6 Jo̱ mɨ˜ caguilíiñˋ fɨˊ Belén, jo̱b catɨ́ˋ íꞌˋ e nilɨseengˋ yʉ̱ʉ̱ˋ quiáꞌˉ Yáˆ, dsʉꞌ jaˋ lɨ˜ calɨ́ꞌrˉ lɨ˜ nijé̱rˉ, co̱ꞌ dsíngꞌˉ fɨ́ɨngˊ jaléngꞌˋ dseaˋ i̱ caseángꞌˊ e fɨˊ fɨɨˋ do ie˜ jo̱. Jo̱ lɨ˜ güɨɨngˋ jaléngꞌˋ cuea˜ güɨtábˆ caje̱rˊ, jo̱ jo̱b calɨséngˋ i̱ yʉ̱ʉ̱ˋ do. Jo̱ íbˋ laꞌuii˜ jó̱o̱ˊ Yሠi̱ calɨséngˋ. Jo̱ mɨ˜ cangɨ́ˋ jo̱, caquɨiñꞌˉ co̱o̱ˋ ꞌmɨꞌˊ, jo̱ catɨráaiñˋ dsíiˊ co̱o̱ˋ niꞌnʉ́ʉˊ lɨ˜ gøꞌˊ jóꞌˋ, dsʉco̱ꞌ jaˋ lɨ˜ seaˋ lɨ˜ guiʉ́ˉ faꞌ niquiérˋ.
8 Jo̱ mɨ˜ canʉʉˋ e jmɨɨ˜ jo̱, jo̱ nicaje̱ˊ co̱o̱ˋ tú̱ˉ mɨ́ɨngꞌ˜ dseaˋ i̱ jmóoˋ íˆ joꞌseꞌˋ quiáꞌˉ fɨˊ lɨ́ꞌˉ caluuˇ fɨɨˋ Belén.
9 Jo̱ lajeeˇ neáaiñˊ e canʉʉˋ e jmɨɨ˜ jo̱, co̱o̱ˋ cajnémˉ jaangˋ ángel i̱ casíingˋ Fidiéeˇ fɨˊ lɨ˜ neáaiñˊ, jo̱ dsíngꞌˉ jloꞌˆ cajneáˉ e güeaꞌˆ quiáꞌˉ Fidiéeˇ do lacúngꞌˊ lajíingˋ lɨ˜ neáangˊ i̱ dseaˋ do, jo̱ dsíngꞌˉ cafǿiñꞌˊ.
10 Jo̱ cajíngꞌˉ i̱ ángel do casɨ́ꞌrˉ jaléngꞌˋ i̱ dseaˋ do: —Jaˋ fǿøngꞌ˜naꞌ jí̱i̱ꞌ˜ co̱o̱ˋ, dsʉco̱ꞌ juguiʉ́bˉ quie̱e̱ˆ quíiˆnaꞌ, jo̱ fɨ́ɨmˊ dseaˋ nilɨꞌiáangˋ dsíirˊ uíiꞌ˜ e júuˆ jo̱.
