3 Adalese o Isus phenđa lenđe akaja paramiz:
4 “Te nekas tumendar isi šel bakre i jekh olendar našaldilo, so ka ćerel? Ka ačhaj e enjavardešuenjen ko jekh than hem ka džal te rodel e našalde bakre sa đikote na arakhi le.
5 I ked ka arakhi le, ka radujini pe, ka čhivel le ko piče
6 hem ka legari le čhere. Tegani ka vičini ple amalen hem ple komšijen kora peste hem ka phenel lenđe: 'Radujinen tumen mancar! Arakhljum mle našalde bakre.'