Luk Nandaꞌafi 1:56-75 in Mufian

⁵⁶ Eaꞌ kwape kwaloma Elisabet aumb wanemb. Aꞌi owaꞌ main, akutanima kwafeꞌ wambel akwaꞌumbili.

⁵⁷ Nemaf afamba fataga eaꞌ Elisabet kogola awani aman.

⁵⁸ Esis wambel atembel ambep atep akoꞌw Elisabeti a sogawa Dembinai nati uwahipiꞌw endilisi ma kogola awani inimba. Eaꞌ esis sandagala salomaꞌw.

⁵⁹ Nimaguf 7-pelaif afafeꞌ faloꞌwan eaꞌ, nemaf fagafeꞌma 8i, esis safiꞌi saꞌi siti amom mogatopaꞌmana alop ananipi, eaꞌ esis saꞌi sofalana agol Sekaraia siꞌi ahamana.

⁶⁰ Owaꞌ maꞌamana kwaꞌi, “Owaꞌ. Apaꞌ mondaꞌmana anagol agol Jon.”

⁶¹ Eaꞌ esis saꞌipaꞌw saꞌi, “Owaꞌ, anis ambep ineꞌipi tagasi ina anis sandaꞌ agol agalemba Jon, owaꞌatin.”

⁶² Eaꞌ sandaꞌ lagof atogof sahaliꞌ ahamana saꞌi anen naꞌi nondaꞌmana agol maigil nogamana.

⁶³ Anen nandaꞌ logof atogof naꞌipas sofaꞌai anota selet, a nondaꞌ agol nogamanai. Eaꞌ nandaꞌagol naꞌi, “Agol ananigili Jon.” Eaꞌ esis agogolalasis kwapeteꞌ.

⁶⁴ Anen ataꞌ nandaꞌ agol atin owaꞌ, aꞌ noga naꞌi malogol ananigili, afega ananigai agiawi andeandeꞌ, nandagala nasaꞌma agol Godi luꞌwagol.

⁶⁵ Eaꞌ hiasi esis wambel atembel ananimbili ombel mahas. Eaꞌ deiꞌ hiahawes isimba gatis safeꞌagon hiꞌalagon walemb ambalemba bagape halafutagw itap luꞌupa Judiai.

⁶⁶ Eaꞌ amam nematawa hiasi sameꞌ basefa hiahawes isimbai, ukup asasipi pandandaꞌ pafeꞌ saꞌi, “Anaf awani inimba nepe niꞌimama? Anin atiasi aꞌ netaga aman dambeni endilisi.” Esis sogawa banagami Dembinaii mape malomana.

⁶⁷ Awani inimba Jon ahamana Sekaraia, Ambal buꞌunai Godi nape siꞌina anen eaꞌ nawalapa basef Godi siꞌi amom profet fowaꞌ magaꞌipasef naꞌi,

⁶⁸ “Aeꞌ aꞌi apaꞌ mosaꞌma agol Godi Dembinai luꞌwagol, God apaꞌ Israeli anen nafiꞌi natopalopa apaꞌ amam nematawa ananipai. Eaꞌ natalepa magakwaha waf awafi apaꞌ mandaꞌafi.

⁶⁹ Eaꞌ nandandepa anona aman banagonai atiasi nofaꞌapa nokwahamapa waf awafi mogotanimai. Fowaꞌ gani Devit nandaꞌ maol Godi, apaꞌ deiꞌ aman anamba nofaꞌapa mogotanimai, anen akunamana Deviti.

⁷⁰ Basef ifimba siꞌi fowaꞌ gani nagawalapefa amom profet buꞌwami ananimi magaꞌif malogof amamugufi.

⁷¹ Maꞌi anaf anen nofaꞌapa mokwaha lagof esis bousi apeꞌisi soloma epes isimba ukup aom endilisi ma apeꞌi.

⁷² Fowaꞌ anen naꞌi anaf aꞌ niti akusapa apeꞌisi fowaꞌisi uwahipis notopalopas. Eaꞌ anen okom mopoma basef buꞌwafi fowaꞌ nagalaꞌ lapafi. Anen ina atiasi niꞌi anif daif, owaꞌ.

⁷³ Anen naꞌi basef ifimba endilisifi atif nagaꞌif banagafi ma akunamapa apeꞌinai Abraham. Eaꞌ deiꞌ naꞌif naꞌamba atin siꞌi fowaꞌ nagaꞌias.

⁷⁴ Anen naꞌi notagwahepa ma lagof esis bousi apeꞌisi ma mondaꞌmana maol ananini, apaꞌ ina aꞌ ombal mohapa, owaꞌ.

⁷⁵ Apaꞌ mope itap apaꞌe mondaꞌ maol ananini nimaguf hiafi danda mofeꞌ mofeꞌ motagama mogagaꞌ. Ma nogohnaep ananisi mondaꞌ maol inimba ma waf ananifi usiꞌif hililiꞌi.

⁵⁶ Maria kwape kwaloma Elisabet aomb wanemb, eaꞌ kotanima kwafeꞌ wambel akwaꞌunai.

⁵⁷ Nemaf anama nataga eaꞌ Elisabet kola soꞌusoꞌwin aman.

⁵⁸ Esis wambel atona saloma esis wambota akwaꞌunai semeꞌ basef ma Dembinai nati owahipiꞌw endilisi ma kola awani inima. Eaꞌ esis sandanifel salomaꞌw.

⁵⁹ Nimeguf 7-peleim mafeꞌ maliꞌmana eaꞌ, nemaf nafeꞌma 8i, esis safiꞌi saꞌi seatopaꞌmana alop ananinai, eaꞌ saꞌi sofalana agel Sekaraia siꞌi ahalomana.

⁶⁰ Eaꞌ mamaꞌwana kwaꞌi, “Owaꞌ. Apeꞌ mondaꞌmana anona agel Jon.”

⁶¹ Eaꞌ esis saꞌipakw saꞌi, “Owaꞌ, esis wambota ineꞌinai tagasi ina enis sandaꞌ agel anama Jon, owaꞌetin.”

⁶² Eaꞌ sandaꞌ lagof atom sahaliꞌ ahalomana saꞌi anan niꞌi nondaꞌmana maina agel.

⁶³ Eaꞌ Anan nandaꞌ logel atona naꞌipas sofaꞌai anota selet ma nondaꞌ agel nogalomanai. Eaꞌ nandaꞌana naꞌi, “Agel ananinai Jon.” Eaꞌ esis gegelalasis kwapeteꞌ.

⁶⁴ Anan ataꞌ nandaꞌ agel etin, noga naꞌi malogel ananinai, afega ananinai neawi andeandeꞌ, nandanifel nafela agel Godi luꞌuna.

⁶⁵ Eaꞌ esis hiesi wambel anama umbamahas. Eaꞌ deiꞌ amamaga amama gatom mafeꞌ wambel hiꞌagoma nape halafutagw etap hiꞌagoma Judia.

⁶⁶ Eaꞌ amam nematawa hiesi sameꞌ basefa amamaga amama, ukup asasimi matamea mafeꞌ saꞌi, “Anona nemaf awani inima nepe niꞌimama?” Deiꞌ main, esis sogawa pepel laꞌifinai Dembinai nape nalomana.

⁶⁷ Awani inima Jon ahalomana Sekaraia, Ambal Buꞌunai Godi nape siꞌina anan eaꞌ nawalapa basef Godi siꞌi amam profet fowaꞌ gani mawalipasam naꞌi,

⁶⁸ “Aeꞌ aꞌi apeꞌ mofela agel Godi Dembinai luꞌuna, God apeꞌ Israeli. Anan nafiꞌi nagiambama apeꞌ amam nematawa ananipai. Eaꞌ natagahepa makwaha waf aonai apeꞌ mandaꞌanai.

⁶⁹ Eaꞌ nandandepa anona aman laꞌifinai nambimb nofaꞌapa nokwahamapa waf aonai meatanimani. Fowaꞌ gani Devit nandaꞌ opeh Godi, eaꞌ deiꞌ aman anama nofaꞌapa motanimani, anan akunamana Deviti.

⁷⁰ Basef amama siꞌi fowaꞌ gani nawalapama amam profet buꞌwami ananimi maꞌiam malogof amamumi.

⁷¹ Maꞌi anona nemaf anan nofaꞌapa meatanimani mokwaha lagof esis naumbih apeꞌisi soloma epes isima ukup aom endilisi ma apeꞌi.

⁷² Fowaꞌ gani anan naꞌi anona nemaf nieti akusapa apeꞌisi fowaꞌisi uwahipis nigiambamas. Eaꞌ anan okom nopoma basef buꞌwami fowaꞌ gani naꞌiam endilisi mope owagama gani.

⁷³ Anan naꞌi basef amama endilisimi atom naꞌiam laꞌifimi gani ilif naloma akunamapa apeꞌinai Abraham.

⁷⁴ Ma anan naꞌi notagahepa ma lagof esis naumbih apeꞌisi ma meandaꞌmana opeh ananimi, ina umbamohapa, owaꞌ.

⁷⁵ Anan naꞌi basef amama ma apeꞌ mope etap anaeꞌ mondaꞌ opeh ananimi nimeguf hiami danda mefeꞌ mefeꞌ meatagama meagaꞌ. Ma naep ananimi mondaꞌ opeh amama ma waf ananinai buꞌunai andeandeꞌ.