48 Iou pran auər a sə iakamo tukwini nari min, mətə rerɨn ramrhi iou. Təkwtəkwuni mɨne mamevən nərmama pam tuhəni iou mə iou pran sə rerɨk ramaɡien,
49 tɨ nəri nə mə Kumwesən i sə rɨskai pɨk rɨno narimnari asori me miou. Nəɡhɨn ro ikinan.
50 Napiien səvənhi ramarə tɨ nərmama me pam səməme kamhəsiai in, mamarə mwi tɨ nɨpwnətɨnraha me mɨne nɨmwipwɨnraha me mamevən.
51 In ramo nɨmtətien me ia rəɡɨn əsanɨn, maməkoui irapw nərmama səməme kamhəfiəutə ia rerɨnraha.
52 In rauvehi irapw kiɡ asori me ia kwopun kamhəkure ikɨn mamhərɨmənu, marə mauvehi utə mwi nəmə auər a me.
53 In rauvei pen nəveɡɨnien amasan m nərmama səməme nukumhə ramahi irəha. Hani tɨpwɨnraha rəsisi. Mətə səməme nautə səvənraha rasori in ramərhi irapw irəha, mɨpkuvei pen mhə nari riti mɨnraha.
54 In ramasitu ia kɨtaha nəkur Isrel. Kɨtaha nərmama me səvənhi samo tukwini nari min. In ramo iamɨnhi irə tɨ nəri nə mə rerɨn ramrhi napiien səvənhi
55 rosi in rɨməni pen tɨ kaha kupwən me səkɨtaha. In rɨməni pen tɨ Epraham mə in trapi Epraham mɨne nərmama me ia kwənəkwus səvənhi ia nuk nuk me.”
56 Meri rarə irau Elisapet meste məkwə kahar rukurau, nənə kurirə irə rɨrərɨɡ mevən fwe imwəni.
57 Rɨneste nəpɨn səvəi Elisapet trərəhi tɨni irə. Rərəhi tɨni iərman.
58 Nərmama me ipaka tukwe mɨne nɨpərɨn me həreɡi mə Kumwesən rɨnapi asori in. Həuvehe mhətə in mamhaɡien pəri.
59 Nəpɨn iəkunouihi səvənhi reste nəpɨn eit, həuvehi mhəuvehe mə tukuvehi ninhum min. Nətərɨɡien səvənraha mə tuhəseɡi pen nəɡhɨn nə Sekaraea, nəpwɨnhi tata səvənhi.
60 Mətə səvənhi mama rɨni mə, “Rekəm. Tsəseɡi pen nəɡhɨn nə mə Jon”
61 Mɨreɡi irəha həni pen tukwe in mə, “Mətə rəfo? Nahaɡ nəha riwən ia kwənəkwus səim.”
62 Nənə irəha həɡkiari pen m tata səvənhi ia rəɡɨnraha, mhəres nəfe nahaɡ in rokeikei mə tuhəseɡi pen ia iəkunouihi.
63 Sekaraea rəres nəri kamrai pen nari irə. Kuvehi pen min. Nənə rɨrai pen ianhi mə, “Nəɡhɨn nə Jon.” Nənə irəha pam hərkərinari irə.
64 Ia nəpɨn nəha Sekaraea rerɨn rɨnarə mwi. Nənə in rɨnaməɡnəɡɨni Kumwesən.
65 Nərmama me ia nɨkarkare rukwənu həreɡi həhekɨr. Nəɡkiariien nəha ruvirɨs ia kwopun me pam ia təkure tənə ia Jutia.
66 Nərmama me pam səməme həreɡi nəɡkiariien nəha hamətərɨɡ irə mə, “Iəkunouihi nəha trəfo irə? Mətə in nə nɨskaiien səvəi Iərɨmənu ramarə irə.”
67 Ia nəpɨn nəha Nənɨmwɨn Ikinan ruvehe mukuər ia reri Sekaraea, tata səvəi Jon, muvei pen nəɡkiariien min. Nənə Sekaraea rɨni mə,
68 “Pwəh səɡnəɡɨni Iərɨmənu Kumwesən səkɨtaha nəkur Isrel. In ruvehe masitu ia kɨtaha nərmama me səvənhi meivinari ia kɨtaha.
69 In ruvehi utə iəmə skai riti sə truvehimɨru kɨtaha. Iəmə skai nəha in kwənəkwus riti səvəi Kiɡ Tevɨt sə rɨnamo tukwini nari m Kumwesən fwe kupwən.
70 Nəri nəha ramesi pen nəɡkiariien me səməme Kumwesən rɨməni pehe tukutaha i ia tərhui profet ikinan me səvənhi fwe kupwən.
71 In rɨməni mə truvehimɨru kɨtaha, muvehi raka kɨtaha ia rəɡi nərmama me pam səməme kamhometə kɨtaha, mamhəmwəki kɨtaha.
72 In rɨməni mə trapi kaha kupwən me səkɨtaha, məpwəh nenouenouien nəɡkiariien ikinan səvənhi.
73 Promes nəha in rɨməuvei pen m kaha kupwən səkɨtaha Epraham, mauvehi kwəsuahi tukwe.
74 In rɨməni mə nəpɨn truvehi raka kɨtaha ia rəɡi nərmama səməme haməmwəki kɨtaha, in trəseni kɨtaha tso tukwini nari min, mhəpwəh nehekɨrien.
75 Kɨtaha tsəmher mhatukwatukw ia nənimen ia nəpɨn me pam ia nɨmɨruien səkɨtaha.
76 Nənə ik, nərɨk, tukɨni mə Kumwesən sə rasori anan, profet riti səvənhi nə ik, tɨ nəri nə mə tikukupwən məpərhi suatuk me səvəi Iərɨmənu səkɨtaha, nənə in trukurirə.
77 Tikɨni irapw tɨ nərmama me səvənhi mə Kumwesən truvehimɨru irəha, məpwəh nərpwɨnien noien ərəha me səvənraha.
