48 A oda, ko na džanelas, ale kerel ola veci, vaš save peske zasogaľinel (zaslužinel) mariben, ela frimeder mardo. Sakonestar, ko but chudľa, pes but užarela. A olestar, kaske sas but dino, pes buter mangela.”
49 “Avľom e jag te čhivel pre phuv. A so me kamav? Hoj imar te labol!
50 Ale mušinav te el boldo le boľipnaha a avke phares mange, medik pes oda na ačhela!
51 Gondoľinen tumenge, hoj avľom te del o smirom pre phuv? Na, ale phenav tumenge, hoj te rozulavav!
52 Bo akanastar ena pandž džene andre jekh kher rozulade, trin džene džana pro duj a duj džene džana pro trin.
53 Rozulado ela o dad le čhaha a o čhavo le dadeha; e daj la čhaha a e čhaj la daha; e sasuj la boraha a e bori peskera sasaha.”
54 Phenďa le nipenge: “Sar dikhen, hoj e chmara avel le zapadostar, takoj phenen, hoj avel o brišind a hin avke.
55 A sar dikhen, hoj phurdel e balvaj le juhostar, phenen, hoj ela tačipen a hin avke.
56 Tumen dujemujengere! Oda, so pes sikavel pre phuv the pro ňebos, džanen te rozprindžarel, akor sar oda, hoj kada časos na rozprindžaren?
57 Soske korkore pestar na rozsudzinen, so hin mištes te kerel?
