Luk 19:34-43

³⁴Dia keles la mang, “A Leklek i mang suri.”

³⁵Pa dia ben tar a barman a dongki tetek e Iesu, pa dia los sen naur a saket, pa dia suah i saot na palai a dongki pa dia akes tar e Iesu saot onoi.

³⁶Ning i han amon, dingla na tarai la los sen anunla na saket pa la sagen tari ting na ngas.

³⁷Ning i ka milau ana tinan purum ana Mangir Oliw, a tnan gasgas i los a tarai a asasaerla rop pa la rakan aleklek pas e God ana tnan elngenla ana ututnala na kulkulan ning la ka oroi pa la kukuk mang,

³⁸“A king ning i hanot ana risan a Leklek i angis! A bal molmol usaot na langit, pa a matatar usaot tetek e God!”

³⁹Dingla na Parisaio ting na kunum a tarai la atongi mang, “Tene Asaer, ur sairas anuma tarai a asasaer.”

⁴⁰Pa e Iesu i keles la mang, “A atongi ta mulo, ning a taraila ne bel lar rakan aleklek, a hatatla ot lar kukuk.”

⁴¹Ning e Iesu i milau e Jerusalem pa i oroi i, i tangis ono, pa i atongi,

⁴²“A mang sur mulo ka tasman a ngas ning ir topas a bal molmol onone. Ika i mumun kusun mulo!

⁴³Ta pukakiar ir hanot, pa anumulo na hirua lar tur talilis anumulo a hanua, lar atur a woroh talilis alar mulo, lar tur alar anumulo na ngas a kaskas pa purpurum, pa lar um mulo kusun a risrisnala.