Lucas 8:30-54 in San Blas Kuna

³⁰ Jesús, a-dulese egichiarsun: —¿Igi be nuga? Dule, abin-sogded: —Ichesulidye an nuga. Ar ade, niamar-bukidar egi maid.

³¹ Niamar Jesúsʼgi wilenai gusad, melle niamar-wilegoed-galuse e-barmidye.

³² Deun, sinmar-bukidar yargi mas mananai gusad. Niamar Jesúsʼgi wilenai gusad, sinmargi e-odoye. Jesús amarga sogded, nabirye, ase be dognamarye.

³³ Niamar, dulegi ainidgu, sinmarse ubodapid. Sinmar yar-weregedgi babatidgu, matase babatidapid. Agi bela gundoledapmalad.

³⁴ Ar sinmar-edarbemalad sin-gundilesad-daksamargu, duurmakdemalad, neg-igarba-bukmaladga, degine, neggweburgi, sinmar-gusad sogdapmalad.

³⁵ Degi, dulemar neggusad-dakega ainiarmalad. Jesúsʼse nonimargu, daknonimalad, dule-nia-nika-gudigusadi Jesús-naba nue mor-yoi sii, nue-nugus sii. Dulemar deyob dakarmargu, dobee itodmalad.

³⁶ Ar dulemar-dule-nugusad-daksamaladi, dulemar-nonimaladga sogdemalad, dule-nia-nika-gudigusadi igi nugusa.

³⁷ Geb degi, bela dulemar Gadara-yar-dikarbarmalad, bela dobee itodmargu, Jesús e-yargi-noega, egi wilenaigusmalad. Degi, Jesús urgi-nakwisgu, gannar nadsunnad.

³⁸ Dule-nia-nika-gusadi, Jesús-e-sedega, Jesúsʼgi wilenaigusad. Ar Jesús egi bangusokargua, ega sogded:

³⁹ “Be-negse be nae, be sogna, ibibayobi Bab-Dummad nue-wile be-daksa.” Dule nadgua, bela neggweburgi sunmakdii gualid, igi Jesús ega ibmar-dummagan imaksa.

⁴⁰ Jesús gannar Capernaúm-neggweburse nonigu, dulemar-bukidaradi weligwar Jesús-abingasmalad, ar ade, bela Jesús-edarbedimalad.

⁴¹ Geb degi, machered-wargwen, Jairoʼye-nugadi Jesúsʼse nonikid. Jesús-mali-naba sindigar yokorgi signonikid. E-negse naega, Jesúsʼgi wilenaigusad. Jairoʼde, Judíoʼmar-onmakedneggi dule-dummadga gudiid.

⁴² Dakargu, Jairo unnila bunolo-wargwenna nikad, birgambe-gakabo nikad (12). A-bunolode, burgwedani maid. Jesús, Jairo-negse nadapgu, dulemar-bukidara, ali-ali Jesúsʼgi yolenanai gualid.

⁴³ Dulemar-bukidarad-abargi ome-gwensak birgambe-gakabogus (12) boni-nalur-nika-gudiidi, gudimogad. A-ome, bela mani-nikadi inadurgangi ollomaksad, ar degite, gwen nudaklessulid.

⁴⁴ A-ome, Jesús-yarganba nonikid, ei-morduku ebunonikid. Ome, Jesús-morduku ebusgu, boni-nalur-nika-gudiid yog-galegar naded, yog-nuguar gusad.

⁴⁵ Geb degi, Jesús sogded: —¿Wede doa an-ebusa? Bela sulidbiye ega sogmalad. Pedro, degi, e-walik-bukmalad, Jesúsʼga sogdemalad: —Odurdaked-saila, dulemar-bukidar ali-ali be-barmesnana-naded, degite, be sogde: ‘Wede, ¿doa an-ebusye?’

⁴⁶ Ar Jesús, abin-imakdegu, sogded: —Dule-an-ebusad mag an itoged. Ar angi an-gangued node an itosad.

⁴⁷ Degi, ome dakdegu, ibmar-gusadi gwen dukuar gussuli, ise-wawanmakar Jesúsʼse nonikid, e-mali-naba yokorgi sindigar signonikid. Bela-dulemar-bukwad-abargi sognonikid, ede, ibiga Jesús-morduku ebusye, degine, ede, Jesús-morduku-ebusgu, yog-nuguar nadye sognonikid.

⁴⁸ Jesús omega sogded: —Omegwa, be nue an-bengussursoggu, be nugussun. Gwage-bogidikidgi be-negse be nasun.

⁴⁹ Amba Jesús omega sunmakgwichi, dule-wargwen, Jairo-neggi-danikid, Jairoʼga sognonikid: —Be-bunolo bato burgwisye, mer bar odurdaked-sailagi bega be-bunolo-nudakega bar wileye.

⁵⁰ Jesús deyob dule-soge itosgu, Jairoʼga sogded: —Melle be dobgu. Unnila melle be bengu, be-bunolo nuguoed.

⁵¹ Jesús, Jairo-negse dogdapgu, dulemar eba gwen doged imaksasulid, unnila, Pedro, Jacobo, Juan, degi, bunolo-e-bab, degine, bunolo-e-nan, amarbi eba dogsamalad.

⁵² Jesús modapgu, dakdapid bela bobukmala, degi, binnasur ise-wilegar bunologa bonanai. Jesús amarga sogded: —Mer bomar, bunolo burgwar-maisuli, unnila gabmai.

⁵³ Bela-dulemar-bukmalad Jesúsʼgi dodoarmalad, ar ade, wismalad we-bunolo burgwar mai.

⁵⁴ Ar Jesúsʼdi, bunolo-argangi-gasgua, binnasur sogded: —Bunolo, be gwisgu.

³⁰ Ase Jesús egichiarsun: —¿Igi be nuga? Dule, abin-sogded: —Ichesulidye an nuga. Ar ade niamar-bukidar egi maid.

³¹ Niamar Jesúsgi wilenagusad, melle niamar-galu-wilegoedse e-barmidmarye.

³² Deun sinmar-bukidar yargi mas mananai-gusad. Niamar Jesúsgi wilenagusad, sinmargi an-odoye. Jesús amarga sogded, nabirye, ase be dognamarye.

³³ Niamar, dulegi ainidgu, sinmarse ubodapid. Sinmar yar-weregedgi batidgu, matase batidapid. Agi bela gundoledapmalad.

³⁴ Ar sinmar-edarbemalad sin-gundolesad daksamargu, duurmakdemalad, neg-igarba-bukmaladga, degine, neggweburgi, sogdapmalad, igi sinmar gusad.

³⁵ Degi dulemar ainiarmalad neg-gusad dakegar. Jesússe nonimargu, daknonimalad, dule-nia-nika-gudigusadi Jesús-naba nue mor-yoi sii, nue-nugus sii. Dulemar deyob dakarmargu, dobee itodmalad.

³⁶ Ar dulemar-dule-nugusad-daksamalad, dulemar-nonimaladga sogdemalad, dule-nia-nika-gudigusadi igi nugusa.

³⁷ Geb degi bela dulemar Gadara-yar-dikarbarmalad Jesúsgi wilenagusmalad, adi e-yargi e-idu naegar, ar ade bela dobee-ito nadmalad. Degi Jesús urgi nakwisgu, gannar arsunnad.

³⁸ Dule-nia-nika-gusad, Jesúsgi wilenagusad, e-sedegar. Ar Jesús egi bangudgua, ega sogded:

³⁹ —Be-negse be nae, be sogna, ibibayobi Bab Dummad nue-wile be-daksa. Dule nadgua, bela neggweburgi sunmakdigualid, igi Jesús ega ibmar-dummagan imaksad.

⁴⁰ Jesús gannar Capernaumse nonigu, dulemar-bukidarad ber weligwar Jesús-abingasmalad, ar ade bela Jesús-edarbedimalad.

⁴¹ Geb degi machered-wargwen, Judiomar-onmaked-neggi-dummadid, Jairoye-nugad, Jesússe nonikid, Jesús-mali-naba sindigar yokorgi signonikid. A-dule Jesúsgi wilenagusad, e-negse naegar.

⁴² Dakargu, Jairo unnila bunolo-wargwen nikad, birga-ambe-gakabo sergued. A-bunolode burgwedani maid. Jesús, Jairo-negse nadapgu, dulemar-bukidarad, ali-ali Jesúsgi yolenanai-gualid.

⁴³ Dulemar-bukidarad-abargi ome-gwensak birga-ambe-gakabogus boni-nalur-nika-gudiid, gudimogad. A-ome na bela mani-nikad ina-duledgangi ollomaksad, ar degite gwen nudaklessulid.

⁴⁴ A-ome Jesús-yarganba nonikid, ei-mor-duku ebunonikid. Ome Jesús-mor-duku ebusgu, nalur-gudiiddi yog dinguar naded, yog nugudgu.

⁴⁵ Geb degi Jesús sogded: —¿Wede doa an-ebusa? Bela sulidbiye ega sogmargu, Pedro, degi, e-walik-bukmalad, Jesúsga sogdemalad: —Odurdaked-saila, dulemar-bukidar ali-ali be-barmesnana-naded, degite, be sogde: ‘¿Wede doa an-ebusa?’

⁴⁶ Ar Jesús, abin-imakdegu, sogded: —Dule an-ebusad, ar an mag-itoged, angi an-gangued noded dule-nudakegar.

⁴⁷ Degi, ome dakdegu, ibmar-imaksad gwen dukuar gussuli, ise-wawanmakar Jesússe nonikid, e-mali-naba yokorgi sindigar signonikid. Bela-dulemar-bukwad-abargi ome sogded, ibigarsunna Jesús-mor-duku ebunoniki. Ede, Jesús-mor-duku ebusgu, yog nuguar nadye.

⁴⁸ Jesús omega sogded: —Omegwa, be nue an-bengussursoggu, be nugussun. Be gwage-bogidikidgi be-negse be nasun.

⁴⁹ Amba Jesús omega sunmakgwichi, dule-wargwen, Jairo-neggi danikid, Jairoga sognonikid: —Be-bunolo bato burgwis, mer be odurdaked-sailagi bar wilege bega be-bunolo-nudakegar.

⁵⁰ Jesús deyob dule-soge itosgu, Jairoga sogded: —Mer be dobgu. Unnila mer be bengu, be-bunolo nuguoed.

⁵¹ Jesús, Jairo-negse dogdapgu, dulemar eba gwen doged imaksasulid, unnila, Pedro, Santiago, degi, Juan, bunolo-e-bab, degine, bunolo-e-nan, amarbi eba dogsamalad.

⁵² Jesús modapgu, dakdapid bela bobukmala, degi, binnasur ise-wilegar bunologa bonanai. Jesús amarga sogded: —Mer bomar, bunolo burgwar-maisulid, unnila gabmaid.

⁵³ Bela-dulemar-bukmalad Jesúsgi dodoarmalad, ar ade wismalad we-bunolo burgwar maid.

⁵⁴ Ar Jesúsdi, bunolo argangi gasgua, binnasur sogded: —Bunolo, be gwisgu.