1 Jisas tigide Godigo Tedali Mobo Bidi pągąnaluali. Tama Jisasgo te Jordan pabo ąį taga pelama, ma geasa pali. Tama Godigo Mobogo aga te bidi meni yai buluba odasa pali.
2 Jisas te bidi meni yai buluba pelama bidibadi yaide, Sarere a naga olama, a naga sogo, te 40 dei bidai elalubadi, Satango Jisasbolo dwai sę yanama sinayagasali. Te sogo usu nama Jisasgo nai munu me tubeo. Tama te sogo silibo si, Jisas nasi yali.
3 Tibaso, Satango agabolo wali, “Nage Godigo Ogwa da wida, teda nago wele elewibolo po olama, tubo nai gagagi sobaso da, nage tuao.”
4 Tiali goli, Jisasgo agai po wei ponoyu, te po wali, “Woo, Godigo bukude wali po e tiwai po wai dao, ‘Te tubo nai bretgo naga te bidi bidabo ula magobeo.’”
5 Nosali Satango Jisas odasa holama, polo tama tigidali we bidi tǫde bidibo ola mani.
6 Satango te po wali, “Te tigidali we bidi tonalubo bomo me, genuai nogi me, nagebolo naga mawaibao. Te tigidali nai eno tonalubo dao. Eno gasa bidibolo maiabo homu ebaso da, mawaibao.
7 Nago enabolo kidu tǫba polama, enabolo lotu po weyu da, teda te nai dabe naga saibao,” Satango te po wali.
8 Tibaso, Jisasgo wei ponoyu, te po wali, “Woo, Godigo bukude wali po e tiwai po wai dao, ‘Nago naga Genuai Bidi God dali naga lotu po weyu aga dologode bidao. Tama nago agai sę deli naga dąų olama yao,’ te po wai dao,” Jisasgo te po wai.
9 Nosali Satango Jisas Jerusalem Moni Lotu Be tempel poa pali daiba mu sela holali. Tama Satango te po wali, “Nage Godigo Ogwa da wida, edu aba samanao.
10 Godigo po wali bukude te po wai dao, ‘Godigo aga ensel dabebolo olama, nage saboa sagasaibao,’ te po wai dao.
11 Tama te bukude me te po wai dao, ‘Augwa nogogo nage tola selama, elewigo nage me sągąde me selegobeo,’ wai dao,” te po wali.
12 Tiali goli, Jisasgo wei ponoyu, te po wali, “Te bukude po tama telalubao, ‘Nago Genuai Bidi God olo subigila usu sigio, sinagio. Aga te nago God dao,’” te po wali.
13 Satango tama sinana bilali dobaso, Jisas aga taga pali, me sogo ma sinawainu yai.
14 Te Godigo Tedali Mobo Bidigo bomode Jisas ma pelama, Galili tǫba sabolali. Aga asali po te bulude mu pagia pali.
15 Hauwa sogo Jisas agai po te Juda dabego bomo yai po ola mabo be dabede te we bidibolo ola madu geani. Tama tibaso, tigidali we bidigo aga nogi ugwaba sali.
16 Te bidi Jisas polobadu aga dwasianu badi bidama, gomunai yali pesage te Nasaret be nani tomoba palio. Te Sabat sogo aga te Juda dabego bomo yai po ola mabo beba pidu bogia. Tama tede aga te Godigo wali po buku po nedai hagede, dolalugulali.
17 Augwaligo agabolo polobadu Godigo po pusa mabo profet bidi nogi Aisaiago asęani po buku nedao olama mawai. Tama agai te buku dagalama, po e tama asęai suali, augwalibolo haninama nedali.
18 “Genuai Bidigo Mobo Bidi ena dali bidibao. Agai dwagi yai po eno te nai meni yai we bidibolo ola momainu ena sa muai dao. Agai ena tama po pupusu bilimainu tagala palai dao, ‘Dage kalabus yali bage kalabus tagala piąo. Gedu widai bage, dage duga gedugo ma sueibao.’ Kalabus sęgo tabibo bage augwaligo sę togolomainu agai ena tagala palai dao.
19 Genuai Bidigo e tǫde bidibo we bidi ma sagasabo bodolu magayagasobaso, pupusu bilimainu ena tagala palali,” te asęani po Jisasgo haninama nedali, aga digi aga homugo tiyai.
20 Te Jisasgo te buku ma mesegelama, te buku tonalubo bidibolo menama, aga dugagulali. Tama te be tomode bidali we bidigo aga naga tonono yali.
21 Tibaso, agai te po wabo gagalali, “Megi tama te eno nedali po dolo tų sisu pabo po duga te odali dao,” te po wali.
22 Te we bidi tigidali augwaligo Jisas nogi ugwaba sali, tama Jisasgo dwagi yai po pusalide augwali tigidali noma sali. Tiali goli, augwaligo te po wali, “Mena tamawe, e bidi da, Josepgo ogwa meni yali wenagao,” te po wai dao.
23 Te Jisasgo augwalibolo te po wali, “Mu tama, dagego enabolo hasia bolo te po waibao, ‘Dokta bidi, naga digi naga ma geseleyu yao. Nago bulu me nogi Kaperneamde yali sę po dago odai dao. Tama naga te yaligia nage e pesagede me ma tama tiao,’ dagego enabolo waibao.”
24 Jisasgo wei ponoyu, te po wali, “Eno dagebolo mu tama te obe dao, Godigo po ola mabo bidigo po aga bulude bidu wabo, aga te bulu bidigo mu tama odobo menio.
25 Eno dagebolo mu tama obe dao, Godigo po pusa mabo bidi Elaija bidali sogo, kibu be sela olama, me kibu be tomode togolama, tulubage munu me tulai menio. Tigidali pesagede nasi ela pai dao. Te sogo Israel hani wilawe we hauwa mu bidai dao.
26 Tiali goli, Godigo Elaija te Israel hani wilawe we me tau somainu teba pao wai menio. Tiali goli, te Israel hani isąwai bage Saidon tǫde, Sarefat be nani we wilawe deli bidibo madi naga tau sigi pao wai dao, Godigo.
27 Me Godigo po pusa mabo bidi Elaisa bidali sogo, Israel bage oiyabe bidi hauwa bidai dao. Tiali goli, augwali me deli ma geselai menio. Me ma, te Israel hani isąwai oiyabe bidi me deli bidai, te Siria tǫde. Agai nogi Naman. Te oiyabe bidi deli digi Elaisago ma geselai dao,” Jisasgo te po wali.
28 Te Juda dabego bomo yai po ola mabo bede bidali bagego te po odoyu, moni sębę yali.
