13 Kɔ Pilat ewe wəloŋnɛ wəpɔŋ, abɛ a dɔtɔf, kɔ afum.
14 K’oloku ŋa: «Nəŋkɛr’em fum nwɛ a nkɔn eŋgbiŋər afum kəyeŋk səbomp. Mba fɔr yonu kiriŋ iyifət kɔ, ali tes tin inəŋk fɛ ntɛ ɔyɔ mes mamɛ nəmboŋcɛ kɔ mɔ, ntɛ pəmar padifɛ kɔ mɔ.
15 Herodu sɔ ɛnəŋk fɛ ali tin, bawo oluksɛ su kɔ. Awa! Fum wəkawɛ ɔyɔ fɛ ntɛ o ntɛ pəmar padifɛ kɔ mɔ.
16 Kəsak kɔ k’inder k’andelip kəsut kɔ-ɛ.»
17 Kəsata ka Pak nkɛ o nkɛ, Pilat ɛŋc-sakɛ ŋa wəyi dəbili wəkin.
18 Kɔ ŋambaŋɛnɛ fəp kəkulɛ-kulɛ: «Mədif wəkawɛ! Məsakɛ su Barabas!»
19 Anabɛr Barabas dəbili teta kədifətɛnɛ kəlɔma nkɛ kənayi dare mɔ, kɔ kədif ka fum.
20 Kɔ Pilat ɔŋgbɔkərɛ sɔ kəloku ŋa kəfaŋ kɔn kəsak Yesu.
21 Mba kɔ ŋaloku gbɛs: «Məcaŋ kɔ dəkətɔk ka defi! Məcaŋ kɔ!»
22 Kɔ Pilat eyif ŋa sɔ tamaas: «Pəlɛc pere pɔyɔ-ɛ? Inəŋk fɛ ntɛ o ntɛ pəmar padifɛ kɔ mɔ. Kəsak kɔ k’inder k’alip kəsut kɔ-ɛ.»
