Luk 1:23-73

²³Kafnge Sakaraya mimò di Bong Gumnè Dwata mulê kenen.

²⁴Na là mlo, tamlalu i yaanan, na lime bulen klon fanak di lam gumnèla, na manan,

²⁵“Ani nan i kfagu Dwata tmabeng deg, du tanwean i gamlé deg kyà di dad to.”

²⁶Na di gnam bulen i tien Ilisabét, lêman dek Dwata i kasaliganan Gabriél salu di Nasarét, satu lunsud glam di banwe Galili.

²⁷Dekan kenen di satu sawang libun dnagit ku Méri, i bliwal satu bel Harì Dabid dnagit ku Dyosif.

²⁸Na salu i kasaligan di ku Méri, na manan, “Flehew ge! Too ge kando i Amuito Dwata na kenen i magin ge!”

²⁹Kabay kaklinge Méri i man i kasaligan, too msamuk nawan, na toon fandam ku tan gumtatek i manan.

³⁰Na man i kasaligan di kenen, “Nang ge likò Méri, du too ge banlé Dwata kafye,

³¹du mbaling ge maltien kadang, na lagi i tingaam, na én dagitam kenen Dyisas.

³²Too kenen mdatah to, na tlo kenen Tingà i Too Mdatah Dwata, na i Amuito Dwata mlé kenen i kagot gutambulan Harì Dabid.

³³Na kenen mebe i dad bel Dyékob kel di landè sen, landè gusen i kagotan.”

³⁴Kabay man Méri di kasaligan, “Tan i kibògu mngà du sawang libun agu fa?”

³⁵Na tmimel i kasaligan, manan, “Salu i Mtiu Tulus di ge kadang, na fnean di ge tulus mdà di Too Mdatah Dwata. Na du ani gumdaam mngà taman too mtiu i tingaam, i to landè salà, na én katlo kenen Tingà Dwata.

³⁶Fandamam i bong yéam Ilisabét. Gal gman laan gngà, bay ani tanam bulen i tienan, balù tatoo kenen tua,

³⁷du landè sa là gagan Dwata.”

³⁸Na man Méri, “Agu salig Dwata. Fye ku kel di deg i kdee manam.” Na tnagak kenen i kasaligan.

³⁹Kafnge én, di là mlo, fatlagad Méri, na gasil mdà salu di satu lunsud di dad bulul déén di Dyudiya.

⁴⁰Kakelan déén myak kenen di gumnè Sakaraya, na tlon Ilisabét na lkafan.

⁴¹Kaklinge Ilisabét i talù Méri, lamyak i tingà di lam i tienan, na baling fnò Ilisabét i Mtiu Tulus.

⁴²Taman falbongan i taluan manan di ku Méri, “Di kdee dad libun, ge i too gumlé Dwata kafye! Na too banlé Dwata kafye i tingà kaltienam!

⁴³Tan i duen banlé agu kafye du nlauy agu i yê Amugu?

⁴⁴Du di kaklingegu i taluam lamyak i tingà di tiengu mdà di klehewan.

⁴⁵Too nun kafyem du faglut ge dnohò Dwata i fafgadean di ge.”

⁴⁶Na man Méri, “Toogu dnayen i Amugu Dwata mdà di nawagu,

⁴⁷na too lehew nawagu Dwata, i To Falwà deg,

⁴⁸du gafaldaman agu, balù agu alò satu saligan too mdanà, taman mdà ani, man i kdee dad to agu gumlé Dwata too bong kafye,

⁴⁹du mdà di dad malbang mgimò Dwata Too Mtulus di deg. Dnayengu dagitan du too kenen matlu.

⁵⁰Fiten i kakdon di kdee dad to nun klikò di kenen, fandà di muna dad to, kel di kdee tugad i bella.

⁵¹Tafiten i ktulusan fagu di kdee mgimoan, na fnisanan i dad to fdatah i ktola.

⁵²Tafdanaan i dad mdatah harì, na tafdatahan i dad mdanà to.

⁵³Tafabsolan i dad to bitil fagu di dad fye blén di dale, bay fuléan i dad to bong knun na landè blén dale.

⁵⁴Tadnohoan i dad fakangan di gutambulito, du tatnabengan dad saligan, i dad bel Israél, du fye fiten i kakdon.

⁵⁵Na là tlag i kakdon ku Abraham na i belan kel di landè gusenan!”

⁵⁶Na mnè Méri di saféd Ilisabét mdadong di tlu bulen, na kafnge én, mulê kenen.

⁵⁷Na kel i bang ksut tingà Ilisabét, lagi tingaan.

⁵⁸Kaklinge i dademen saldan na dad gakedan gablà di bong kakdo fite Dwata di ku Ilisabét, magin ale di klehewan.

⁵⁹Di gwalun duh mdà di ksut i tingà, stifun i dad to déén du ftulìla. Na tafanla dnagit i tingà én Sakaraya, du fasngadénla di maan,

⁶⁰bay man i yéan, “Ise én, Dyan i dagit kenen!”

⁶¹Na manla di kenen, “Kabay landè gakedyu dnagit salngad én!”

⁶²Na sminyas ale di maan ku tan i kayean dagit i tingaan.

⁶³Taman mni Sakaraya gusmulat, na sulatan, “Dyan i dagitan.” Na too tikeng kdeela.

⁶⁴Na talê gtalù Sakaraya, na flesan dnayen Dwata.

⁶⁵Di kaklinge i kdee dad demela saldan ani too ale likò. Na mbel i santulen ani kel di kdee dad bulul di banwe Dyudiya.

⁶⁶Na kdee dad to mlinge gablà di mgimò ani, toola fandam, na smalek ale, manla, “Tan i kagkah i tingà ani kadang?” Én manla du toola nilè i tulus Dwata mnè di kenen.

⁶⁷Na i mà Dyan, dunan Sakaraya, fnò kenen i Mtiu Tulus, taman talù i ftalù Dwata kenen, manan,

⁶⁸“Dnayenito Amuito Dwata fnangamfù i dad bel Israél, du tasalu kenen di gito dad ton, na banlén ito kagalwà.

⁶⁹Dekan dini di gito i to too mtulus falwà gito, dunan i bel saligan Dabid,

⁷⁰du én sa fakangan di gito fagu di dad tugadan di muna,

⁷¹manan falwaan ito mdà di dad to dmuen gito, na mdà di kagot kdee dad to mnang nawa gito.

⁷²Fite Dwata i kakdon di dad gutambulito, fagu di kdohoan i fakangan di dale.

⁷³Makang kenen di gutambulito Abraham, na manan toon dnohò i fakangan du falwaan ito mdà di dad to dmuen gito, du fye gmagan ito mimò i knayean di landè klikoito,