o teni ke o yenma ñani tanpoli Ki yendi tipo nani u yienu n pudi maama yeni,

⁷⁹ Ki baa yendi yaaba n ye li biigili nni Leni mi kuuma nni jinjingu nni po, Ki gobidi ti ke tin kua ki ya cuoni Mi yanduama sanu nni.”

⁸⁰ Ki biga yeni den kpedi ki fandi bonŋanla, ki ye li fuali nni ŋali ya daali ke o den ti doagidi o yuli Isalele yaaba po.

³⁸ Maari ṅ maadi: “N tie O Diedo tuonsɔnlo i, ŋan yedi nni yaala ṅ tieni ki dudi nani lan buali maama. Ke maleki ñani ki ŋa o.

³⁹ Li ki waagi ke Maari fii, ki ŋmaa tonma, ki gedi Jude juana dociamu nni.

⁴⁰ Ki kua Sakali deni, ki fuondi Elisabeti.

⁴¹ Wan gbadi Maari fuondi ya yognu, ke o biga yugi ki ciidi o tugu nni, ke Elisabeti gbie leni U Tienu foŋanma.

⁴² Ke o fiini u nialu, ki kpaandi, ki yedi: “A baa mi yedŋanma bi puoba kuli siiga, ke a tugu nni biga mo gbie leni mi yedŋanma.

⁴³ Be n teni ke n dagdi yeni li seli, ke O Diedo naa cua n kani ki bua la nni.

⁴⁴ Kelima diidi min gbadi ke a fuondi nni ya yognu, ke n biga jeli leni li pamanli n tugu nni.

⁴⁵ U yenyienŋamu (mi yedŋama) ye leni fini yua n dugi ke U Tienu ṅ sɔni a po ya tondu ba tieni ki dudi”

⁴⁶ Lan yognu, Ke Maari yedi: “N naano yiini O Diedo kpiagdi.

⁴⁷ Ke n yantiali mangdi li pali, O Diedo U Tienu, n candaano po.

⁴⁸ Kelima o tuo ki tibni ki diidi mini talga, o tuonsɔnlo. Lan ya po, lan fii lan faa, leni yogu kuli, bi ba yini nni o cabŋandaano.

⁴⁹ Kelima U Tienu, U Paaciamu daano tieni n po yaali n yabi.

⁵⁰ O ŋanma ba tandi nifiima ṅ tuu nifiima yaaba n cɔlni o po.

⁵¹ O tandi o nuu leni u paaciamu, ki yadi yaaba ya pala n gbie leni ti japaadi'

⁵² O tudi ki jiini bi paadanba bi badkpaga po. ki nan duoni talganba.

⁵³ O gbieni a konkonba leni a bonŋana, ki nan deli ki yaani bi ŋalmandanba i nuukuomi.

⁵⁴ Nn, O puni Isayeli, mi todma o pakɔnli kuli po, ki waani o ŋanma ya nibuolu n tie o tuonsɔnba po.

⁵⁵ (Nani wan bo niani ti yajanba) Abalahama leni o puolŋuani hali ya yogu n ki pia gbenma.

⁵⁶ Maari kali leni Elisabeti nani ŋmaali taa yeni, ki guani ki kuni o denpo

⁵⁷ Elisabeti madi ji bo nagi n yeni, ke o mali bonjaga.

⁵⁸ O kuantalieba leni o kpiiba den bandi O Diedo ṅ tieni o po ya ŋanbli. ki tieni u badu leni o, ki waani bi pamanli ṅ dagdi maama.

⁵⁹ O madi n ́pendi daaniili daali, ban cua ki ba kuani ki canpandga ku kɔnciagu. Bi den bua ban yini ki biga “Sakali” nani o báa n ́yi maama,

⁶⁰ ama ke o naá jiini ki maadi, “N N, O baa yi Jan i.”

⁶¹ Ama ke bi maadi o, “Nilo ki ye i diegu nni ki gaani lan ya yeli”

⁶² Lan wani, ke bi buali bibáa mi muulma nni, wan bua yini ki biga maama.

⁶³ O báa ń buali, ban teni o ki kpagdiankaaga (walga), wan diani ya lanbona ne, “O yeli tie Jan.” Lan tua bi kuli ya po pagili.

⁶⁴ Lan yognu liga, o ñɔbu ń mubdi, o lanbu ń tabdi. Wan ji ya maadi, ki kpiagdi U Tienu.

⁶⁵ Ti jawaandi den cuo yaaba n den gaani ki lindi ba. Li laabaali den yadi i kaani kuli, Jude juana dogi nni.

⁶⁶ Yaaba n den gbadi li maama den maadi: “Ya biga ne ba tua be?” kelima U Tienu den ye leni o.

⁶⁷ Sakali ki biga báa den gbie leni U Tienu foŋanma, ke o pua sawali, ki yedi:

⁶⁸ Dondi mani O Diedo, Isayeli tienu, kelima, o todi o buolu, ki faabi u.

⁶⁹ Ti ya po, o candaano yua n gbie leni u paaciamu mali o tuonsɔnlo, o badciamo Dafidi puolŋuani siiga.

⁷⁰ Wan den sɔni o sawalpuaba yaaba n gbie leni U Tienu foŋanma, ke bi niani ti yajanba yaala hali mi cilma, tieni ki dudi.

⁷¹ Ke o ba faabi ti ti yibalinba nui nni, leni ti nantieba gbanmanu kani.

⁷² O tie bonli kuli ke li wangi o ŋancianma ti yajanba po, ki gɔa ki tiadi o n̄ɔnianu.

⁷³ Wan den niani ti yaja, Abalahama yaali tieni ki dudi.

⁷⁴ O poli ke o ya fie ti ti yibalinba nui nni, o ba cabi ti ki nunmanga, tin ya jaandi o kaa jie

⁷⁵ Ki tuuni o tuona, ki tie o buolŋamu, ki tie nitegnkaaba o nintuali daali kuli ti yenyienu nni.

⁷⁶ Nn, Ke fini, ki biñidga, bi ba yini a Tanpojoma sawalpualo, kelima, a ba ga sanliiga, ki cuoni U Tienu nintuali, ki bobni o sanu

⁷⁷ Ki teni o buolu ń bandi ke U Tienu puni u mi faabma, ki tieni u tuonbiidi po sugli.

⁷⁸ Kelima ti tienu gbie leni ti niñinpadi leni mi ŋanma. Lanyapo, ku yenpudkaagu ba ña tanpoli, ki yendi ti po.

⁷⁹ Ki yendi yaaba kuli n ye li biigli nni leni mi kuuma junjungu nni, ki pegdi ti taaŋmaadi mi yanduanma (li yanŋaali) sanu po

⁸⁰ Ki biga den yabdi, ke o yantiali mo paagdi ki pugdi. O den ti juodi ki ye ki tinkuonga nni i, hali yeni ya yogu ke o ti legdi ki waani o yuli Isayeli buolu po.