30 “Mur in nan sur a tamon kusa numugu tamur. Ra mur in nanpat, mur in tama ara barman na dongki kura di sa ker ukai tari, ma katutaio utmakai i kas taru uni. Mur in palos pasi ma mur in beni urin.
31 Ra taio in ting mur lena, ‘Mur palosi sur asau?’ mur in watungi tano lena, ‘A Labino i nemi.’”
32 Der wan ra der pastorom a kum utna rop ra o Iesu i sa watung tari tander.
33 Ra der palos pas a barman na dongki, det ra anundet a dongki, det ting der lena, “Ai, mur palos a barman na dongki ra sur asau?”
34 Der balu det lena, “A Labino i nemi.”
35 Der beni torom o Iesu, ma der rakon ru anunder aru saket, ma der ubek tari netes una barman na dongki ma der ukis tar o Iesu netes uni.
36 Ra i wan nanan, ara taro det rakon ru anundet a kum saket, ma det talaso i una kisapi.
37 Ra i sa milau una kisapi ra i wan pirso una Tangai na Oliw, a labino gasgas i los a taro na ususer rop ma det watung ulabo pas o God una kum utna na ukisin ra det sa tama i. Det watung ulabo pasi nama labino walngandet lena,
38 “A king ra i wanpat nama risan a Labino i dan! A malmal sapat netes una langit, ma a minamar sapat netes sakit!”
39 A ramano kum Parisi epotor una kunur na taro ra, det watungi lena, “Tene Ususer, un turbat anum a taro na ususer.”
40 Ra o Iesu i balu det lena, “A watungi tamot, ra a taro ri ka det in ugaia, a kum watat ut det in kukukuk.”
41 Ra o Iesu i sa milau o Jerusalem ra i tama i, i tangis suri, ra i watungi lena,
