8 I balu det lena, “Mot in tumarong, sako din toro pas mot. Uni a susut det in nanpat nama risang, ma det in warango det lena, ‘Iau a Karisito,’ ma lena, ‘A du bung i sa milau.’ Gong mot mur det.
9 Ra mot in longoro a kum inaim ma a kum inaim tomo nama gapman, gong mot ngara, uni a kum utna ri det in nanpat mugu, ikut a ururop ina rakrakon bual ken nanpat utmakai.”
10 O Iesu i watungi tandet lena, “A kum kamkabo taro det in tur na inaim torom a kum se kabotaro, ma ara gapman in tur na inaim torom ara gapman.
11 A kum lamlabino guri, ma a kum munurak ma a kum ngas na dekdek na misait una kum tamon, ma a kum ngas na utna tagisapat una bakut ra in ungara a taro, ma a kum lamlabino ukinalong tagisapat una bakut, det in nanpat.
12 “Numugu ra a kum utna ri ka det wanpat utmakai, din dat pas mot, din ukadik mot, ma din dat mot una kum rumu na lotu sur a warkurai, ma din uruk mot una kum karabus. Ma din dat pas mot sur a warkurai sa numugu umatan a kum king, ma a kum lamlabino mugumugu, uni mot anungi.
13 I ra, a wakak na du bung, sur mot in wasiso talapor un iau torom det.
14 Gong mot nuknuk mugu sur asau ra mot in balu lako kum etakun nami.
15 Uni iau ut, an unuk tar a wasiso ma a mananos kai una nuknuki mot, ra anumot a kum ebar rop, ka det in balu lar pasi, ma ka det in ipul ru i.
16 A kum tamtama mot ma a kum nanamot, a kum tistisi mot, a kum kukumot, ma a kum paspasa mot, det in mulaot ru mot sur din um doko lako taro tagun mot.
17 A taro rop det in nget mot uni mot anungi.
18 Ikut ka tin iwu na lorimot in raro.
19 Anumot a tuntunur dekdek in ulaun mot.
20 “Ra mot in tama a kum taro na inaim det tur talilis pas o Jerusalem, mot in tasmani lena i milau sur din kamar ru i.
21 Ma det ra det kis una papor Judia, det in kalabor eno usapat una kum tangai, ma det ra det kis una tamon Jerusalem det in pirso, ma det ra det kis sa ubual gong melet mo det ruk.
22 Uni a kum bung ra, det a kum bung na minabalu sur din pam sot pas a kum ututna rop ra di sa tumus tari una Buk Tabu.
23 Una kum bung ra, in laulau doko torom a kum tianan, ma torom a kum ino kai ra a kum nutnutun det, det sus utmakai. A labino ngunungut in nanpat una tamon Israel, ma a kankan anun o God in monong a taro ri.
24 Lako taro din um doko det nama totok na inaim, ma lako taro din ben pas det sur det in kis na karabus una kum tamon rop. Ma det ra awu sur a taro Juda det in pas tataun o Jerusalem, ma in tuk ut una bung ra o God i kubus tari sur a taro ra awu sur a taro Juda det in mana nama ban laulau a taro Juda.
