11 Parisai kêsa jakêkô ma keteŋ mec gêc lêlômgeŋ gebe ‘O Anôtô, aê gabe janam daŋge êndêŋ aôm gebe aê katôm ŋamalac ŋagêdô amboac kêjaŋgowaga to lau sec ma mockaiŋ ma amboac teloŋ tonec atom.
12 Aê gajam dêbu ŋ mo kêtôm dim luagêc kêtôm wokegeŋ, ma ŋoc gêŋ samob, taŋ katap 10-10 sa naŋ, kakôc ŋateŋ su kêtômgeŋ mêŋkêkêŋ kêtu da.’
13 Go teloŋ tau kêsa jakêkô ŋalêtiŋ. Eŋ gebe êôc mataanô sa êpi undambê atom, go kêpô gêduc ma kêsôm gebe ‘O Anôtô, taêm labu aê ŋac secmaŋ.’
14 Aê jasôm êndêŋ amac gebe Ŋac tonaŋ kêsêp nê andu gêja naŋ Anôtô gêlic eŋ amboac ŋac gêdêŋ kêlêlêc Parisai su. Teŋ embe etoc tau sa, go Anôtô êkôniŋ eŋ, ma teŋ embe êkôniŋ tau, go Anôtô etoc eŋ sa.”
15 Lau sejoŋ ŋapalê dedec dêdêŋ Jesu sêja gebe êkêŋ lêma ênsac êsêac. Ma nê ŋacseŋomi sêlic e sec biŋ êsêac.
16 Go Jesu gêmôêc êsêac ma kêsôm gebe “Andec ŋapalê dêndêŋ aê sêmêŋmaŋ. Akô êsêac auc atom, gebe lau tecenaŋ ŋai tec têtu Anôtônê gamêŋ ŋatau.
17 Biŋŋanô, aê jasôm êndêŋ amac gebe Ŋac, taŋ êkôc Anôtônê gamêŋ sa êtôm ŋapalê atom naŋ, oc êsô êna atom.”
18 Ma kasêga teŋ kêtu kênac Jesu gebe “Mêtêmôkê ŋajam, aê jaŋgôm amboac ondoc gebe jawê kaiŋ jaŋgôŋ matoc jali teŋgeŋ.”
19 Tec Jesu kêtu kênac eŋ gebe “Amboac ondoc kôsam aê gebe ŋajam. Ŋac ŋajam teŋ gêmoa atom, Anôtô taugeŋ.
20 Biŋsu tec gôŋô su gebe ‘Ôŋgôm gêŋ mockaiŋo to mockaiŋŋa atom. Ônac ŋamalac êndu atom. Ônam geŋgeŋ atom. Ôŋga biŋ atom. Otoc tamam agêc tênam sa.’”
21 Ma ŋac tau gêjô eŋ awa gebe “Aê kamasaŋ biŋ samob tonaŋ kêtu tôŋ su gêdêŋ aê ŋapalêgeŋ e mêŋgêdêŋ galoc.”
22 Jesu gêŋô ma kêsôm gêdêŋ eŋ gebe “Gêŋ tageŋ tec aôm kôpô lêna. Ôkêŋ nêm waba samob lau sênam ôli ma ônac sam ŋaawa êndêŋ lau ŋalêlôm sawa, go nêm awa oc ênêc undambê, ma ômôêŋ ôndaŋguc aê.”
23 Ŋac tau gêŋô biŋ tonaŋ e nê ŋalêlôm ŋawapac kêsa, gebe eŋ ŋac tolêlôm ŋanô.
24 Jesu mata gê eŋ ma kêsôm gebe “Lau tolêlôm embe sêsô Anôtônê gamêŋ sêna oc sêŋgôm elêmê.
