Lucas 4:1-28 in Achi

¹ I Jesus xel chila che i ya Jordan, lic ʼo u Tewal i Dios ruʼ. Teʼuri xcʼam bi che jun jyub tzʼinilic rumal u Tewal i Dios.

² Chila xu chʼij cuarénta ʼij, lic n-ta xu tijo. Are ʼo chila, xupon itzel ruʼ; xraj ire cu ʼan che i Jesus chi cu ʼan jun u mac. Are xicʼaw i cuarénta ʼij, xpe i numic che.

³ Are ʼuri, i itzel xu bij che: —We yet at u Cʼojol i Dios, cha bij che i abaj-i coʼon wa che rib —xu bij.

⁴ I Jesus xu laʼ u wach che: —N-quin ʼan taj —xu bij—. Man chupam u wuj i Dios, queje iri tzʼibtalic: “N-xui ta rumal i wa je cʼas i winak. Xui-ri are ronojel u tzij i Dios je cʼasbawnak” —xu bij i Jesus.

⁵ Teʼuri i itzel xu cʼam bi che jun nim laj jyub. Juntir xu cʼut che i Jesus ronojel i nimak tak tinimit ʼo chuwach i jyub taʼaj.

⁶ Teʼuri xu bij chic che: —Ronojel iri ʼis ʼo pinʼab yin. Xak ʼo pinʼab quin sipaj che, pachin che cwaj yin. Ronojel iri, ruʼ u chomal, quin sipaj chawe,

⁷ xui-ri we yet cat xuqui chinwach, y ca coj in ʼij —xu bij itzel che.

⁸ I Jesus xu laʼ chic u wach che: —Chat el chinwach, a-Satanas, man chupam u wuj i Dios, queje iri tzʼibtalic: “Xui che Awajwal Dios cha cojo u ʼij; xui che ire ca ʼan wi a patan,” queje ile cu bij —xu bij.

⁹ Teʼuri i itzel xu cʼam bi i Jesus pa Jerusalen. Xe u ya chila cʼa chu tzam i rachoch i Dios. Teʼuri xu bij che: —We yet at u Cʼojol i Dios, cha cʼaka bi awib cʼa pulew. N-cat cam taj,

¹⁰ man chupam u wuj i Dios, queje iri tzʼibtalic: I Dios cu bij na chique u ángel cat qui chajij.

¹¹ Ique lic cat cucʼaj che qui ʼab; mi tene quiqui ya chawe que ʼana cʼax che awakan che abaj, cu bij. (Queje ile xu bij itzel che.)

¹² I Jesus xu laʼ chic u wach che: —Xak tzʼibtal i tzij-i chupam u wuj i Dios: “Ma cʼam u pam Awajwal Dios,” cu bij. Rumal-i, n-quin ʼan taj —xu bij che.

¹³ I itzel, ya n-cu rik ta chic wach cu tʼorbej re i Jesus, are ʼuri, xel jun tiémpo chuwach.

¹⁴ Teʼuri i Jesus xtzalij pa Galiléa, lic ʼo u Tewal i Dios ruʼ. Ronojel wach i xu ʼano, xel u tzijol ronojel pa tak jyub chirij chuwach.

¹⁵ Ire xu cʼut u tzij i Dios chique i winak pa tak molbalʼib, y conojel xqui bij chi nim u ʼij.

¹⁶ Teʼuri i Jesus xa ʼe pa tinimit Nazaret, pa xqʼuiy wi. Pacha ʼax coʼon wi pa tak uxlambal ʼij, xoc pa molbalʼib. Xqui tzʼonoj che chi crajlaj u tzij i Dios chique i je ʼo chila.

¹⁷ Are xtaqʼui chu ʼonquil, xqui ya i wuj che chi u tzʼibam can i mam Isaías, chi ajbil u tzij i Dios ujer. Xu jak i wuj, xu tzucuj y xu riko pa ʼo wi i tzij chi queje iri cu bij:

¹⁸ I u Tewal i Kajwal lic ʼo wuʼ, man in u chom yin chu paxsaxic i ʼutz laj tzij chique i nibaʼib; in u takom li chi relsaxic i cʼax piqui cʼux, niʼpa i que bisonic. In u takom li chu bixquil wach i quelbal chi sak, niʼpa i je chaptajnak, xak chu bixquil wach u rikic i qui tzunbal i je mawach. In u takom li chi qui toʼic niʼpa i quiqui tij i cʼax.

¹⁹ In u takom li chu bixquil chiwe chi ya xu rik i ʼij chatal rumal i Dios chi cu cʼut chiwe ʼo chic toʼbal i wach. (Are i tzij-le xrajlaj i Jesus chique, chi u tzʼibam can i mam Isaías.)

²⁰ Teʼuri xu bor chic i wuj, y xu ya che i chajinel, y xcubiʼic. Conojel i je ʼo pa ja toʼ xqui maj u takexic.

²¹ Teʼuri xu jek i chʼaʼatic cuʼ. Xu bij: —Woʼor, chupam i ʼij-i, i Dios ca tijin chu ʼonquil pacha i tzij-le chi tzʼibtal can ujer. Woʼor, quiwil ʼut ʼo chic chi chiwach —xu bij i Jesus chique.

²² Conojel lic ʼutz xe chʼaw chirij i Jesus. Lic chom i u tzij xu bij; lic xqui bisoj rumal. Xqui bij chiquiwach: —Ire-le ¿xataba n-are ti u cʼojol i ma Jose? Are pues —xe cha.

²³ I Jesus xu bij chique: —Katzij, yix qui bij na i tzij-i chwe, chi ʼax bital wi: “Ajcun, cha cunaj awib yet,” qui bij na chwe. Xak qui bij na iri chwe: “Niʼpa i ka tom chi a ʼanom chila pa tinimit Capernaum, cha ʼana ni waral chupam a tinimit yet,” qui bij na chwe. (Queje xu bij i Jesus ile chique.)

²⁴ Xak xu bij: —N-quin ʼan taj, man mi jun ajbil u tzij i Dios cocsax u ʼij pu tinimit ire.

²⁵ Quin cʼunsaj na pi cʼux wach xu ʼan i mam Elías, chi ajbil u tzij i Dios ujer. Che tak i ʼij-le, n-xpe ti jab oxib junab ruʼ nicʼaj; rumal-i xpe waʼjal chuwach i jyub taʼaj. Je qʼui ixokib malcanib pa jyub Israel,

²⁶ xui-ri i Dios n-xu tak ti mam chi qui toʼic ique; xa xu tak bi ruʼ jun ixok malcan chi n-aj Israel taj; i ixok-le aj Sarépta, chi re i jyub Sidon.

²⁷ Xak quin cʼunsaj pi cʼux wach xu ʼan i mam Eliséo ujer. Je qʼui je rach aj Israel chi ʼo itzel laj yobil lépra chique. Xui-ri, mi jun xe u cunaj chique, xui i ma Naaman chi aj Síria, xcunaxic; ire n-aj Israel taj. (Queje xu bij i Jesus ile chique.)

²⁸ Are xqui ta wach i xu bij, ʼis xpe coywal niʼpa je ʼo pa molbalʼib.

¹ Ekꞌu ri Jesús xel bꞌi che ri luwar re ri nimayaꞌ Jordán yey lik kꞌo ri Ruxlabꞌixel ri Dios rukꞌ. Xkꞌam kꞌu bꞌi ruma ri Ruxlabꞌixel ri Dios pa jun luwar katzꞌintzꞌotik.

² Xkꞌojiꞌ chilaꞌ cuarenta qꞌij y xkꞌam upa ruma ritzel winaq. Yey chupa taq waꞌ wa qꞌij na jinta kꞌo xutijo. Chukꞌisbꞌal kꞌu re ri cuarenta qꞌij, lik xnumik.

³ Ekꞌuchiriꞌ, ritzel winaq jewaꞌ xubꞌiꞌij che: —We qatzij at Ukꞌajol ri Dios, chat-taqan che chaꞌ waꞌbꞌaj kuꞌan wa —xcha che.

⁴ Ri Jesús xukꞌul uwach: —Jewaꞌ tzꞌibꞌital kan chupa Rutzij Upixabꞌ ri Dios: Na xew ta ruma ri wa e kꞌas ri tikawex; ma e kꞌaslik ruma taq ronoje rubꞌiꞌim ri Dios —xchaꞌ.

⁵ Ekꞌuchiriꞌ, ritzel winaq xukꞌam bꞌi ri Jesús chutzaꞌm jun nimalaj juyubꞌ y xa pa joqꞌotaj xukꞌut kꞌu chwach, ronoje ri taqanik kaꞌan puwi taq ri tinamit che ruwachulew

⁶ y jewaꞌ xubꞌiꞌij che: —Ronoje wa kawilo rukꞌ ronoje ruchomalil taq waꞌ, kanya paqꞌabꞌ, ma yaꞌtal kan panuqꞌabꞌ riꞌin yey panuqꞌabꞌ kꞌo wi china che kuaj kanya wi.

⁷ Kanya kꞌu ronoje waꞌ paqꞌabꞌ riꞌat we kaxukubꞌaꞌ awibꞌ chinuwach y kaloqꞌnimaj nuqꞌij —xcha che.

⁸ Ri Jesús xukꞌul uwach: —Chatela chinuwach Satanás, ma jewaꞌ tzꞌibꞌital kan chupa Rutzij Upixabꞌ ri Dios: Lik chaloqꞌnimaj uqꞌij ri Dios Qajawxel y xew Rire chanimaj uqꞌij —xchaꞌ.

⁹ Tekꞌuchiriꞌ, ritzel xukꞌam bꞌi ri Jesús chupa ri tinamit Jerusalem kꞌa chikaj che ruwi ri Rocho Dios y jewaꞌ xubꞌiꞌij che: —We qatzij at Ukꞌajol ri Dios, chakꞌaqa bꞌi awibꞌ kꞌa chuꞌlew

¹⁰ yey na jinta kꞌo kakꞌulumaj, ma jewaꞌ tzꞌibꞌital kan chupa Rutzij Upixabꞌ ri Dios: Ri Dios kebꞌutaq lo ru ángeles awukꞌ chaꞌ katkichajij.

¹¹ Katkichap kꞌu rukꞌ ri kiqꞌabꞌ chaꞌ na kaꞌchiqa ta rawaqan che juna abꞌaj —xchaꞌ.

¹² Ri Jesús xukꞌul uwach: —Jewaꞌ tzꞌibꞌital kan chupa Rutzij Upixabꞌ ri Dios: Makꞌam upa ri Dios Qajawxel —xchaꞌ.

¹³ Echiriꞌ ritzel winaq na xuriq ta chik suꞌanik kukꞌam upa ri Jesús, xel chiriꞌ y xroyeꞌej na kꞌu riꞌ jampalaꞌ kukꞌam tanchi upa.

¹⁴ Ekꞌuchiriꞌ, ri Jesús xeꞌek tanchi Galilea y lik kꞌo ruchuqꞌabꞌ ri Ruxlabꞌixel ri Dios rukꞌ. Y xeꞌek utzijoxik puwi Rire pa taq tinamit y pa taq raldeas re Galilea.

¹⁵ Kakꞌutun kꞌu pa taq sinagogas y konoje ri ketaw re lik kakiyak uqꞌij.

¹⁶ Xopon kꞌu ri Jesús chupa ri tinamit Nazaret pa xkꞌiy wi. Y chupa ri qꞌij re uxlanibꞌal xok chupa ri sinagoga jelaꞌ pachaꞌ xex kuꞌan wi. Xtakꞌiꞌ kꞌu riꞌ chaꞌ karajilaj Rutzij Upixabꞌ ri Dios.

¹⁷ Y xyaꞌ che Rire ri jubꞌotaj wuj re ri qꞌalajisanel Isaías. Y echiriꞌ xujaq upa, xuriq pa kubꞌiꞌij wi:

¹⁸ Ri Ruxlabꞌixel ri Dios Qajawxel kꞌo panuwiꞌ, ma inuchaꞌom loq chaꞌ koꞌlnuyaꞌa ri Utzilaj Tzij chike ri nibꞌaꞌibꞌ. Inutaqom loq chaꞌ kambꞌochiꞌij kikꞌuꞌx ri lik e kꞌo pa bꞌis, koꞌlnutzijoj kelebꞌal lo ke ri e kꞌo chi presoyil, kebꞌenutzuꞌnisaj ri e potzꞌ, kebꞌenuwesaj lo pa kꞌax ri lik kitijom kꞌaxkꞌolil,

¹⁹ y koꞌlnutzijoj ruqꞌijol ri kꞌutubꞌal re ri rutzil ukꞌuꞌx ri Dios Qajawxel.

²⁰ Ekꞌuchiriꞌ xukꞌis rajilaxik Rutzij Upixabꞌ ri Dios, xubꞌoto y xuya tanchi che ri aj chak re ri sinagoga, y xtzꞌuyiꞌ chikiwach ri e kꞌo chiriꞌ. Y konoje lik kakitzutzaꞌ pan uwach.

²¹ Ekꞌuchiriꞌ, xubꞌiꞌij chike: «Waꞌ wa xinwajilaj che Ruchꞌaꞌtem ri Dios, waqꞌij xujeq bꞌi rilik chiwach alaq» xchaꞌ.

²² Konoje ri xetaw re, kakiyak uqꞌij y lik kaminaq kanimaꞌ che ri chomilaj uchꞌaꞌtem, jewaꞌ kakibꞌiꞌij: «¿Na e ta nebꞌa ukꞌajol ri José waꞌ?» kechaꞌ.

²³ Y ri Jesús xubꞌiꞌij chike: «Laj ne kabꞌiꞌij alaq chwe: “Kunanel, chakunaj awibꞌ chawibꞌil awibꞌ. Chaꞌana kꞌu riꞌ chupa wa tinamit taq ri kꞌutubꞌal re ruchuqꞌabꞌ ri Dios jelaꞌ pachaꞌ ri qatom xaꞌan chilaꞌ Capernaúm” kacha alaq chwe.»

²⁴ Y xubꞌiꞌij tanchi waꞌ: «Paqatzij wi kambꞌiꞌij che alaq: Na jinta juna qꞌalajisanel kakꞌul chi utz chupa rutinamit.

²⁵ Paqatzij wi kambꞌiꞌij che alaq: Rojertan lik e kꞌi rixoqibꞌ e malkaꞌnibꞌ e kꞌo chupa ri tinamit Israel chwach ri qꞌalajisanel Elías echiriꞌ na xuꞌan ta jabꞌ oxibꞌ junabꞌ rukꞌ nikꞌaj y xpe kꞌu ri jun unimal numik chupa ronoje wa tinamit.

²⁶ Na rukꞌ ta kꞌu riꞌ, ri Dios na xutaq tubꞌi ri Elías rukꞌ junoq chike wa malkaꞌnibꞌ aj Israel; ma e xutaq bꞌi rukꞌ jun ixoq malkaꞌn aj Sarepta, jun tinamit kꞌo chunaqaj ri tinamit Sidón.

²⁷ Yey ojertan lik e kꞌi ri kꞌo ri yabꞌil lepra chike echiriꞌ ri qꞌalajisanel Eliseo kꞌo chupa ri tinamit Israel. Na rukꞌ ta kꞌu riꞌ, na jinta junoq chike xkunutajik, ma xew xkunutaj ri Naamán, ri jun aj Siria» xchaꞌ.

²⁸ Echiriꞌ xkita waꞌ, konoje ri e kꞌo chupa ri sinagoga lik xpe koyowal.

¹ Ecꞌu ri Jesús xel bi che ri luwar re ri nimayaꞌ Jordán yey lic cꞌo ri Ruxlabixel ri Dios rucꞌ. Xcꞌam cꞌu bi ruma ri Ruxlabixel ri Dios pa jun luwar catzꞌintzꞌotic.

² Xcꞌojiꞌ chilaꞌ cuarenta kꞌij y xcꞌam upa ruma ritzel winak. Yey chupa tak waꞌ wa kꞌij na jinta cꞌo xutijo. Chuqꞌuisbal cꞌu re ri cuarenta kꞌij, lic xnumic.

³ Ecꞌuchiriꞌ, ritzel winak jewaꞌ xubiꞌij che: —We katzij at Ucꞌajol ri Dios, chat-takan che chaꞌ waꞌbaj cuꞌan wa —xcha che.

⁴ Ri Jesús xucꞌul uwach: —Jewaꞌ tzꞌibital can chupa Rutzij Upixab ri Dios: Na xew ta ruma ri wa e cꞌas ri ticawex; ma e cꞌaslic ruma tak ronoje rubiꞌim ri Dios —xchaꞌ.

⁵ Ecꞌuchiriꞌ, ritzel winak xucꞌam bi ri Jesús chutzaꞌm jun nimalaj juyub y xa pa jokꞌotaj xucꞌut cꞌu chwach, ronoje ri takanic caꞌan puwi tak ri tinamit che ruwachulew

⁶ y jewaꞌ xubiꞌij che: —Ronoje wa cawilo rucꞌ ronoje ruchomalil tak waꞌ, canya pakꞌab, ma yaꞌtal can panukꞌab riꞌin yey panukꞌab cꞌo wi china che cuaj canya wi.

⁷ Canya cꞌu ronoje waꞌ pakꞌab riꞌat we caxucubaꞌ awib chinuwach y calokꞌnimaj nukꞌij —xcha che.

⁸ Ri Jesús xucꞌul uwach: —Chatela chinuwach Satanás, ma jewaꞌ tzꞌibital can chupa Rutzij Upixab ri Dios: Lic chalokꞌnimaj ukꞌij ri Dios Kajawxel y xew Rire chanimaj ukꞌij —xchaꞌ.

⁹ Tecꞌuchiriꞌ, ritzel xucꞌam bi ri Jesús chupa ri tinamit Jerusalem cꞌa chicaj che ruwi ri Rocho Dios y jewaꞌ xubiꞌij che: —We katzij at Ucꞌajol ri Dios, chacꞌaka bi awib cꞌa chuꞌlew

¹⁰ yey na jinta cꞌo cacꞌulumaj, ma jewaꞌ tzꞌibital can chupa Rutzij Upixab ri Dios: Ri Dios quebutak lo ru ángeles awucꞌ chaꞌ catquichajij.

¹¹ Catquichap cꞌu rucꞌ ri quikꞌab chaꞌ na caꞌchika ta rawakan che juna abaj —xchaꞌ.

¹² Ri Jesús xucꞌul uwach: —Jewaꞌ tzꞌibital can chupa Rutzij Upixab ri Dios: Macꞌam upa ri Dios Kajawxel —xchaꞌ.

¹³ Echiriꞌ ritzel winak na xurik ta chic suꞌanic cucꞌam upa ri Jesús, xel chiriꞌ y xroyeꞌej na cꞌu riꞌ jampalaꞌ cucꞌam tanchi upa.

¹⁴ Ecꞌuchiriꞌ, ri Jesús xeꞌec tanchi Galilea y lic cꞌo ruchukꞌab ri Ruxlabixel ri Dios rucꞌ. Y xeꞌec utzijoxic puwi Rire pa tak tinamit y pa tak raldeas re Galilea.

¹⁵ Cacꞌutun cꞌu pa tak sinagogas y conoje ri quetaw re lic caquiyac ukꞌij.

¹⁶ Xopon cꞌu ri Jesús chupa ri tinamit Nazaret pa xqꞌuiy wi. Y chupa ri kꞌij re uxlanibal xoc chupa ri sinagoga jelaꞌ pachaꞌ xex cuꞌan wi. Xtaqꞌuiꞌ cꞌu riꞌ chaꞌ carajilaj Rutzij Upixab ri Dios.

¹⁷ Y xyaꞌ che Rire ri jubotaj wuj re ri kꞌalajisanel Isaías. Y echiriꞌ xujak upa, xurik pa cubiꞌij wi:

¹⁸ Ri Ruxlabixel ri Dios Kajawxel cꞌo panuwiꞌ, ma inuchaꞌom lok chaꞌ coꞌlnuyaꞌa ri Utzilaj Tzij chique ri nibaꞌib. Inutakom lok chaꞌ cambochiꞌij quicꞌuꞌx ri lic e cꞌo pa bis, coꞌlnutzijoj quelebal lo que ri e cꞌo chi presoyil, quebenutzuꞌnisaj ri e potzꞌ, quebenuwesaj lo pa cꞌax ri lic quitijom cꞌaxcꞌolil,

¹⁹ y coꞌlnutzijoj rukꞌijol ri cꞌutubal re ri rutzil ucꞌuꞌx ri Dios Kajawxel.

²⁰ Ecꞌuchiriꞌ xuqꞌuis rajilaxic Rutzij Upixab ri Dios, xuboto y xuya tanchi che ri aj chac re ri sinagoga, y xtzꞌuyiꞌ chiquiwach ri e cꞌo chiriꞌ. Y conoje lic caquitzutzaꞌ pan uwach.

²¹ Ecꞌuchiriꞌ, xubiꞌij chique: «Waꞌ wa xinwajilaj che Ruchꞌaꞌtem ri Dios, wakꞌij xujek bi rilic chiwach alak» xchaꞌ.

²² Conoje ri xetaw re, caquiyac ukꞌij y lic caminak canimaꞌ che ri chomilaj uchꞌaꞌtem, jewaꞌ caquibiꞌij: «¿Na e ta neba ucꞌajol ri José waꞌ?» quechaꞌ.

²³ Y ri Jesús xubiꞌij chique: «Laj ne cabiꞌij alak chwe: “Cunanel, chacunaj awib chawibil awib. Chaꞌana cꞌu riꞌ chupa wa tinamit tak ri cꞌutubal re ruchukꞌab ri Dios jelaꞌ pachaꞌ ri katom xaꞌan chilaꞌ Capernaúm” cacha alak chwe.»

²⁴ Y xubiꞌij tanchi waꞌ: «Pakatzij wi cambiꞌij che alak: Na jinta juna kꞌalajisanel cacꞌul chi utz chupa rutinamit.

²⁵ Pakatzij wi cambiꞌij che alak: Rojertan lic e qꞌui rixokib e malcaꞌnib e cꞌo chupa ri tinamit Israel chwach ri kꞌalajisanel Elías echiriꞌ na xuꞌan ta jab oxib junab rucꞌ nicꞌaj y xpe cꞌu ri jun unimal numic chupa ronoje wa tinamit.

²⁶ Na rucꞌ ta cꞌu riꞌ, ri Dios na xutak tubi ri Elías rucꞌ junok chique wa malcaꞌnib aj Israel; ma e xutak bi rucꞌ jun ixok malcaꞌn aj Sarepta, jun tinamit cꞌo chunakaj ri tinamit Sidón.

²⁷ Yey ojertan lic e qꞌui ri cꞌo ri yabil lepra chique echiriꞌ ri kꞌalajisanel Eliseo cꞌo chupa ri tinamit Israel. Na rucꞌ ta cꞌu riꞌ, na jinta junok chique xcunutajic, ma xew xcunutaj ri Naamán, ri jun aj Siria» xchaꞌ.

²⁸ Echiriꞌ xquita waꞌ, conoje ri e cꞌo chupa ri sinagoga lic xpe coyowal.