3 Akor geľa o satan andro Judaš, savo pes vičinel Iškarijotsko. Ov sas jekh le dešudujendar.
4 Sar o Judaš odgeľa, dovakerďa pes le nekbaredere rašajenca the le chramoskere veľiťeľenca, sar les dela lenge andre.
5 On radisaľile a dovakerde pes, hoj les dena love.
6 Ov priačhiľa pre oda a rodelas, sar les te del andre akor, sar leha na ena o nipi.
7 Paľis avľa o Inepos, sar pes chal o mare bi o drožďi, andre savo kampelas te murdarel le Patraďakere bakrores.
8 O Ježiš bičhaďa le Peter the le Jan a phenďa: “Džan a pririchtinen amenge o Patraďakero chaben, hoj te chas.”
9 On leske phende: “Kaj kames, hoj te pririchtinas?”
10 Ov lenge phenďa: “Sar džana andro foros, arakhela pes tumenca jekh manuš, savo ľidžala o paňi andro džbanos. Džan pal leste andre oda kher, kaj džala.
11 A phenena le manušeske, kaskero hino o kher: ‘O Učiťeľis tuke phenel: Kaj hin oda than, kaj šaj chav o Patraďakero chaben mire učeňikenca?’
12 Ov tumenge sikavela upruno baro than, so imar ela pratimen avri. Ode amenge pririchtinen o chaben.”
13 On odgele a arakhle savoro avke, sar lenge o Ježiš phenďa, a pririchtinde o Patraďakero chaben.
14 Sar avľa odi ora, bešľa peske paš o skamind a the o dešuduj (12) apoštola leha.
15 Phenďa lenge: “Igen kamavas tumenca te chal kada Patraďakero chaben sigeder, sar cerpinava.
16 Bo phenav tumenge, hoj imar les buter na chava, medik na ela pherardo andro kraľišagos le Devleskero.”
17 Avke iľa e kuči, paľikerďa a phenďa: “Len kada a den jekh avreske.
18 Bo phenav tumenge, hoj imar buter šoha (ňikda) na pijava olestar, so barol pre viňica, medik na avela o kraľišagos le Devleskero.”
19 Avke iľa o maro a paľikerďa. Phagerelas, podelas lenge a phenďa: “Kada hin miro ťelos, so pes del vaš tumenge, kada keren pre miro leperiben.”
