24 “Di sikiyu no mgo sapian, hayahay kow iyan kuntoon, di alaot kow su diya to kayugajan, wadad ogkaiman now no kadojawan.
25 Sikiyu no nahantoy kuntoon, alaot kow su diya to kayugajan, kanunoy kow on ogbontason. Sikiyu no ogngisi kuntoon, alaot kow su diya to kayugajan kanunoy kow ogmey-og dow ogtiniyahu.
26 Alaot kow ko sajaan kow to kaotawan, su pigsaja isab to kaaw-apuan dan to mgo otow to diya una no kunungkun kibali mgo ba-ba to Diyus.
27 “Di seini da. Higugmaa to mgo kuntra now. Dedeyjawa to ogdomot iyu.
28 Pangamuju kow to Diyus no kae-atan din to mgo otow no ogpanungajow dow ogyupig iyu.
29 Ko meyduon ogsampalu ikow, ipasampalu isab to dibayuy no pisngi nu. Ko meyduon og-agow to kabo nu, ajaw ogpogongi to pagpudut to mahalon no ilisan nu.
