Lucas 8:9-32 in San Blas Kuna

⁹ Geb degi, e-sapingan Jesúsʼse egichialid: —Ibmar burbar be anmarga sogsadi, ¿wede be, ibu obarsunna?

¹⁰ Jesús na e-sapinganga sogded: —Ar bemargardi, Bab-Dummad-e-negdakmaid-igar-burbar-mamaid osanalegoye maid. Dulemar-baigangardi, ega burbar soglegoed: ‘Adi, dulemar ise-dakar imakmar-inigwele, mer mag dakmalaga, degi, ise-itogar-imakmar-inigwele, mer mag itomalagar.’

¹¹ ”Ar emi burbar an bemarga sogsadi, weyobdo: Ibmar-gwag, Bab-Dummad-gayaburbad.

¹² ”Ibmar-gwag-igargi-babatismaladi, we Bab-Dummad-gayaburba-sunmaked-e-wilubganad. Nia-saila sorba nonigu, dulemar-gwagegi Bab-Dummad-gayaburba-nagusad ei osulononikid, adi, mer Bab-Dummadba damalaga, mer isguedgi abonolemalagar.

¹³ ”Ar akwagi-babatismaladdi, Bab-Dummad-gayaburba itosmargu, nue-weligwar abingasmalad. Ar wemar unnila asginbi Bab-abingasmarsoggu, ibmar-gwag-digaled-maligan-askinnegwadyobdo. Degisoggu, ichee wis Bab-Dummadba nanasmalad, ibagan-bulegan ega nonigu, Bab-Dummadgi bangudmalad.

¹⁴ ”Ar iko-imbaba-babatismaladdi, we-dulemar Bab-Dummad-gayaburba abingasmalando. Ar undargusgu, we-napneggi-ibmar-nanaidse, degi, manise, degi, we-napneggi-unnila-yeer-itodiguedse, binsaed-galedmalad. Amar ibmar-gwag-gwen-sanmaksasulidyob gunonikid.

¹⁵ ”Ar napa-nuedgi-babatismaladdi, wemardi, Bab-Dummad-gayaburba-itosad nue abingasmalad. Gwage-nuedgi, gwage-napiragwadgi, gwen-galakussuli Bab-Dummad-gayaburbaba nanasmalad. Degisoggu, amar ibmar-gwag-nue-sanmaksamaladyob gunonikid.”

¹⁶ Jesús sogdebar: “Dule gwallu ogasale, gwen ulu-yaba sisulid, degi, e-gabed-urba siega amba gwen imakdisurbalid. Dule gwallu ogasale, niba gwallu-siedgi osidaed, adi, dulemar dognonikir, gwallu-meegwad mag dakegar.

¹⁷ Debayobi ibmar bipisaale dukusulid. Be-ibmar-saed bela wisgulegedsegad. Amba be dukuar ibmar-saoen-inigwele, bela dulemar wisguedsegad, bela negache noedsegad.

¹⁸ ”Degisoggu, nue be binsaergebed. Ar dule-ibmar-nikadga bur bule ega gatik ibmar uklegoed, ar degine, dule-ibmar-satele, amba ibmar-nikuo-itogedi e-annik sulegoed.”

¹⁹ Jesús dulemar-odurdaksigu, geb degi, e-nan, degine, Jesús-urbamar, Jesúsʼse nonimalad. Ar dulemar bukidarsoggu, geg Jesúsʼse warmak guarmalad.

²⁰ Jesús-owisosmarsunnad, ega sognonimalad: —Be-nan, degi, be-urbamar magaba gwismalad, be-dakbimalad.

²¹ Jesús, abin-imakdegu, sogded: —Dule-Bab-Dummad-gayaburba-itomalad, degi, ebadamalad, a an-nanad, degine, amar an-urbamalad.

²² Ibagwengi, Jesús na e-sapinganmala urgi nakwisgu, amarga sogded: —Mata-dummad-obakar namargwelo. Geb degi, nadmarsunnad.

²³ Urgi nadapmargu, Jesús gabided. Geb degi, egi mataba burwa-dummad noalid. Ur, dii-ena nagusad. Degidbali, ur doged gualid.

²⁴ Geb degi, e-sapingan Jesúsʼse nonimargu, Jesús-odaksamalad, ega sogdemalad: —¡Odurdaked-saila, anmar-ur dogmai, anmar bela! Jesús ataksagu, burwaga, degi, demarga binnasur sogded: “Be bogidik sae.” Geb degi, burwa boo naded, neg swilidik sigisad.

²⁵ Jesús e-sapinganga sogded: —¿Ar ibiga be Bab-Dummad-bengusmala? E-sapingan dobe itodmalad, degine, geger dakdemarbalid. Na muchub-muchub sogdemalad: “¿Wede, doa-dulesunna? Burwa, degi, demarse-bakar, eba ibsaed.”

²⁶ Geb degi, Jesús na e-sapinganmala Gadara-dulemar-bukwadse modapmalad. A-negde, Galilea-mata-obakar naid.

²⁷ Jesús urgi-aidesgu, dule-wargwen dule-nia-dikasurgus-nikad, Gadara-neggweburgined, ese nonikid. A-dule mor-yoisur gudidaed, degine, neggi gabsurbalid, neg-uan-yaba gabdidaed.

²⁸ We-dule Jesús-dakargu, binnasur gormakded. Jesús-asabin yokorgi sindigar sigisad, sogded: —Jesús, Bab-Dummad-Bur-Birigined-Machi, ¿ibiga be anse achadaniki? ¡Melle be mesagwar an-imako!

²⁹ Ar Jesús niaburbaga sogsad, “dulegi-maid be noe.” Dakargu, dikasurgusa dulegi niaburba maid. Ar esgoro-dubgi a-dule-mali, degi, e-argan edindamar-inigwele, degite, iidi esgoro-imakdaed. Degine, nega-dulesulidganba, nia, dule-sesdaed.

³⁰ Jesús, a-dulese egichiarsun: —¿Igi be nuga? Dule, abin-sogded: —Ichesulidye an nuga. Ar ade, niamar-bukidar egi maid.

³¹ Niamar Jesúsʼgi wilenai gusad, melle niamar-wilegoed-galuse e-barmidye.

³² Deun, sinmar-bukidar yargi mas mananai gusad. Niamar Jesúsʼgi wilenai gusad, sinmargi e-odoye. Jesús amarga sogded, nabirye, ase be dognamarye.

⁹ Geb degi e-sapingan Jesússe egichialid: —¿Wede be ibu obarsunna, we-ibmar burbar be anmarga sogsad?

¹⁰ Jesús na e-sapinganga sogded: “Ar bemargardi Bab-Dummad-neg-dakmaid-igar-burbar-mamaid osanalegoye maid, dulemar-baigangardi ega burbar soglegoed: Adi amba dakmar-inigwele, aku dakmalagar, ar itomar-inigwele, aku itomalagar.

¹¹ “Ar emi burbar an bemarga sogsadi, weyobdo: Ibmar-gwag, Bab-Dummad-gaya-burbad.

¹² “Ibmar-gwag-igargi-babatismaladi, we Bab-Dummad-gaya-burba-sunmaked-e-wilubganad. Nia-saila sorba nonigu, dulemar-gwagegi Bab-Dummad-gaya-burba-nagusad ei osulononikid, adi mer Bab Dummadba damalagar, mer iskuedgi abonolemalagar.

¹³ “Ar akwagi-babatismaladdi Bab-Dummad-gaya-burba itosmargu, nue-weligwar abingasmalad. Ar wemar unnila askinbi Bab-abingasmarsoggu, ibmar-gwag-digaled maligan-askinnegwadyobdo. Degisoggu, ichee wis Bab Dummadba nanasmalad, ibagan-bulegan ega nonigu, Bab Dummadgi bangudmalad.

¹⁴ “Ar iko-imbaba-babatismaladdi, we-dulemar Bab-Dummad-gaya-burba abingasmalando, ar undargusgu, we-napneggi-ibmar-nanaid, degi, maniginbi, degi, we-napneggi unnila yeer-itodiguedse binsaed-galedmarsoggu, amar ibmar-gwag-gwen-sanmaksasulidyob gunonisundo.

¹⁵ “Ar napa-nuedgi-babatismaladdi, wemardi, Bab-Dummad-gaya-burba-itosad nue abingasmalad, gwage-nuedgi, gwage-napiragwadgi, gwen galakussuli Bab-Dummad-gaya-burbaba nanasmalad. Degisoggu, amar ibmar-gwag-nue-sanmaksamaladyob gunonisundo.”

¹⁶ Jesús sogdebar: “Dule gwallu ogasale, gwen ulu-yaba siosulid, degi, e-gabed-urba amba siega gwen imakdisurbalid. Dule gwallu ogasale, niba gwallu-siedgi sii-daed, adi dulemar dognonikir, gwallu-meegwad mag dakegar.

¹⁷ Debayobi ibmar-bipisaale dukuosurguodo. Be-ibmar-saed bela wisgulegedsegad. Amba be dukuar ibmar saoen-inigwele, bela dulemar wisguedsegad, bela negache nononikoed.

¹⁸ “Degisoggu, nue be binsaer-gebed, igi be Bab-Dummad-itobie. Ar dule-ibmar-nikadga bur-bule ega gatik ibmar uklegoed, ar degine, dule-ibmar-satele, amba ibmar-nikuo-itogedi e-annik sulegoed.”

¹⁹ Jesús dulemar-odurdaksigu, geb degi e-nan, degine, Jesús-urbamar, Jesússe nonimalad. Ar dulemar bukidarsoggu, geg Jesússe warmak-guarmalad.

²⁰ Jesús-owisosmarsunnad, ega sognonimalad: —Be-nan, degine, be-urbamar magaba gwismalad, be-dakbimalad.

²¹ Jesús, abin-imakdegu, sogded: —Dule-Bab-Dummad-gaya-burba-itomalad, degi, eba-damalad, a an-nanad, degine, amar an-urbamalad.

²² Ibagwengi, Jesús na e-sapinganmala urgi nakwisgu, amarga sogded: —Mata-dummad-obakar namargwelo. Geb degi nadmarsunnad.

²³ Urgi nadapmargu, Jesús gabided. Geb degi egi mataba burwa-dummad noalid. Ur, dii-ena nagusad, degisoggu, ur-doged gualid.

²⁴ Geb degi e-sapingan Jesússe nonimargu, Jesús-odaksamalad, ega sogdemalad: —¡Odurdaked-saila, anmar-ur dogmaid, anmar bergumaloed! Jesús ataksagu, burwaga, degi, demarga binnasur sogded, be bogidik saye. Geb degi burba bogidik nadsunnad, neg swilidik sigissunnad.

²⁵ Jesús e-sapinganga sogded: —¿Ar ibiga be Bab-Dummad-bengunonimala? E-sapingan dobe itonadmalad, degine, geger dakdemarbalid, na ega muchub-muchub sogdemalad: —¿Wede doa-dule-sunna, burwase, degi, demarse-bakar, eba ibsamargu?

²⁶ Geb degi Jesús na e-sapinganmala Gadara-dulemar-bukwadse modapmalad. A-negde Galilea-mata-obakar naid.

²⁷ Jesús napase aidesgu, dule-wargwen Gadara-neggweburgined ese nonikid, dule-nia-dikasurgus-nikad. A-dule mor-yoisur gudii-daed, degine, neggi gabsurbalid, neg-uan-yaba gabdii-daed.

²⁸ We-dule Jesús-dakargu, binnasur gormakdegu, Jesús-asabin yokorgi sindigar sigisgu, sogded: —Jesús, Bab-Bur-Dummad-Machi, ¿Ibiga be anse achadaniki? Napira Bab-Dummad-nuggi an bega soged: ¡Mer ise-mesagwar be an-imako!

²⁹ Ar ade Jesús niaburba-dulegi-maidga soged: “Dulegi-be-maid, be nodaye.” Dakargu, a-dulegi niaburba-dikasurgus-maid. A-dule eskoro-dubgi, mali, degi, argan edin-damar-inigwele, dule eskoro-itir-daed, degine, nia nega-dule-sulidganba dule-ses-daed.

³⁰ Ase Jesús egichiarsun: —¿Igi be nuga? Dule, abin-sogded: —Ichesulidye an nuga. Ar ade niamar-bukidar egi maid.

³¹ Niamar Jesúsgi wilenagusad, melle niamar-galu-wilegoedse e-barmidmarye.

³² Deun sinmar-bukidar yargi mas mananai-gusad. Niamar Jesúsgi wilenagusad, sinmargi an-odoye. Jesús amarga sogded, nabirye, ase be dognamarye.