Lucas 6:1-46 in San Blas Kuna

¹ Ibagwengine, obunnoged-ibagi, Jesús orosgi-dakleged-digaled-abargi-nadapgu, e-sapingan orosgi-dakleged gwane-gwane imaknadapi gusmalad, degine, e-san-onogegala e-argan-abin iir-iir-imaknadapgusmalad, geb gutedamalad.

² Degi, gwen-gwen Fariseoʼmar-Jesúsʼba-nadapmaladi, Jesús-sapinganga sokarmalad: —¿Ar ibiga bemar ibmar-gwag gwane-gwane nadapmala? ¿Obunnoged-ibagi mer arbaoye igar-maisursi? Emide bemar igar-maidgi annanaimalad.

³ Jesús, abin-imakdegu, ega sogded: —An-sapingan igar-maidgi annanaisulid. ¿Ar bemar David-ibmar-imaksad absodisurmarsi? Deun, David, degi, e-sordamar ukumecharmargu, igi imaksamala.

⁴ ”Ar David Bab-Dummadse-goled-negse dognoni gusad, degi, Bab-Dummadga-madu-uklesad guchagusad. Ar David, degi, e-sordamar a-madu gunnedsulinad, ar ade, madu-isedid. ¿Unnila dule-irwa-Babse-gormaladbi we-madu-gunnoye igar-maisursi? Degite, ¿David, degi, e-sordamar igar-noar-imaksar be insae? Suli, ar ukudba nabir madu guchamalad. Degisoggu, an-sapingan nabir imaksamarmodo.”

⁵ Geb degi, Jesús sogdebalid: “Ani Dule-Machi, obunnoged-iba-e-Dummadid.”

⁶ Obunnoged-iba-baidgi, Jesús, Judíoʼmar-onmakednegse dognonigu, emar-odurdaksii gusbalid. Agine, dule-wargwen, sakwa-nuedsik-argan-burgwaled sii gusad.

⁷ Agi Garda-Narmaked-Dulemar, degi, Fariseoʼmar, Jesús-argabukwa-gusmalad, dakega, bule obunnoged-ibagi Jesús dule-nudakodibeye, adi, egi sogmalagar, obunnoged-igar-maidgi annadiiye.

⁸ Ar Jesúsʼdi nue-wisid igi binsabukmala, a-ular dule-argan-burgwaledga sogded: —Dage, neg-abarse be gwisguda. Geb agi neg-abargi dule gwisgunonikid.

⁹ Geb degi, Jesús sogded: —Ibmar-soggwen an bemarse egisbimardo: Obunnoged-ibagi ibmar-nued-imakedi, wede, ¿igar-nuedi? Ibmar-isgana-imakedi, wede, ¿igar-nuedi? ¿Igid bur-nabiri? ¿Dule-oburgwedi? ¿Dule-odurguedi? ¿Igi bemar sogsunna?

¹⁰ Jesús bela dulemar-dikarba-bukmalad-daksagu, dule-argan-burgwaledga sogded: —Be-argan be onak. Dule na e-argan-onakgwidgu, yog-nuguar-naded.

¹¹ Dummagan-bukmalad sae-itodmalad, na sunmakarmalad, igi anmar Jesús-imakmalargebye.

¹² Deun, a-ibagangine, Jesús Bab-Dummadse-golega yarse nade gusad. Agi Bab-Dummadse-gorsii oibosad.

¹³ Oibosgu, eba-nanaimaladse gochad. Agi ambe-gakabo (12), e-sapingan-bur-dummaganga-guega susad. Amar-sulesad, e-sapingan-bur-dummaganye onugsanonikid.

¹⁴ Sulesmaladi, wemalad: Simón, a Jesús, Pedroʼye onugsasbalid, degi, Simón-e-urba-Andrés, Jacobo, Juan, Felipe, Bartolomé,

¹⁵ Mateo, Tomás, Alfeo-machi-Jacobo, Simón, Zeloteʼye-bimarbalid,

¹⁶ Jacobo-e-machi-Judas, degine, Judas-Iscariote, darba-Jesús-uknonikid-dule.

¹⁷ Jesús e-sapingan-ambe-gakabogwadmala (12), e-sordagan-bamaladmala, gulluse aidenonikid. Agi nebagi dulemar-bukidar-bukwamalad. Amar, wemalad: Jesúsʼba-nanaimalad-baigan, Judea-yalaginmalad, Jerusalénʼginmalad, degi, demar-gakaba-bukmalad: Tiro-dorgan, degi, Sidón-dorgan. Amarde, bela Jesús-itogega nonimalad, degi, ega bonigan-osulogega nonimalad.

¹⁸ Agi dulemar niaburbase-nue-wiledigusmalad nudaklesmalad.

¹⁹ Bela dulemar-bukidar Jesús-ebubidamalad, ar ade, e-gangued-nikadba, bela dulemar-onudakdiid.

²⁰ Jesús e-sapingan-dakdegu, sogded: “Bemar-wilemalad, bemargi nued binsalesad, ar Bab-Dummad-e-negdakmaid, bemargadid.

²¹ Bemar-emi-uku-mesdimalad, bemargi nued binsalesad, ar bemar immerbaa itononimaloed. Bemar-emi-bodidimalad, bemargi nued binsalesad, ar bemar allenonimaloed.

²² Ani Dule-Machi, an-nug-ular, dulemar isdar be-dakarmalar, dulemar be-obannarmalar, dulemar be-ichoarmalar, degi, be-nuggi sunmakarmalar be dule-isganamarye, bemargi nued binsalesad.

²³ A-ibagangi, dulemar sabsur-be-imaksadba, be wergumaloed, be weligwar itomaloed, ar nibneggi bemarga ibmar-uklegoedi dummarbagwad. Ar e-babgan bemar-idu amba sabsur Bab-Dummad-gayaburba-barsogmalad-wiosmarmogad.

²⁴ Ar bemar mani-ibgan, ¡duledar-wilesmar! Ar bato bemardi wegi yeer itodimalad.

²⁵ Ar bemar wegi-immedik-itodimalad, ¡duledar-wilesmar! Ar be ukud itononimaloed. Ar bemar emi-alledimalad, ¡duledar-wilesmar! Ar bemar nunmaked itononimaloed, degine, bemar bononimaloed.

²⁶ Ar bemargi bela-dulemar nuedbi sunmakarmalar, ¡be duledar-wilesmar! Ar deyob e-babgan Bab-Dummad-gayaburba-barsogmalad-napiragwadsulid imaksamarmogad.”

²⁷ Jesús sogdebalid: “Ar bemar an-itobukmaladgardi an sogdo: Dule-isdar-be-dakdimalad be sabgumar, dule sae-be-dakmaladga ibmar-nuegan be imakmar.

²⁸ Dulemar-be-ukabsadimaladgi nued be binsamar. Dulemar-be-ogakansadimaladga Bab-Dummadse ega be gormar.

²⁹ ”Ar dule-wargwen wagargi be-bibyosale, wagar-baid ega be oyobalo. Dule mor-suid bei susale, mer be-mor-baid ega be uksuli guo, ega be ukbalo.

³⁰ Ar doa-dule bese ibmar egichialir, ega be uko. Ar dule be-ibe-ibmar susale, mer ese be gannar bar egiso.

³¹ Ar igi-dulemar be-imakbi be abege, deyob dulemar be imakmogoed.

³² ”Ar dulemar-be-sabmaladbi be sabguele, ¿Bab-Dummadgi ibi-nued be amiosunna? Be ibmar-nued amiosuli. Ar dulemar-isgudimalad deyob dule-e-sabmalad sabgumarmogad.

³³ Ar dulemar-ibmar-nued-bega-imakmaladgarbi ibmar-nued be imakmogale, ¿Bab-Dummadgi ibi-nued be amiosunna? Ibnued be amiosuli. Ar dulemar-isgudidimalad amba deyob imakmarmogad.

³⁴ ”Ar unnila dule-gannar-bega-ibmar-ukoedgarbi be ibmar ukele, ¿Bab-Dummadgi ibi-nued be amiosunna? Ibnued be amiosuli. Ar dule-isgudimaladi dule-isgudimaladga ibmar ukdamarmogad, adi, sorba gannar ega ukbaligar.

³⁵ ”Degisoggu, be-isdarmalad be sabgumar, ibmar-nued ega be imakmar. Ibmar-bei-abeged ega be ukmar, mer gannar-bega-ibmar-uked edarbedii be gumalo. Ar bemarga ibmar-uklegoed bur-dummarba gued. Degine, Bab-Dummad-Bur-Birigined-e-mimmiga bemar gunonikoed. Ar Bab-Dummad bela dulemar-sunnasurdamalad, degi, dulemar-isganamar wiledakmaid.

³⁶ Ar igi be-Bab, dulemar-wiledakmaimoga, ayob bemar dulemar-wiledakmarmosundo.”

³⁷ Jesús sogdebar: “Mer yogsaar be sogo, we dule-isganaye, adi, melle Bab-Dummad deyob begi sogmogagar. Mer be sogo, we-dule-sabsur-odurdakye, adi, melle Bab-Dummad sabsur be-odurdakmogagar. Dulemar begi nossuliyob be dako, adi, Bab-Dummad egi nossuliyob bemar-dakmogagar.

³⁸ ”Aimarga ibmar be uko, adi, Bab-Dummad bega ibmar ukmogoed. Bab-Dummad bega ibmar-wilubsaleged-nuedgi, nue-gindilegar, nue-gwamakar, degi, nue-enargwaagwadgi ibmar ukoed. Ar be ibmar wilub-imakedgine, Bab-Dummad bega ibmar wilubsamogoed.”

³⁹ Geb degi, Jesús burbar emarga ibmar sogded: “¿Ar dule-ibyasulid, sunna dule-ibyasulid-idumai guosi? Suli. ¿Ar ebobela yaa-guregedgi argwachasulir be insae? Argwachale.

⁴⁰ ”Dule-ibmar-durdaknaid geg e-sailaba dummad gued. Ar ibmar-durdaknaid obelosardi, sunna e-odurdakedyob gumogodo.”

⁴¹ Jesús burbar sogdebalid: “¿Ar ibiga be-gwenad-ibyagi durgan-maid magarsunna be dake? ¿Ar ibiga be-ibya-yaba-suar-maiddi akusunna be dake?

⁴² ”Ar igi be-gwenadga be sogoe: ‘Be-ibya-yaba-durgan-maid an bega onogweloye.’ ¿Ar be-ibya-yaba suar-maiddina? ¡Bemar yogasaar-darba-sunmakmaladid! Suar be-ibya-yaba-maid-insa be onoge. Geb agi nabir be atakoed. Adi, agi nabir be-gwenad-ibya-yaba-durgan-maid be onogoed.”

⁴³ Jesús sogdebalid: “Sapi nuedile, geg san-isgana nikued, e-sanmaked nued sanmaked. Ar sapi isganale, geg san-nued nikued, e-sanmaked ichakwa sanmaked.

⁴⁴ Ar sapimar war-wargwen na e-sanmakedgi dakleged. Ar higo-san ikogi sanmaksulid, degine, uva-san gwen sapi-ikogangi welesulid.

⁴⁵ ”Anmar-dule amba deyobmodo, dule-nued, na e-gwagegi ibmar-nued-nikadba ibmar-nued onoged. Ar dule-isganadi, na e-gwagegi ibmar-isgana-nikadba ibmar-isgana onomogad. Ar dule-sunmakedi, gwagegi-ibmar-naidba na sunmaked.”

⁴⁶ Jesús sogdebalid: “¿Ibiga be anse, ‘Dummadye, Dummadye,’ gormala? Ar degite an-ibmar-sogedba be dasurmalad.

¹ Ibagwengine, obunnoged-ibagi, Jesús orosgii-dakleged-digaled-abargi nadapgu, e-sapingan ibmar-digaled gwane-gwane imaknadapmala, e-argangi obu-obu imaksamargu, gutemalad.

² Degi Fariseomar-Jesúsba-gwen-gwen-nadapmalad Jesús-sapinganga sogdemalad: —¿Ar ibiga bemar ibmar-gwag gwane-gwane nadapmala? ¿Obunnoged-ibagi mer arbaoye igar-maisursi? Emide bemar igar-maidgi annadimargu.

³ Jesús, abin-imakdegu, sogded: “An-sapingan igar-maidgi annadisulid. ¿Ar wese-bakar bemar absodisurmarsi, igi David imaksa, deun David, degi, e-sordamar ukumecharmargu?

⁴ “A-ibagi David Bab-Dummadse-goled-negse dognoni-gusad, degi, madu-Bab-Dummadga-uklesad gucha-gusad. Ar David, degi, e-sordamar a-madu gunnedsulinad, ar ade madu-isedid. ¿We-madu unnila dule-irwa-Bab-Dummadse-gormaladbi gunnoye igar-maisursi? Degite, ¿David, degi, e-sordamar igar-noar imaksamala? Suli, ar ukudba nabir madu guchamalad. Degisoggu, an-sapingan nabir imaksamarmodo.”

⁵ Geb degi Jesús sogdebalid: “Ani Dule-Machi, obunnoged-iba-e-Dummadid.”

⁶ Ibagwengi obunnoged-ibagi gunonibalid, deun Jesús Judiomar-onmaked-negse dognonigu, emar-odurdaksigusad. Agine, dule-wargwen, argan-nuedsik-burgwaled sii-gusmogad.

⁷ Agi escribamar, degi, Fariseomar, Jesús-argabukwa-gusmalad, dakega, bule obunnoged-ibagi Jesús dule-nudako-dibeye, adi egi sogmalagar, obunnoged-igar-maidgi annadiiye.

⁸ Ar Jesúsdi nue-wisid igi binsabukmala, a-ular dule-argan-burgwaledga sogded: —Dage, abarse be gwisguda. Agi neg-abargi dule gwisgunonisunnad.

⁹ Geb degi Jesús sogded: —Ibmar-soggwen an bemarse egisbimardo: ¿Wede igar-nuedi obunnoged-ibagi ibmar-nued-imaked, igi, ibmar-iskana-imaked? ¿Igid bur-nabiri, dule-odurgued, igi, dule-oburgwed? ¿Igi bemar sogsunna? Dule-gwensaksaar abin-imaksasulid, bela boo ambikusmalad.

¹⁰ Jesús bela dulemar-dikarba-bukmalad-daksagu, dule-argan-burgwaledga sogded: —Be-argan be onak. Dule e-argan onakwidgu, yog nuguar naded.

¹¹ Dummagan-bukmalad sae-itodmalad, na sunmakarmalad igi anmar Jesús-imakmalar-gebye.

¹² Deun a-ibagangine, Jesús yarse nade-gusad, Bab Dummadse golegar. Agi oibosad, Bab Dummadse gorsii.

¹³ Oibosgu, eba-nanaimaladse gochad. Agi ambe-gakabo susad, e-sapinganga guegar. Amar-sulesad-onugsanonibalid, Jesús-nuggi-barmilearmaladye.

¹⁴ Sulesmalad wemardo: Simón, a Pedroye Jesús onugsasbalid, agine Andrés, Simón-e-urba, degine, Santiago, Juan, Felipe, Bartolomé,

¹⁵ Mateo, Tomás, Santiago, Alfeo-machi Simón, Zeloteye-bimarbalid,

¹⁶ Judas, Santiago-e-gwenad, degi, Judas-Iscariote, darba-Jesús-uknonikid-dule.

¹⁷ Jesús na e-sapinganmala gulluse aidenonikid, agi nebagi e-sapinganmala, degi, dulemar-bukidar Judea-yalaganbarmalad, Jerusalénginmalad, Tiro, degi, Sidón, demar-gakagan-dorgan, amar bela Jesús-itogega nonimalad, degi, na uelemalad nugumalagar.

¹⁸ Agi dulemar niaburbase-nue-wiledigusmalad nudaklesmalad.

¹⁹ Bela dulemar-bukidar Jesús-ebubi-damalad, ar ade Jesús-gangued-nikad, bela dulemar-onudakdiid.

²⁰ Jesús na e-sapingan-dakdegu, sogded: Bemar-wilemalad, bemargi nued binsalesmalad, ar Bab-Dummad-neg-dakmaid, bemargadid.

²¹ Bemar-emi-uku-mesdimalad, bemargi nued binsalesmalad, ar ade bemar immerba itononimaloed. Bemar-emi-bodidimalad, bemargi nued binsalesmalad, ar ade bemar allenonimaloed.

²² Bemargi nued binsamaloed, ani Dule-Machi, an-nug-ular, dulemar istar be-dakarmalar, dulemar be-obannarmalar, dulemar be-ichoarmalar, degi, be-nuggi sunmakarmalar, be dule-iskanamarye.

²³ Dulemar sabsur be-imaksadba, a-ibagangi be wergumaloed, be weligwar itomaloed, ar nibneggi bemarga ibmar-uklegoed dummarbad. E-babgan bemar-idu amba sabsur Bab-Dummad-gaya-burba-berbemalad-wiosmarmogad.

²⁴ ¡Ar bemar mani-ibgandi wile itomaloed! Ar ade bemardi bato wegi yeer itodimalad.

²⁵ ¡Ar bemar bato wegi immedik itodimaladdi, wile itomaloed! Ar ade be ukud itononimaloed. ¡Ar bemar bato emi alledimaladdi, wile itomaloed! Ar ade bemar nunmaked itononimaloed, degine, bemar bononimaloed.

²⁶ ¡Ar bemargi bela-dulemar nuedbi sunmakarmalar, be dule-wilesmar! Ar deyob be-babgan Bab-Dummad-gaya-burba-berbemaladye binsa-gordimalad imaksamarmogad.

²⁷ Jesús sogdebalid: “Ar bemar an-itobukmaladgardi an sogdo: Dule-istar-be-dakdimalad be sabgumar, dule sae-be-dakmaladga ibmar-nuegan be imakmar.

²⁸ Dulemar-be-ukabsadimaladgi nued egi be binsamar, dulemar be-ogakansadimaladga be Bab Dummadse ega gormar.

²⁹ “Ar dule-wargwen wagargi be bibyosale, wagar-baid ega be oyobar. Dule bei-suba susale, mer mor-ega-uksuli be gubar.

³⁰ Ar doa-dule bese ibmar egichialir, ega be uke. Ar dule be-ibe-ibmar susale, mer ese be bar egiso gannar bega udagegar.

³¹ Ar igi dulemar be-imakbi be abege, deyob dulemar be imakmogoed.

³² “Ar dulemar be-sabmaladbi be sabguele, ¿Bab Dummadgi ibi-nued be amiosunna? Be ibmar-nued amiosuli. Ar dulemar-iskudimalad deyob dule-e-sabmalad sabgumarmogad.

³³ Ar dulemar ibmar-nued-bega-imakmaladgarbi ibmar-nued be imakmogale, ¿Bab Dummadgi ibi-nued be amiosunna? Ib-nued be amiosuli. Ar dulemar-iskudidimalad amba deyob imakmarmogad.

³⁴ “Ar unnila dule-gannar-bega-ibmar-ukoedgarbi be ibmar wis ukele, ¿Bab Dummadgi ibi-nued be amiosunna? Ib-nued be amiosuli. Ar dulemar-iskudimalad dule-iskudimaladga ibmar-ukdamarmogad, adi sorba gannar ega ukbaligar.

³⁵ “Degisoggu, be-istarmalad be sabgumar, ibmar-nued ega be imakmar, dule-ibmar-bei-abeged ega be ukmar, mer gannar-bega-ibmar-uked edarbedii be gumar, ar bemarga ibmar-uklegoed bur-dummarba gued, degine, Bab-Dummad-Bur-Dummadid-e-mimmiga bemar gunonikoed, ar Bab Dummad bela dulemar-sunnasurdamalad, degi, dulemar-iskanamar wile dakmaid.

³⁶ Ar igi be-Bab dulemar-wile-dakmaimoga, degisoggu, ayob bemar dulemar-wile-dakmarmosundo.”

³⁷ Jesús sogdebar: “Mer yogsaar be sogo, we dule-iskanaye, adi melle Bab Dummad deyob begi sogmogagar. Mer be sogo, we-dule-sabsur-odurdakye, adi melle Bab Dummad sabsur be-odurdakmogagar. Dulemar begi nossuliyob be dake, adi Bab Dummad egi nossuliyob bemar-dakmogagar.

³⁸ “Aimarga ibmar be uke, adi Bab Dummad bega ibmar ukmogoed. Bab Dummad bega ukoed, ibmar-wilubsaleged-nuedgi, nue gindilegar, nue gwamakar, degi, nue enargwaagwadgi. Ar be ibmar wilub-imakedgine, Bab Dummad bega ibmar wilubsamogoed.”

³⁹ Geb degi Jesús burbar emarga ibmar sogded: “¿Ar dule-ibya-sulid, sunna dule-ibya-sulid-idumai guosi? ¿Ar ebobela yaa-guregedgi argwachasulir be insae? Argwachale.

⁴⁰ “Dule-ibmar-durdaknaid geg e-sailaba dummad gued. Ar ibmar-durdaknaid obelosardi sunna e-odurdakedyob gumogodo.”

⁴¹ Jesús burbar sogdebalid: “¿Ar ibiga be-gwenad-ibyagi durgan-maid magar be dake, ar be-ibya-yaba suar-maiddi aku be dake?

⁴² “¿Ar igi be-gwenadga be sogoe: ‘Be-ibya-yaba-durgan-maid an bega onogweloye.’ Ar be-ibya-yaba suar-maiddina? ¡Bemar wagar-darbomalad! Suar be-ibya-yaba-maid-insa be onoge, geb agi nabir be atakoed, be-gwenad-ibya-yaba-durgan-maid onogegar.”

⁴³ Jesús sogdebalid: “Ar sapi-nuedsulid geg e-sanmaked nued sanmaked, degine, sapi nuedile, e-sanmaked geg ichakwa sanmaked.

⁴⁴ Ar sapimar wargwen-wargwen na e-sanmakedgi dakleged. Ar ade higo-san ikogi sanmaksulid, degine, uva-san dub-iko-nikadgi gwen be weosurguoed.

⁴⁵ “Anmar-dule amba deyobmodo, dule-nued, na e-gwagegi ibmar-nued-nikadba ibmar-nued onoged. Ar dule-iskanadi, dule na e-gwagegi ibmar-iskana-nikadba ibmar-iskana onomogad. Ar dule-sunmakedi, gwagegi-ibmar-naidba na sunmaked.”

⁴⁶ Jesús sogdebalid: “¿Ibiga be anse gormala, ‘Dummad, Dummad,’ ar degite an-ibmar-sogedba be dasurmalad?