61 Na manla di kenen, “Kabay landè gakedyu dnagit salngad én!”
62 Na sminyas ale di maan ku tan i kayean dagit i tingaan.
63 Taman mni Sakaraya gusmulat, na sulatan, “Dyan i dagitan.” Na too tikeng kdeela.
64 Na talê gtalù Sakaraya, na flesan dnayen Dwata.
65 Di kaklinge i kdee dad demela saldan ani too ale likò. Na mbel i santulen ani kel di kdee dad bulul di banwe Dyudiya.
66 Na kdee dad to mlinge gablà di mgimò ani, toola fandam, na smalek ale, manla, “Tan i kagkah i tingà ani kadang?” Én manla du toola nilè i tulus Dwata mnè di kenen.
67 Na i mà Dyan, dunan Sakaraya, fnò kenen i Mtiu Tulus, taman talù i ftalù Dwata kenen, manan,
68 “Dnayenito Amuito Dwata fnangamfù i dad bel Israél, du tasalu kenen di gito dad ton, na banlén ito kagalwà.
69 Dekan dini di gito i to too mtulus falwà gito, dunan i bel saligan Dabid,
70 du én sa fakangan di gito fagu di dad tugadan di muna,
71 manan falwaan ito mdà di dad to dmuen gito, na mdà di kagot kdee dad to mnang nawa gito.
72 Fite Dwata i kakdon di dad gutambulito, fagu di kdohoan i fakangan di dale.
