9 Ra in wu una kilalo sapat, in wakak. Ra awu, un tau ru i mo.’”
10 Un ara Bung na Sabat o Iesu i ususer a taro un ara rumu na lotu.
11 Ara ino kura iai, a laulau na nion kura uni. In surunu i tulukun a noino ma tiwal na kilalo, ma ke tur tokodos lar pas.
12 O Iesu i tama i, ma i watungi toromi lena, “Le, u sa langolango gusun anum a misait.”
13 Ra o Iesu i ubek tar aru lamano sapat netes uni, uniutra i tur tokodos mut, ra i watung ulabo pas o God.
14 A mugumugu tagun a rumu na lotu i kankan, uni o Iesu i ulangolango pas a ino ra una Bung na Sabat. Ra i watungi tan a taro lena, “A wonom na bung kura sur din papam. Mot in nan urin una kum bung ra, sur din ulangolango pas mot, ma una Bung na Sabat gong.”
15 A Labino i balu i lena, “Mot a kum tene torotoro! Mot rop arara, mot ser palos ru anumot a kum bulumakau ma a kum dongki gusun anundet a kum rumu, ra mot ben pirso det una Bung na Sabat sur det in inum.
16 A ino ri, tagun a kabotaro anun o Abaram, o Satan i kerker tari a noino ma tiwal na kilalo. Ilai ra ka din palos a kineker ri gusuni una Bung na Sabat?”
17 Ra i sa watung tari lenri tandet, det rop ra det pukus a pinapam anun o Iesu, det maimai, ikut a kunur na taro det gas una kum wakak na utna ra o Iesu i pami.
18 O Iesu i iting lena, “A matanitu anun o God i elar nama sau? Asau an elaro i nami?
19 I elar namin pitino mastad, ra ara musano i los pasi, ma i marut tari una nun a kinobot. I lubung, ra in nanai ino i labo pat, ma a kum piko det ser pam pios una kum kanokano.”
20 O Iesu i iting melet lena, “Asau kai an elaro a matanitu anun o God nami?
21 I elar nama is ra ara ino i rakon pasi ma i pam tomo tari nama labino palawa, ra a palawa rop i mubus nami.”
22 Ra o Iesu i wan nanan usapat o Jerusalem, i ususer a taro una kum lamlabino tamon ma una kum natnat na tamon.
23 Ara i ting o Iesu lena, “Labino, pepetlai, a pak na taro kut din ulaun pas det?” Ra i watungi tandet lena,
24 “Mot in dekdek sur mot in ruk una nat na matansako lik, uni a susut na taro det in lari sur det in ruk uni, ikut ka det in pet lar pasi.
25 A taman a rumu in tur ra in tagar bat a matansako, ma mot in tur nago upiso, mot in pinpidik ma mot in watungi lena, ‘Labino, un papos pas met.’ In watungi kut tamot lena, ‘Ka tasman mot ma tagai mot.’
26 Numur mot in watungi tano lena, ‘Met ser wangon ma met ser inum tomo nam ui, ma u ser towo met una numet a kum nubual na inawan tomo.’
27 Ikut in balu mot lena, ‘Ka tasman mot ma tagai mot. Mot a kum tene sakino, mot in nan gisen gusun iau.’
28 Ra mot in tama o Abaram, o Aisak ma o Jekop ma a kum poropet rop una matanitu anun o God, mot in tangtangis, ma mot in ungingit lokomot iai. Ikut din lu pirso ru mot.
