Luka 18:5-15

⁵taiede sine wabuwabu ta abo ea sagui paana i hemodeaririegu, ata huia gamagamagiri i laulaudaoima abo taugu si siololo.’”

⁶Guiau abo i ene, “Tauhedudurai baabaaeana ena riba au ataiei.

⁷Eaubada ia enanayao abo i saguidi e nige’e, isi asubena to maiona se eogalau ia arinai, huia lohaloha edi riba sora nige i hemaisa?

⁸Ea heribamiu ta, ea ’ne abo i saguiheuheulaidi. Taiede, tau Natuna ena huia laoma eai sunuma abo i lobai tanoubu eai ta?”

⁹Teina parabole ta i ribalau tatao headi aridi eai isi si ene isi isibom se laulaududurai, eo tatao gamagaridi se isugaraedi:

¹⁰“Tatao labui se awasae numa uura alona eai lau‐uura hesabana; esau Parisea tauna, eo esau takisi tautano tauna.

¹¹Parisea tauna wa i toro, i uurapasipasiei, i ene, ‘Eaubada e, ea lautoiem paana eau nige doha tatao gamagaridi, isi tauaigirihai, eo taulaulaugewagewadi, eo tauganaganawari, eau hinage nige doha teina takisi tauna ta.

¹²Sabate esega ma labui ea aiaidabu, egu gogo gamagaridi ea peini peina saudoudoi, lausoisoina esega ea ainauiaei.’

¹³Na, takisi tautano wa i torosuara eaaawana, ia matana nige i tusaedi galewa eai, gabagabana eai ie oi, i ene, ‘Eaubada e, eau tau baabaaeagu, u nuatoatoaegu.’

¹⁴Ea heribamiu ta teina tau ta i dobiuio ena numa eai se taubigai, tau esau wa nige’e, paana tau esau iabom i hedebasaeuioi abo se heguri, eo tau esau iabom i hemerumeruuioi abo se hedebasae.”

¹⁵Bebe abo se ledima ia arinai bena i abiitadi; ena heaheatayao se ita, abo se ribasuuidi.