1 Pantsiku inango Jezu akhapemba pambuto ibodzi. Pomwe adamala kupembako, mteweri wace m'bodzi adamuwuza kuti: “Mbuya, tipfundzisenimbo kupemba, ninga momwe Juwau akhapfundzisira ateweri wace.”
2 Ndipo iye adawauza kuti: Mukapemba mbalewani kuti: Baba, dzina lanu likhale na mbiri. Umambo bwanu mbabubwere.
3 Tipaseni cakudya cathu ca ntsiku zentse.
4 Mutirekere bzakuipa bzathu, ninga ifembo tinilekera wale omwe ambatiphonyera Ndipo lekani kutilekerera kuti tipumpsidwe.
5 Ndipo Jezu adawawuza kuti: Mbani wa imwepo omwe acikhala na xamwali wace acidzamugugudzira pakati pausiku acimuuza kuti: ndikumbizembo magapa matatu ya ufa.
6 Nakuti ndabweredwa na mulendo. Na tenepo ndiribe cakumupasa.
7 Ndipo xamwali waceyo acimutawira ali m'nyumba kuti: “Leka kundinesa! Nakuti ine ndafunga kale msuwo. Nakuti ine na wana wangu tagona kale. Na tenepo ine-pano ningamuke lini kuti ndidzakupase cinthu.”
8 Tsono dziwani kuti napo akasaya kumuka kuti amupase nakuti ni xamwali wace. Ndipo iye an'zalamuka basi thangwe la kumunesa na kumubwerera nthawe imweire. Ndipo iye an'dzamupasa bzentse bzomwe iye an'funa.
9 Na tenepo ndinikuwuzani kuti kumbirani, ndipo mun'dzapasidwa. Lingani, ndipo mun'dzabziwona. Gugudzani, ndipo mun'dzakufunguliridwa.
10 Nakuti munthu wentse omwe an'kumbira ambapasidwa. Na ule omwe ambalinga ambabziwona. Na ulembo omwe ambagugudza ambafunguliridwa.
11 Kodi mbani baba-munthu pakati panupa penu mwanace wakumbira ntsomba angamupase nyoka?
12 Ayai penu iye wakumbira dzai angamupase nyankalize?
13 Imwepo ndimwe wanthu wakuipa, tsono mumbadziwa kupasa bzinthu bzabwino wana wanu. Ndipo Babanu wa kudzulu ambapereka bzinthu bzabwino kuposa imwepo. Na tenepo an'dzapasa Mzimu wa Kucena kuna wale omwe an'dzamukumbira!
14 Pantsiku ibodzi Jezu akhazula ciwanda comwe cikhadasandusa munthu ubewewe. Pomwe ico cidacoka, munthuyo adayamba adalewa-lewa. Na tenepo wanthu azinji adasusumwa.
15 Tsono wanthu winango akhambalewa kuti: “Omweyu ali kuzula bziwanda mudzina la Berezebu, mkulu wa bziwanda.”
16 Na tenepo wanthu winango akhafuna kuyezera Jezu, ndipo adamukumbira kuti awalatize cizindikiro ca kudzulu.
17 Tsono Jezu akhadziwa kale ndzeru zawo, ndipo iye adawawuza kuti: Dzindza libodzi la wanthu likapambulana iro lin'pfudzika. Na tenepo banja libodzi likabzigawa ndipo iro lin'pasuka.
18 Penu wa kwa Sathanimbo adabzigawa, ndipo ufumu bwacebo bungayenderere lini! Nakuti muli kulewa kuti ine-pano ndiri kuzula bziwanda mu dzina la Berezebu.
19 Penu ine-pano ndiri kuzula bziwanda mudzina la Berezebu, kodi wana wanuambo ali kuzula mudzina la yani? Penu n'bzimwebzo, iwo ndiwo an'dzakuyeruzani.
20 Tsono, penu ine-pano ndiri kuzula bziwanda na mphambvu za Mulungu, umambo bwacebo bwakufikirani cadidi.
21 Penu munthu nyamphambvu akatenepo ali kulindira pamui pace. Ndipo bzinthu bzacebzo bzimbakhocherereka bwino.
22 Tsono pakawonekambo munthu mwinango nyamphambvu kuposa iye, akamenyana naye acimukunda ambamutolera bzifuzo bzomwe akhathembanabzobzo. Ndipo acigawira wanthu bzinthu bzacebzo.
23 Na tenepo munthu omwe ngwangu lini ni muwengi wangu. Na ule omwe an'dithandiza lini kukonkhobza iye animwaza.
24 Ndipo ciwanda cikacoka mu munthu, ico cimbayenda mu mbuto zakusaya madzi kuti cikapume. Ndipo cikasaya mbuto, cimbalewa kuti: “Tsapano ndini bwerera kumui kwangu komwe ndacokera.”
25 Ndipo ico cikafika, cimbadzawona nyumbayo idapsairidwa ndipo idacena.
26 Na tenepo ico cimbayenda kukatenga pomwe bzinango bzinomwe bzakuipa kuposa ico, bzicikhala m'mwemo. Ndipo unthu bwace mumbadzalemwa kuipa kuposa pakuyamba.
27 Pomwe akhalewa bzimwebzopo, mkazi m'bodzi adakuwa pakati panthithi wa wanthu aciti: “Wakusimbidwa ni mamako omwe adakubala na kukumamisa!”
28 Tsono iye adatawira aciti: Ne-ne-ne, wakusimbidwe mbale omwe ambabva fala la Mulungu aciliteweza.”
29 Pomwe wanthu azinji akhakonchezana, Jezu adalewa kuti: “Dzindza la wanthu wakuipa! Iwo an'funa cizindikiro. Tsono palibe cizindikiro cinango comwe cin'citike kuposa comwe cidacitikira Jona.
30 Nakuti Jona akhali cizindikiro kuna wanthu wa kuNiniva. Na tenepo Mwana wa Munthu ni cizindikirombo kuna dzindza limweri.
31 Ndipo Mambokazi wa Kunyantsi an'dzalamuka pantsiku yakutongedwa pakati pawanthu, ndipo acimanga mulandu ntundu omweyo wa wanthu. Nakuti mambokaziyo adacokera kwa kuyambira dziko kuti akabve ndzeru za Salomau. Tsono ali panoyu ni mkulu kuposa Salomauyo.
32 Na tenepo wanthu wa kuNiniva an'dzamukambo pantsiku ya kutongedwa dzindza limwero kuti adzalimangembo mulando. Nakuti iwo adakhumbula bzakuipa bzawo pomwe Jona adapaliza. Tsono ali panoyu ni mkulu kuposa Jonayo.
33 Ndipo palibe munthu ambaphatiza m'bvuniko aciubisa ayai aciukha m'mpfumpfuntsi mwa bwalizo. Tsono iye ambauikha padzulu, kuti wanthu omwe an'pitawo awone ceza.
34 Na tenepo maso yako ndico ceza ca thupi lako. Penu iyo yali bwino na thupi lakombo lina ceza. Tsono penu yali lini bwino na thupi lakombo lina m'dima.
35 Ndipo, cenjerani kuti ceza ciri m'maso mwanuco cileke kukhala mdima.
36 Na tenepo penu thupi lako lentse liribe m'mdima na pang'onopo, ndipo lin'dzayetima ninga momwe umbatoyera mbvuniko ukaugasa.
37 Pomwe Jezu adamala akhalewalewa, m'falizeu m'bodzi adamucemera kuti akadye naye. Na tenepo iye adayenda acikakhala patsantsali la kudyera.
38 Tsono m'falizeuyo adadabwa pomwe adamuwona kuyamba kudya acisaya kusamba m'manja.
39 Ndipo Mbuya adamuwuza kuti: “Afalizeumwe mumbatsuka kunja kokha mikombo na ndiro. Tsono mitima yanu nja ndewo na mingululi.
40 Mapsirumwe! Kodi ule omwe adakondza kunja, ni m'bodzo-bodzi lini omwe adakondza mkati?
41 Tsono tomani kuthandiza anyakusauka na bzinthu bzomwe munabzo. Na tenepo bzinthu bzentsenebzo bzin'dzacena.
42 Tsoka kuna imwe afalizeu! Nakuti imwepo mumbateweza mitemo yentse ya Mozeji, mumbapereka kuna Mulungu cacikhumi ca mbeu zentse za m'munda. Tsono mumbayebwa cilungamo na lufoi la Mulungu. Na tenepo citani bzimwebzi mucisaya kuyebwa bzinangobzi.
43 Tsoka kuna imwe afalizeu! Nakuti imwepo mumbafuna kukhala m'mipando ya ulemu ya m'nyumba zakupembera na kumbamusidwa m'misika.
44 Tsoka kuna imwe afalizeu! Nakuti kuteweza mitemo yanu bzidandendemera ninga munthu ali kupita nthenje aciponda nthutu nakusaya kudziwa, uko ni mukho.”
45 Ndipo m'pfundzisi wa ntemo m'bodzi adamuwza kuti: “Misiri, mafala yamweya muli kutukwana nayo ife-panombo.”
46 Tsono Jezu adamutawira aciti: “Tsokambo kuna imwepo apfundisi wa ntemomwe. Nakuti mumbanyamuza andzanu mitolo yakulemera kwene-kwene. Tsono imwepo mumbawathandiza lini kuwasendza napo na cala cokha.
47 Tsoka pomwe kuna imwepo thangwe mumbakondza nthutu za apolofetapolofeta omwe adaphedewa na azibabanu.
48 Na tenepo imwepo ndimwe mboni thangwe mwatawira bzinthu bzomwe adacita azibabanu. Nakuti iwo adapha apolofetawo ndipo imwepo muli kuwakondzera nthutu.
