43 Ra ara ensel tagisapat una langit i wanpat toromi, ma i udekdek tari.
44 I taramo a dekdek na tupunuk, ra i dekdek doko nama niaring. Ma a misongot na pinino i elar nama tutu na gap i puku pirso utiro upiso.
45 I urop a niaring ra i tur, i milet melet torom a kum nat na ususer, ra i tama det ra det sa inep dumun, uni a pinindet i tungulu nama tupunuk.
46 Ra i watungi tandet lena, “Ilai ra mot inep dumun kut? Mot in katutur, ma mot in wararing, sur gong mot puku una ululam.”
47 Ra o Iesu i wasiso utmakai, a labino kunur na taro det wanpat. Ra o Judas, ara tagun a noino ma aru nat na ususer, i mugu pas det. I wan torom o Iesu sur in gom a pangpagor na wano.
48 Ra o Iesu i tingi lena, “Judas, pepetlai, un pitar tari mo a Nutun a Musano torom a kum ebar, nama egom?”
49 Det ra det wan tomo nam o Iesu det tasman asau ra in nanpat, ra det tingi lena, “Labino, pepetlai, met in waim nama numet a kum totok na inaim?”
