1 Una bung ra, ara taro det inanos o Iesu un ara taro Galili ra a kum tene inaim anun o Pailat det um doko det, ra kura ut det tun a etabor torom o God.
2 O Iesu i balu det lena, “Pepetlai, mot nuki lena, det a kum tene sakino doko taun a taro Galili rop, uni det iru lenra?
3 Awu! Ikut an inanos mot, ra ka mot in nukpukus gusun anumot a kum sakino petutna, mot kai mot in iru rop.
4 “Ma asau mo mot nuki una noino ma tiwal na taro sapat o Jerusalem ra a rumu lekeleke tiro o Siloam i toropo ma i um doko rop ru det? Pepetlai, det a kum tene sakino doko taun det rop ra det kis sapat o Jerusalem?
5 Awu! Ikut an inanos mot, ra ka mot in nukpukus gusun anumot a kum sakino petutna, mot kai mot in iru rop.”
6 Numur o Iesu i watung a wasiso elelar ri torom det, “Ara musano anunu in nanai na fig i tur epotor una ana kinobot na wain. I wan ra i tamtama sur lako wino, ikut kalako wino.
7 Numur i inanos a tene tamtamabat tagun a kinobot ra lena, ‘Una tulu kilalo ri a tamtama sur lako win in nanai na fig ri ma kalako. Un tau ru i! Uni i urop a inangon tagun a piso.’
8 Ikut a tene tamtamabat ra i balu i lena, ‘Labino, un madek tari munung ara kilalo melet ri, sur an kil talilis in kibino, ma an ubek a wakak na piso uni.
9 Ra in wu una kilalo sapat, in wakak. Ra awu, un tau ru i mo.’”
10 Un ara Bung na Sabat o Iesu i ususer a taro un ara rumu na lotu.
11 Ara ino kura iai, a laulau na nion kura uni. In surunu i tulukun a noino ma tiwal na kilalo, ma ke tur tokodos lar pas.
12 O Iesu i tama i, ma i watungi toromi lena, “Le, u sa langolango gusun anum a misait.”
