33 O Pita i watungi tano lena, “Labino, a sa waninar taru, sur an nan tomo nam ui una karabus, ma una minat.”
34 Ma o Iesu i balu i lena, “Pita, a watungi tam, uniri a kereke ken kurkurirakuk utmakai, ra un ipul a tulu dino lena, ko tasman iau.”
35 Numur o Iesu i ting anun a kum nat na ususer lena, “Ra a tulu ru mot, ma katu paus na umubek mani anumot, o tu rat, o tu su, pepetlai, mot sibo ut sur tu utna?” Ra det balu i lena, “Awu.”
36 Ra o Iesu i watungi tandet lena, “Ikut uniri, osi ra anunu tu paus na umubek mani, i wakak sur in losi ut, ma a rat kai. Ma osi ra ka tin totok na inaim, i wakak sur in siuru ru anun a saket sur in kul pas tino.
37 A watungi tamot, din pam sot pas a tumtumus ri un iau, ‘Di watung tomo det nama kum tene sakino.’ Uni a kum utna ri di sa tumus tari un iau, milau mo din pam sot pasi.”
38 Ra a kum nat na ususer det watungi lena, “Tama i, Labino, arin totok na inaim kuri ut.” Ra o Iesu i balu det lena, “I elar kut.”
39 O Iesu i pirso gusun a tamon, ra i wan usapat una Tangai na Oliw, elar ut nami ra i ser pami. Ra a kum nat na ususer det muri.
40 Ra det wanpat una nubual ra, i watungi tandet lena, “Mot in wararing, sur gong mot puku una ululam.”
41 I wan gisen lilik taru kut gusun det, i kis butkeke, ma i wararing lena,
42 “Tita, ra u nemi, un los ru a kap na mamaut ri gusun iau. Ikut gong u mur anung a nemnem, un muri ut anum a nemnem.”
43 Ra ara ensel tagisapat una langit i wanpat toromi, ma i udekdek tari.
44 I taramo a dekdek na tupunuk, ra i dekdek doko nama niaring. Ma a misongot na pinino i elar nama tutu na gap i puku pirso utiro upiso.
45 I urop a niaring ra i tur, i milet melet torom a kum nat na ususer, ra i tama det ra det sa inep dumun, uni a pinindet i tungulu nama tupunuk.
46 Ra i watungi tandet lena, “Ilai ra mot inep dumun kut? Mot in katutur, ma mot in wararing, sur gong mot puku una ululam.”
47 Ra o Iesu i wasiso utmakai, a labino kunur na taro det wanpat. Ra o Judas, ara tagun a noino ma aru nat na ususer, i mugu pas det. I wan torom o Iesu sur in gom a pangpagor na wano.
48 Ra o Iesu i tingi lena, “Judas, pepetlai, un pitar tari mo a Nutun a Musano torom a kum ebar, nama egom?”
49 Det ra det wan tomo nam o Iesu det tasman asau ra in nanpat, ra det tingi lena, “Labino, pepetlai, met in waim nama numet a kum totok na inaim?”
50 Ma ara tagun det i tau kutus ru in nosot na talngan a tultul anun a mugumugu na tene etabor torom o God.
