Luk 2:13-43

¹³Nilyehe sai walip hlaꞌ wula wula sekete yat topoꞌe walip hlaꞌ uku pe, tinge yirisukwarme Lahmborenge taꞌe leꞌe,

¹⁴“Yirisukwarme Got nanah moihlaꞌ! Kin ka angange ŋoihmbwaip michukor el lenge miyeꞌ tuweinge na gah kekep ŋaiye ki hriphrip me tinge.”

¹⁵Ŋupe ŋaiye lenge walip hlaꞌ plihe yal moihlaꞌ pe, lenge miyeꞌ ŋaiye yembepeteme worsip yanange wusyep yale yat tititinge na, “Tuhur, ya mi metekeꞌe ŋaimune ŋaiye si ŋende nal Betlehem taꞌe ŋaiye Lahmborenge si ŋana poi.”

¹⁶Taꞌe luku pe, tinge hwihwai yal pe, tinge yetekeꞌe Josep hindi Maria, topoꞌe talah wimbe ŋaiye tahaiꞌ na gah wurmbuꞌ ŋaiye lenge yuwor yono ŋai.

¹⁷Ŋupe ŋaiye lenge miyeꞌ mbep lenge worsip yetekeꞌe kin miꞌe pe, tinge yana lenge ŋaimune ŋaiye walip hlaꞌ si ŋana lenge me talah uku.

¹⁸Miꞌe pe, lenge miyeꞌ ŋaiye yembepeteme worsip plihe yal pe, tinge yahraꞌe wenersep yirisukwarme Lahmborenge me ŋaimune ŋaiye si tinge yasande yetekeꞌe jande ŋaiye walip hlaꞌ si ŋana lenge. Pe lahmende ŋaiye yasande wusyep uku pe, tinge gunguru plai, topoꞌe ŋoihyeryembe wula wula. Kom wusyep uku ki tahaiꞌ na gah ŋoihmbwaip Maria pe, ti ŋoihweryembe ŋembere sekete.

²¹Ŋup syepumbur hun nal miꞌe pe, tinge yotombo wahriꞌ hiꞌ tikin Jisas pe, tinge jalme kin Jisas, naŋ uku ŋaiye walip hlaꞌ si galme nal yer ŋupe ŋaiye yukur teter mam waraꞌe kin.

²²Ŋup tikin ŋaiye Maria hindi Josep ka yende miꞌmiꞌ ŋaiye ta wende miꞌme titi ŋaiye ta tuhur prihe gunde wusyep erŋeme tikin Moses. Taꞌe luku pe, Maria hindi Josep yenge kin yal Jerusalem yala yaŋaꞌe kin yil syep tikin Lahmborenge.

²³Wusyep erŋeme tikin Got ŋanange na, ŋaiye tuwei ende ta waraꞌe lahmiyeꞌ pe, ta waŋaꞌe kin wilme Lahmborenge.

²⁴Taꞌe luku pe, ka yenge jesumbihnip wimbe hoi, lakai jet humbri hoi yil ŋaiye ka yesekeh yende ofa junde wusyep erŋeme tikin Lahmborenge ŋaiye ŋanange.

²⁵Dindiꞌ ŋup uku pe, miyeꞌ ende, naŋ kin Simeon narp Jerusalem. Kin miyeꞌ bwore bwarme ŋaiye gande wusyep tikin Got, topoꞌe Yohe Yirise narp topoꞌe kin. Pe kin narp keteme Miyeꞌ nungwisme lenge Israel.

²⁶Detale, Yohe Yirise si ŋaname nange yukur tatame ŋaiye ka ole tutume ŋaiye ka etekeꞌe Miyeꞌ alaŋatme tikin Lahmborenge, Krais.

²⁷Pe Yohe Yirise nenge Simeon nato yukoh yirise. Ŋupe ŋaiye yai mam Jisas yenge Jisas ya yoto yukoh yirise no, ka yende junde wusyep erŋeme luku, pe

²⁸Simeon nambaꞌe kin nimbite sai pe, ki ŋanange wusyep nirisukwarme Lahmborenge na,

²⁹“Lahmborenge ŋam, tatame ŋaiye na ambaꞌe ŋam, miyeꞌ wah nin no, ma mule topoꞌe ŋoihmbwaip ŋumwaiye. Detale, wusyep upwaiꞌe nin si bwore mise.

³⁰Tukwini ŋembep ŋam si metekeꞌe Miyeꞌ nungwisme nin ŋaiye nin si ŋende miꞌmiꞌ ŋaiye ka ungwisme lenge miyeꞌ tuweinge lalme.

³²Yirise kin ka aŋarꞌe el lenge haiten, topoꞌe ka angange naŋ ŋembere el lenge miyeꞌ tuweinge nin Israel.”

³³Pe yai mam tikin Jisas gunguru plaime ŋaimune ŋaiye Simeon ŋaname Jisas.

³⁴Pe Simeon ŋoih miꞌmiꞌ me tinge. Miꞌe pe, ki ŋaname Maria, mam tikin Jisas na, “Lahmborenge si nalaŋatme talah eꞌe. Pe lenge miyeꞌ tuweinge Israel wula ka hriphrip me kin pe, kin se ka ungwisme tinge. Kom wula se ka jirnge kin pe, leꞌe ka ende tinge ŋaiye ka tumbe. Kin ka tuhur tuꞌe wutuꞌ tikin Got ende ŋaiye mitiŋ wula wula ka jonombaiꞌe kin.

³⁵Taꞌe luku pe, leꞌe ka ende ŋoihmbwaip tase tinge ka ot halhale. Pe Maria, nin na isyunde syohe e oto ŋoihmbwaip nin tuꞌe ŋaiye ŋim gere ŋoihmbwaip nin.”

³⁶Miꞌe pe, tuwei borenge profet ende, naŋ ti Ana warp wa woto yukoh yirise topoꞌe. Ti talah tikin Fanuel pe, ti bamtihei ilyeh tikin Aser. Somohonme ti windiꞌe miyeꞌ ende, kom tinge hindi yarp ya tatame wahtaip syepumbur hoi pe, miyeꞌ ti nule pe, ti warp ŋope. Wahtaip ti tatame 84. Nye nyermbe ti warp yukoh yirise pe, ŋupe ŋau ti wa wahraꞌe naŋ tikin Got, topoꞌe ti wasme ŋai wanange wusyep topoꞌme kin.

³⁸Dindiꞌ ŋup uku pe, ti wate gwereme tinge pe, ti wirisukwarme Got Lahmborenge, topoꞌe walaŋatme wusyep Jisas wal lenge miyeꞌ tuweinge Jerusalem ŋaiye yarp jeteme Miyeꞌ alaŋatme tikin Got ŋaiye ka ember kin ka ote ungwisme tinge no, ka yurp hlaininge.

³⁹Ŋupe ŋaiye Josep hindi Maria si yende ŋaiꞌe ŋaiꞌe lalme jande wusyep erŋeme tikin Lahmborenge yal Jerusalem pe, tinge plihe yal moi tinge Nasaret ŋaiye sai noto Galili distrik.

⁴⁰Pe talah uku tahar borenge pe, kin nambaꞌe bongol, topoꞌe sande tekeꞌe bwore bwarme pe, ŋoihmbwaip bwore bwore tikin Got sai me kin.

⁴¹Wahtaipe taipe nato ŋup Pasova pe, lenge yai mam Jisas yal Jerusalem.

⁴²Ŋupe ŋaiye Jisas wahtaip kin nambaꞌe 12 pe, tinge plihe yal Jerusalem ŋaiye ka yende Pasova tuꞌe ŋaiye nye nyermbe tinge yende.

⁴³Ŋupe ŋaiye Pasova miꞌe pe, tinge yuworꞌe yosoko yale yil moi tiheinge tinge ilyeh ilyeh tongonose. Ŋau ende supule tinge ya jere yaŋah, kom Josep hindi Maria ŋoihyeryembe nange Jisas ki ŋotop lenge wondoh embere luku nal yaŋah. Kom Jisas teter narp Jerusalem pe, lenge yai mam kin yukur sisyeme taꞌe luku. Tinge yende wah yekepe kin ya yoto lenge bamtihei tinge, topoꞌe lenge ŋimei ŋaiye tinge top lenge lalme yal, kom yukur tinge yetekeꞌe kin, pakai. Taꞌe luku pe, tinge plihe jan bunjenge yal Jerusalem.