24 Kabay magakdo gamu dad to bong knun ani, du tagdawatyu i fye knèyu dini.
25 Magakdo gamu dad to bsol ani, du bitil gamu kadang. Magakdo gamu dad to mulé ani, du mlidù gamu na mngel kadang.
26 Magakdo gamu dad to gal dnayen i dad to ani, du én sa nimò i dad gutambulla di dad ise glut tugad Dwata.
27 “Kabay ani mangu di gamu dad flinge deg, kandoyu dad to dmuen gamu, na mimò gamu fye di dad to mnang nawa gamu.
28 Mni gamu di Dwata du fye banlén kafye i dad to mlagi gamu, na dnasalyu dad to fsasè gamu.
29 Na ku nun to smamfak gamu di bali bawehyu, nàyu i balin. Ku nun to mwè i tahà sigalyu faginyu blé i saulyu.
