4 Isaíasnen rihbi ta Papan joi yohinicaxon jaa yohihi neateman huishanishqui. Jano tsoa jihueyamahi janin tah hen quenahi: Noquen Hihbo hahan jonon bahixonnahue. Pontequin bahixonquin.
5 Mai xanquen jatihibi tah man bochojabonatihi. Mahchi jatihibi rihbi tah man mapaquin mispanjabahintihi. Mayabo rihbi tah man pontetihi. Xanquen xanquenaibo rihbi sirijabonaquin.
6 Jaatian ta Papan raanah jihuemanica joresscai jatihibi jonibaan jisyaxihquiqui hah ta Isaíasnen janishqui huishaquin.
7 Isaíasnen jascajani copi ta nashimamahi behibo Juaman yohinishqui: —Papan ta mato casticantihiqui. ¿Tsoan mato Papan mato castanmis yohihah man neno jabaquihrani jahuin, rono papayahpabon?
8 Maton shinan pontejacoinax siri shinanya sca jihuenahue hih ca hen jai sen, maton shinan honanahbo. Noquen Papa ta Abraham qui hihyamarihbinahue. Nea macanbo ta Papan jonijati hahtipahiqui, Abrahanen baquebo sca janon, hahan Papa jenimahibo sca janon.
9 Jihui reranoxon hahcajaquin ta jahuen yami bihxon Papan tarescaiqui. Siri bimijomabo tarexon cohaquin hahcajaquin ta tiroma shinanyahpabo Papan casticanscaiqui. Shinannahue —jato jaquin.
10 Jascahah yocascacanquin. —¿Hicon nan? ¿Jahueja sca non jatihin?
11 Yocacahbo sca jato yohiquin: —Rabe cotonyahpaxon cotonjoma joni huesti hinannahue. Pitiyahpaxon, jascajaquin rihbi pitijoma joni hinannahue jan pinon —jato jaquin.
12 Jaatian sca coriqui cobranaibo rihbi becani. Jaan jato hihquimatanquin nashimanon hihquish becani. Nocoxon sca yocacanquin: —¿Noquen non jahuejatihin? —hahcanquin.
13 —Hapon mato yohihi tihi res cobrannahue. Man mahuinmamis —jato jaquin.
14 Sontarobaan rihbi sca yocaquin. —Noque rihbi sca yohihue. Sontaroxon non jenquetsahatihin —hahcanquin. —Man tah man tsoabi tahtijaxon jahuabi bichintimahi. Quesaxon bichintimarihbihi. Maton hapobaan mato copijahi res bihxon jaa res bihti shinannahue —jato jaquin.
15 Juaman jascajahiya manahihti quenichibo shinamehti: —Jaa tsi ra Papan caisai joni quin —hihcani, Juan yohihi jaton jointinin shinamehti.
16 Jascaraiboya: —Hean hen mato jenen nashimahi bi ta hea mentan hashoan coshi joni jahuiqui. Ni jahuen sapato risbi pecaxonti tah hen senenyamahi jaa hihti siri copi. Jaan ta jahuen yoshin siri mato hinantihiqui chihi rihbi mato maracanquin.
17 Chishpo nihuen potanon hihxon bero romishin potaquin hahcajaquin ta Papan xecoscaiqui. Bero rahsi tsamatai tsinquixon sca jahuen bexojati janin niaxon bi ta nocayosma chihin chishpo mapojayaxihquiqui —jato jaquin.
18 Jascapahbo joibo ta jato hicha yohinishqui, nincacoinahbo. Joi siri jato nincamaquin.
19 Siri joibo jan yohihi que bi ta quiquin hapoxon Herodesnin bihmaxon sipo xoboho Juan tsahonnishqui. Jascatimahi bi tah min miin huetsan haibo betanbi hihqui, Juaman jaho copi Herodesnin jaa sipo xoboho tsahonquin. Jatihibi jan tiromajaquin hahni Juaman yohiho copi rihbi sipo xoboho tsahonquin.
20 Hihti tiromaxon bi ta hashoan sca tiromajaquin Herodesnin Juan bihnishqui.
21 Jaabi, sipo xoboho Herodesnin jaa tsahonyaxahnon ta Juaman jato nashimapahonishqui, jato nashimanon hihquish hahqui nocotaibo. Jascapahbo nashimaxon ta Jesus rihbi nashimanishqui. Nashimaha ta noquen Papa yocanishqui. Yocacahnan, nai quehpemehtai jisquin.
22 Jaton jisnonbi sca naihoh quehax nobex quescapah botopaqueti jahui jisquin. Naihoh quehax yohuanairihbi nincacanquin. —Mia tah min jahan hen queenai heen baque qui. Mihon tah hen hihti jenimahi —hihqui.
23 Jaa pecaho ta joi siri yohibonahi sca Jesus nihnishqui, treinta bari jaax. Jonibaan jisí cahen jaa Josepan baque. Jahuen chahita cahen Helí.
24 Helí sca cahen Mataten baque. Matat cahen Levin baque. Leví cahen Melquin baque. Melqui cahen Janan baque. Jana cahen Josepan baque.
25 José cahen Matatiasnen baque. Matatias cahen Amosen baque. Amos cahen Nahuman baque. Nahum cahen Eslin baque. Esli cahen Nagainin baque.
