Luk 1:16-25

¹⁶Na dee kadang bel Israél neben samfulê di kafaglutla di Amu, dunan i Dwata fnangamfù dad tbulla.

¹⁷Na kenen i dek muna di Amu fan kel, na too nun gnagan blé i Tulus Dwata kenen, salngad i gablé di ku Ilaydya, i tugad Dwata di muna fa. Na én nimoan, snafyen i dad smà na sngà. Na i dad to là mimen Dwata neben di fye fandam salngad i dad to matlu, du fatlagadan i dad to di kakel i Amula.”

¹⁸Na smalek Sakaraya, manan, “Tan i gugmadègu na glut i manam, du tatua agu nan, na tatua yaangu?”

¹⁹Na tmimel i kasaligan, manan, “Agu Gabriél, i salig Dwata gal tadag di kanfen, na dekan agu dini du fgadè ge i fye tulen ani.

²⁰Kabay du là ge faglut i mangu, mdà ani mbaling ge umu. Silang ge gtalù ku takel i bang kagdohò i gmangu gine.”

²¹Na i dad to di lwà fatan ku Sakaraya, tikeng ale du too kenen mlo déén di lam i Bong Gumnè Dwata.

²²Di kalwaan talaan gtalù di dale, taman gadèla nun fite Dwata kenen di lam i Bong Gumnè Dwata. Na sminyas kenen bay laan gtalù.

²³Kafnge Sakaraya mimò di Bong Gumnè Dwata mulê kenen.

²⁴Na là mlo, tamlalu i yaanan, na lime bulen klon fanak di lam gumnèla, na manan,

²⁵“Ani nan i kfagu Dwata tmabeng deg, du tanwean i gamlé deg kyà di dad to.”