4 Zeree wak kumplir diiz ne wkaa profet-Isaías ledne re: Te rëz rlen denbidx, re we: “Gulaxnëz xnëz Men ne rnebééy, guxal te nëz ne tebli.
5 Yrandxee ledne nugyët, gyezaa we; yrandxee gyeey no le yrandxee bles, gakleecho. Nëz ne nyeky, gaktebli we. Nëz ne gya gyëttee, gaktebli we.
6 No yrandxee mengyëzlyu kwii mén ne yxaal Dëdyuzh ne yselaa mén.”
7 Chene ra mén lo Xwa ne ytxobnis Xwa men, nan Xwa lo men: ―¡Xerras mëël! ¿Txu na lo de ne yláá de lo gyelentozroo ne zëdyob?
8 Xnëz gugak chen gaknyoo ne nli che wsaan de xgyelmal de, no guedet de lo xkompanyer de: “Xnëz Abraham zëëd be”; porke yna noo lo de yra de ne axtegue gyeree zun Dëdyuzh gan ylaa Dëdyuzho men ne zëëd xnëz Abraham.
9 Che list zu gyibyag ne txuug axtegue ydeblu yag; yrandxee yag ne rkaadet nexwen lo, txuugo, tsa we lo gyi.
10 Lex wnabdiiz mén lo Xwa, re men: ―¿Pagox rap noo degne ylaa noo?
11 Wke Xwa, re Xwa: ―Men ne rap txup lërmank, rap men degne ydee men tebo lo men ne yëteno; men ne rap ne ru, rap men degne ydee men tebëdo lo men ne yëteno.
12 No tebëd men ne rgoob zeg impwest wa lo Xwa ne ytxobnis Xwa men, lex wnabdiiz men lo Xwa, re men: ―Maxter, ¿noo naa, pagox rap noo degne ylaa noo?
13 Lex re Xwa lo men: ―Gobdet de mazre nzhoodee ke ne rap de degne gob de.
14 No le tebëd soldad wnabdiiz lo Xwa, re men: ―¿Noo naa, pagox rap noo degne ylaa noo? Wke Xwa, re Xwa: ―Ynechedet de mén por ne gak ygyitxee de logne nak xen men, ni ykagyiidet de mén logne wlaadet men, no gugyan byen logne rezh rka de.
