Luk 1:27-76 in Yessan-Mayo

²⁷ Re muyensi yen ta wuri tene tuma wesowte yim. Er ta rem tene tame get wemenem. Tame reri sig Josep. Re kiyi temenem Keryen Yen Devit reri beig. Muyensi yen ta teri sig Maria.

²⁸ God reri kwom tame re tene pir op wem. Keryen Yen God re nene heyar nenem. Re nerenkene tetane.

²⁹ Maria te etop meten te habolaweyen op habom. Er mapkap tuma?

³⁰ God reri kwom tame re tene op wem. Maria ne kap akte. God re nene heyar nenem.

³¹ Yuri ne yen panete. Ne tauryen wurte, ne rene sig Jisas wete.

³² Yuri re keryen ken tete, tatame rem rene op wete. Re Hevenke tetane God Eterri Yen. Op wete. Kiyi Devit re keryen yen temenemkap, yuri Jisas re reri yaku potte, re keryen yen tete.

³³ Re warege Jekop reri beig remne som panen site. Re keryen yen som temente.

³⁴ Maria te God reri kwom tame rene op wem. An yen mapurke panete? An tame be yitene.

³⁵ God reri kwom tame re tene sein op wem. God Reri Wow re nerenke yate tetane. God reri kitimena bukrewai re nene newote tetane. Opkap ne yen wurte, rem op wete. Er yen re yenbosubuwai. Er yen re God Eterri yen.

³⁶ Metye. Neri lake Elisabet kiyi rem tene op webem. Te yen be panete. Te yen game am. Rem op webem, gwopte te ker teye, te yen panebo. Te liyp letrane kelare wuri keretene.

³⁷ Aboyei wos God re kebese nenbo. Op wem.

³⁸ Maria te op wem. An God reri yaku nen ta. Neri weyekap re anne etop nente, et yenbo. Op wemke, God reri kwom tame re tene mesegenen ek yim.

³⁹ Keraket tem, Maria te wos teren agetage te kwowke yim, te Judia yokwori kwom etek yim.

⁴⁰ Te Sekaraia reri akek wuren Elisabet tene pir wem.

⁴¹ Elisabet teri sek temenem yen re kirpem. God Reri Wow re Elisabet tene gureremenem.

⁴² Te Maria tene yaye op wem. God re nene heyar nenem. Re agerbo ta remne etop be nenem. Neri sek tetane yen God re rene kirkir heyar nente.

⁴³ Ari Keryen Yen reri nawo te anne lasyawo, an okbop teye.

⁴⁴ Neri weye pir an metye, agetage ari sek tetane yen re okbop ten re kirpeye.

⁴⁵ God re reri wem tuma nente tetane. Ne etop omuteke habobo, ne okbop teye. Elisabet te etop wem.

⁴⁶ Maria te op wem. An Keryen Yen rene boteyatebo, an reri sig bukre webo.

⁴⁷ Ari wow God rene okbop tebo. God re anne Kwobo Labo Tame, re anne yenbo nenbo, an heyar tetane.

⁴⁸ An reri yaku nen ta eisow. Re anne habom, an boteyatebo. Gwopte tetane tatame, yuri temente tatame rem wete, God re anne yenbo nenem, an metekwasbo.

⁴⁹ God re kitimenakene, re anne bukre wos nenye, gwopte tetane tatame, yuri tete tatame rem anne tuma yenbo wete. God reri sig et yenbosubuwai.

⁵⁰ Kiyiri tatame, gwopteri tatame, yuri tete tatame rem God reri sig bukre wete, God re remne pap mette tetane.

⁵¹ God re kitimenakene tame, yike tatame rem remri sig kworer bukre webem, re remne wekroken rem yikwete yakwetebo.

⁵² Re sig bukre temenem kwom panen si keryen yen remne teitkwunem. Sig bukre be temenem tame remne wepoten remri sig bukre wem.

⁵³ Sikwoi sam tatame re remne awos newom, rem seketem. Wosbaskene tatame re remne wos be newom. Re remne bupo me werasen yikwetem.

⁵⁴ Kiyi re nemri yei warege remkene tuma natobom. Er tuma re etop nenem. Re reri yaku nen tame Israel remne kwobo lam.

⁵⁵ Re nemri warege Abraham rene be serem. Re rene pap metbem. Abraham reri nanem remne re kirkir pap som metbem.

⁵⁶ Op wem, Maria te Elisabet tekene liyp mur ten te akwulke sene ek yim.

⁵⁷ Elisabet te yen wurte yabel tem, te tauryen wurem.

⁵⁸ Teri kwomri tatame, teri lakemase rem metem, Keryen Yen re tene heyar nenem, rem okbop bukre ten boteyatem.

⁵⁹ Yabel letrane kelare mur kere tem, tame rem yam. Rem yen reri mare tumas kutem reri sig, har Sekaraia eterri sig tapene yate wem.

⁶⁰ Nawo te me sewayen op wem. Yehow. Nem reri sig Jon wete.

⁶¹ Rem tene sein op wem. Er sig et neri tame beigri sig bo.

⁶² Op wem, rem har rene letke mukuteken rene op wemetem. Yen reri sig ne berke wete?

⁶³ Op wem, ha re siglow wemetem, rem poten sen yan rene newom, re yen sig Jon etek basrasem. Rem etop lan danekene sekem.

⁶⁴ Sekaraia re tumakene sene tem, re God rene tuma yenbo wem.

⁶⁵ Kwomri tatame rem lam, re tumakene tem, rem weskene akem. Nugwape Judia nowselke tetane kwowke temenem tatame rem er tuma metem,

⁶⁶ rem op lam, God reri kitimena er yen rekene temenem. Etop lam, rem kenakem habon op wem. Yuri er yen re haneyen tete, re be yaku potte?

⁶⁷ God Reri Wow re Jon reri ha Sekaraia rene gureren re yuri tete wos wesowem.

⁶⁸ Re op wem. Nem Israel tame, nem Keryen Yen rene tuma yenbo wete. Re reri tatame remne kwobo lan remne potem.

⁶⁹ Re reri yaku nenbem yen Devit reri beig wuri potem. Er tame re kitimenakene, re nemne poten nem pow tete.

⁷⁰ Kiyi God re reri tuma wesow tame yenbo remne tuma wesowem. Sene er tame rem tatame remne er tuma etop wesowem.

⁷¹ God re op wem. Kemri peiktamekene kemne wuribai yaper tetane tame remne an teitkwunte tetane.

⁷² Re sene op wem. An yeiwarege remne pap meten kiyi natobom tuma yenbo an be serbo. An som habobo.

⁷³ Re nemri warege Abraham rekene tuma natobom. Kiyi wemkap gwopte re etop nente.

⁷⁴ Re nemne peiktame remri letke potte, nem reri yaku nente, nem kap akte.

⁷⁵ Opkap nem kwokwos kwokwos pow temente, God re late, nem reri wule yenbo nenbo, re selbo wule aboyei nem potem.

⁷⁶ Sekaraia re op wem, Ari yen, yuri ne Keryen Yen rene temnas yin reri kelow heyarte. Tatame rem nene op wete. Re Hevenke Tetane God Reri Tuma wesowbo tame.

²⁷ Yim, ere munguta wuri tene tuma wusoute yim. Ete ta tene eme tame womenem. Tame eri sig Josep. Ere kiyi temenem Keryen Devit eteri supa. Munguta teri sig Maria.

²⁸ Yim, ere tene pir wom, ere etep wom. Keryen God ere nerenken tetan. Ere nene noub nenem.

²⁹ Te etep metem, te abolawoyin etep abom. E mapkap tuma?

³⁰ God eteri kom tame ere tene etep wom. Maria, ne mane akte. God ere nene noub nenem.

³¹ Yuri ne yenken tete nenbe. Ne taureyenke warwite nenbe. Ne erne sig Jisas tete.

³² Yuri ere keryen tete, tatame eme eterne etep wote. Ere Hevenke tetan God Eteri Yen. Etep wote. Kiyi Devit ere keryen temenemkap, yuri Jisas ere eteri yaku pette, ere keryen tete.

³³ Ere warege Jekop eteri tame supa emne somsom panen site. Ere keryen som temente. Ere etep wom.

³⁴ Maria te erne awosein etep wom. An yenken mapeke te? An tame mak narten.

³⁵ Ere tene awosein etep wom. Akei wos God eteri kulke tetan. God Eteri Wou ere nerenke yate. God eteri mure ere nene newote. Etepkap ne yenken tete. Yuri ne warwite yen eme erne etep wote. Ete yen ere yenbosubuwai. Ete yen ere God Eteri Yen. Eme etep wote.

³⁶ Metye. Neri wopu te Elisabet, kiyi eme tene etep wobetem. Te yen beke se. Te yen game abe ta. Eme etep wobetem, gwopte te keryen tebe, te yenken. Te lup ep yekwo let ep yekwo let ges wuri (6-pela) yim.

³⁷ Wos nogwape God ere kuyese nenbe. Etep wom.

³⁸ Maria te etep wom. An God eteri yaku kere ta. Neri woyekap ere ane etep nente, an kir teye, e yenbo. Etep womke, God eteri kom tame ere tene mesginin sene yim.

³⁹ Ete yabel Maria te wos peten agetage te kowke yim, te Juda distrikke tetan kom nebule etek yim.

⁴⁰ Yim, te Sekaraia eteri akek wurin Elisabet tene pir wom.

⁴¹ Pir wom, Elisabet teri sek temenem yen ere titowum. Titowum, God Eteri Wou ere Elisabet tene gulelemenem,

⁴² te Maria tene noubke etep wom. God ere nene noub kobo lam. Ere akeite ta emne etepkap beke nen. Neri sek tetan yen eter kir, God ere erne kir kobo late.

⁴³ Ari keryen eri nawo te ane late yawo, an pap yenbo metye.

⁴⁴ Neri woye pir an metye, agetage ari sek tetan yen ere metekwasye.

⁴⁵ God ere nene wom tuma ne etep kenawaike abobe, eke ne metekwaste. Elisabet te tene etep wom.

⁴⁶ Maria te etep wom. Ari selpapke an Keryen God eri sig eisau wobe.

⁴⁷ Ari selpapken porereken an Keryen God erne metekwasbe. Ane sene petem God ere ane eyarem. An erne sig eisau wobe.

⁴⁸ An eteri yaku kerebe ta nebule. Ere ane abobetem, eke an metekwasbe. Mure sapeken God, ere ane wule eisau nenye, eke gwopte tetan tatame, yurik tete nenbe tatame eme wote. God ere ane yenbo nenbe. Eri sig e yenbowai.

⁵⁰ Eteri kulke tetan tatame emne ere kobo labe. Kiyiri tatameken gwotepteri tatameken yurik tete tatameken emne eter som kobo labetete.

⁵¹ Eteri letke God ere sapeken wos nenbe. Ere sig maime eisau wobe tame emne won sekiyin, eme yikwute yakwutem.

⁵² Ere kom panen siten keryen tame emne teitkwunbetem. Maime sig teitkwunbe tame emne ere emri sig eisau wom.

⁵³ Se kwoi sam tatame ere emne a yenbo newon abetem. Eme an se kir tem. Kel worken tatame emne ere wos beke newo, ere emne won, eme bepou me yim.

⁵⁴ Ere eteri yaku kere tame, Israel, erne kobo lam. Ere neremri warege etemken namderasem tuma abopitim. Ere warege Abrahamken eteri nanken emne noub som eyarbe.

⁵⁶ Etep ten, Maria te Elisabet teken lup mur etek ten te komke sene yim.

⁵⁷ Elisabet te yen warwite yabel tem, te taureyenke warwiyim.

⁵⁸ Warwiyim, teri kom tame, teri tame supa eme metem, Keryen God ere tene noub nenem, eke te yen warwiyim. Etep metem, eme metekwasem.

⁵⁹ Yabel ep yekwo let ep yekwo let bor mur (8-pela) tem, tame kau eme yam. Eme yen erne somo kwunen erne sig tete yam. Eme ar eteri sig Sekaraia tete wom.

⁶⁰ Etep wom, nawo te mo won etep wom. Berai. Nema eri sig Jonke tete.

⁶¹ Etep wom, eme tene wotaken etep wom. Ete sig e neri tame beig etemri sig berai.

⁶² Etep wom, eme ar erne letke peteran erne etep wolam. Yen erne sig mapeke tete?

⁶³ Etep wom, ar ere siglou womke, eme siglou peten sen yan erne newom, ere yen eri sig etek basem. Ere etepke basem. Eri sig Jon. Etepke bas rasem, eke eme wouken akem.

⁶⁴ Wouken akem, agetage Sekaraia ere tuma sene namdem, ere God erne tuma yenbo wom.

⁶⁵ Wom, kom tatame eme lam, ere tuma sene namdem, eke eme wouken akem. Judia distrikke tetan kowke temenem tatame nogwape eme ete tuma kir metem.

⁶⁶ Metem, nogwape tatame eme etep wobetem. God eri mure ere ete yen eterken tetan. Ete yen ere aneyen tete, ere kap be yakuke kerete nenbe? Eme etep wobetem.

⁶⁷ God Eri Wou ere Jon eteri ar, Sekaraia, eterne gulelen ere yurik tete wos wusowum.

⁶⁸ Ere etep wom. Nema Israel tatame, nema Keryen God erne tuma yenbo wote. Ere eri tatame emne kobo lan emne sene petem.

⁶⁹ Ere eri yaku kere tame Devit eri tame supa wuri kenem. Ete tame ere mureken tame, ere nemne sene pette, nema yenbo tete.

⁷⁰ Kiyi God ere eteri tuma wusoubetem tame yenbo emne tuma wusowum, sene eme tatame emne ete tuma wusowum. Eme etep wom.

⁷¹ God ere etep wom. An kemne peiktameken kemne pap yaper tebe tameken etemri letke an kemne sene pette.

⁷² Ere sene etep wom. An yeiwarege emne kobo lam, kiyi namde rasem tuma yenbo an beke wan get. An som abobe.

⁷³ Ere emri warege Abraham erken tuma namde rasen etep wom. An keremri peiktame emne teitkwunte. Teitkwunte, kem temente, kem ari yaku kerete, kem mane akte. An late, kem yenbo temente. Ere Israel tatame nemne etep wom.

⁷⁶ Sekaraia ere etep womke, ere eri yen erne etep wom. Areri yen, yuri ne keryen erne taresin yin eri kelu noub eyarte. Tatame eme nene etep wote. Ere Hevenke tetan God eteri tuma wusoube tame. Eme nene etep wote.