8 Aricne, e jume mi ʒoraha batarac‐jopaocmu. Ŋic Fâri Wâtuŋne e juku mocwâc fisirâ mâreŋko mamanasiŋ bâfuaocmu me?”
9 Ŋic gâcne jaŋacne manapie tiŋne eha âgofâc‐jeŋic mana wahac‐jopambiŋ jaŋere qâqiŋdâŋ moc ʒiŋuc muwec:
10 “Ŋic jajahec taha ufuŋko ferâ numupic. Moc e farisaio â moc e takesi roro.
11 Farisaio e hâŋ domahuc e jahacnere ʒiŋuc manasuhuc numuwec: ‘O Anutu, ŋic gâcne jaŋe ʒika qaeŋgopieŋ, fiuc serereŋ eeŋgopieŋ, sasec mamakâc eeŋgopieŋ. No jaŋe iŋucne mâcne, me takesi roro kecocni e iŋucne wâc mâcne. Eme no irec hâcne daŋge gazakopac.
12 No Sonda sâc irec gie bapa jajahec sowa juekopac â moneŋ mafa hurerâ teŋkonec wâŋte sâc mitire biŋe qaekopac.’
13 Takesi roro eki ine tuturuŋko domahuc fime feocte mimierâ menezi amecne bofackehuc ʒiŋuc numuwec: ‘O Anutu, ŋic sâqocne no mi mac behecnuzemec.’
14 Manaŋgopieŋ, takesi roro e Anutuzi kiŋticne behecne‐fâreme ficticnao risiewec, farisaio e ine focnewec. Moc e jahacne maŋte feme Anutuzi bawahaocmu, â moc e jahacne maŋte wahame Anutuzi bafeocmu.”
15 Eme ŋic ŋokac jaŋe ɋiefâc‐jeŋic Jesurao amec‐jopa rarâ mezi bâuac‐jopaocte mupie motec jaŋe hâhâwic hejarembiŋ.
16 Jesuzi ine hefârec‐jopahuc muwec: “Ŋoŋe behehapie naru motec norao wareniŋ, mi hecke‐jareniŋ. Iŋucne jaŋe hâcne Anuture uucmaŋ bine qajarekicne.
17 No jâmbomac ŋazape: Moc e ɋie jaŋere sâc ehuc Anuture uucmaŋ mi biŋeckeocmu, e maŋnao mi raʒiocmu.”
18 Eme soŋaŋ moczi Jesu wiocnerâ muwec: “Qaqazu biaŋ, no weniŋuc erâ juju sanaŋte biŋe epemu?”
19 Jesuzi muwec, “Biaŋne wemocte munarekomec? Biaŋne rune Anutu mocjaha.
20 Erâ go sâcmutâc dâŋ manaekic, kecʒiŋuc: Ŋowe ŋonâŋ ŋohe bebehec mi ezepirec, go ʒika mi qazemec, go fiuc mi rozemec, go micko âkec mi ezemec, go neŋgoc mamac jahecge sâsec‐jofazeme.”
21 Mume soŋaŋzi ʒiŋuc muwec: “I ɋieo fuŋkerâ reŋke warehuc juekopac.”
22 Mume Jesuzi manarâ ʒiŋuc âzâcnewec: “Mocjaha fokac, i ezemec, go rarâ moneŋ mafage ŋic hapetac qikiŋne‐jarezemec, eme sambâŋko boreŋ ʒeŋaŋ fua‐gareocmu. Erâ ware bâjâpecnuzemec.”
23 Eme ŋic e moneŋ mafa ɋâfoŋne focnewecte dâŋ i manarâ bune boc sâqorewec.
24 Iŋuc eme Jesuzi honerâ muwec, “Moneŋ mafa mâririheczi Anuture uucmaŋko raʒiniŋte ququŋkenehec boc eekac.
25 Kamelizi buŋic hawecnao raraʒi i wiac afecne, â moneŋ mafa mâririheczi Anuture uucmaŋko raraʒi i wiac ŋemâcne.”
26 Mume manahuc domambiŋ ŋic i jaŋe mumbiŋ, “Hâc, eme mozi sambâŋko feocmu?”
27 Eme Jesuzi jazawec, “Wiac ŋiczi eniŋte quŋkeeŋgopieŋ i Anutuzi hatane bâfuaocte mi quŋkeekac.”
28 Eme Petorozi ʒiŋuc âzâcnewec: “Manakic, nâŋe wiac‐nâŋec sasawa râpecke‐fârerâ go bâjâpecgumbeŋ.”
29 Mume Jesuzi ʒiŋuc jazawec: “No jâmbomac ŋazape: Moc e hae‐ticne me ŋokac motecfâcne, me hahac ɋa seŋ baŋecfâcne, me neŋgoc mamac jahecne Anuture uucmaŋte erâ behec‐jopaocmu,
