24 Na là mlo, tamlalu i yaanan, na lime bulen klon fanak di lam gumnèla, na manan,
25 “Ani nan i kfagu Dwata tmabeng deg, du tanwean i gamlé deg kyà di dad to.”
26 Na di gnam bulen i tien Ilisabét, lêman dek Dwata i kasaliganan Gabriél salu di Nasarét, satu lunsud glam di banwe Galili.
27 Dekan kenen di satu sawang libun dnagit ku Méri, i bliwal satu bel Harì Dabid dnagit ku Dyosif.
28 Na salu i kasaligan di ku Méri, na manan, “Flehew ge! Too ge kando i Amuito Dwata na kenen i magin ge!”
29 Kabay kaklinge Méri i man i kasaligan, too msamuk nawan, na toon fandam ku tan gumtatek i manan.
30 Na man i kasaligan di kenen, “Nang ge likò Méri, du too ge banlé Dwata kafye,
31 du mbaling ge maltien kadang, na lagi i tingaam, na én dagitam kenen Dyisas.
32 Too kenen mdatah to, na tlo kenen Tingà i Too Mdatah Dwata, na i Amuito Dwata mlé kenen i kagot gutambulan Harì Dabid.
33 Na kenen mebe i dad bel Dyékob kel di landè sen, landè gusen i kagotan.”
34 Kabay man Méri di kasaligan, “Tan i kibògu mngà du sawang libun agu fa?”
35 Na tmimel i kasaligan, manan, “Salu i Mtiu Tulus di ge kadang, na fnean di ge tulus mdà di Too Mdatah Dwata. Na du ani gumdaam mngà taman too mtiu i tingaam, i to landè salà, na én katlo kenen Tingà Dwata.
36 Fandamam i bong yéam Ilisabét. Gal gman laan gngà, bay ani tanam bulen i tienan, balù tatoo kenen tua,
37 du landè sa là gagan Dwata.”
38 Na man Méri, “Agu salig Dwata. Fye ku kel di deg i kdee manam.” Na tnagak kenen i kasaligan.
39 Kafnge én, di là mlo, fatlagad Méri, na gasil mdà salu di satu lunsud di dad bulul déén di Dyudiya.
40 Kakelan déén myak kenen di gumnè Sakaraya, na tlon Ilisabét na lkafan.
41 Kaklinge Ilisabét i talù Méri, lamyak i tingà di lam i tienan, na baling fnò Ilisabét i Mtiu Tulus.
42 Taman falbongan i taluan manan di ku Méri, “Di kdee dad libun, ge i too gumlé Dwata kafye! Na too banlé Dwata kafye i tingà kaltienam!
43 Tan i duen banlé agu kafye du nlauy agu i yê Amugu?
44 Du di kaklingegu i taluam lamyak i tingà di tiengu mdà di klehewan.
45 Too nun kafyem du faglut ge dnohò Dwata i fafgadean di ge.”
46 Na man Méri, “Toogu dnayen i Amugu Dwata mdà di nawagu,
47 na too lehew nawagu Dwata, i To Falwà deg,
48 du gafaldaman agu, balù agu alò satu saligan too mdanà, taman mdà ani, man i kdee dad to agu gumlé Dwata too bong kafye,
49 du mdà di dad malbang mgimò Dwata Too Mtulus di deg. Dnayengu dagitan du too kenen matlu.
50 Fiten i kakdon di kdee dad to nun klikò di kenen, fandà di muna dad to, kel di kdee tugad i bella.
51 Tafiten i ktulusan fagu di kdee mgimoan, na fnisanan i dad to fdatah i ktola.
52 Tafdanaan i dad mdatah harì, na tafdatahan i dad mdanà to.
53 Tafabsolan i dad to bitil fagu di dad fye blén di dale, bay fuléan i dad to bong knun na landè blén dale.
54 Tadnohoan i dad fakangan di gutambulito, du tatnabengan dad saligan, i dad bel Israél, du fye fiten i kakdon.
55 Na là tlag i kakdon ku Abraham na i belan kel di landè gusenan!”
56 Na mnè Méri di saféd Ilisabét mdadong di tlu bulen, na kafnge én, mulê kenen.
57 Na kel i bang ksut tingà Ilisabét, lagi tingaan.
58 Kaklinge i dademen saldan na dad gakedan gablà di bong kakdo fite Dwata di ku Ilisabét, magin ale di klehewan.
59 Di gwalun duh mdà di ksut i tingà, stifun i dad to déén du ftulìla. Na tafanla dnagit i tingà én Sakaraya, du fasngadénla di maan,
60 bay man i yéan, “Ise én, Dyan i dagit kenen!”
61 Na manla di kenen, “Kabay landè gakedyu dnagit salngad én!”
62 Na sminyas ale di maan ku tan i kayean dagit i tingaan.
