Lucas 24:11-52 in San Blas Kuna

¹¹ Ar Jesús-sapingandi omegan-ega-ibmar-soged itossurmalad, binsa ee gordii daksamalad, egi bengusmalad.

¹² Ar Pedroʼdi neg-uanse abarmakde gusad. Neg-uan-mosgu, yaba atakdegu, atuedbi bukwa daksad. Ar Pedro weyob-ibmar-gusad geger daksad, gannar negse aligusad.

¹³ Degine, amba a-ibagi dulemar-Jesúsʼba-nanaimalad-warbo Emaús-neggweburse nadap gusmalad. A-neggwebur Jerusalénʼgi wachi-irbo-nanalegedgi egi siid.

¹⁴ Amar-ebogwadi bela ibmarmar-gusadgi sunmaknadap gusmalad.

¹⁵ Degi-muchub-muchub-sunmaknadapmaladgine, Jesús-sunnad ese warmaknonikid, eba nade gusmogad.

¹⁶ Ar wemar-warbogwad aku Jesús-dake gusmalad. Ar ade, Jesús-dakega emar-ibya bargalesad.

¹⁷ Jesús amarga sogded: —¿Ibigi be sunmaknadapmala? ¿Ibiga be bukib itomarbali?

¹⁸ Gwensak, Cleofasʼye-nugadi, abin sogded: —¿Ar bebi wegi Jerusalénʼgi bela emi-ibmar-gusad wissurde?

¹⁹ Geb Jesús, abin-sogded: —¿Ibu-ibmala? Geb abin-imakdemalad: —Jesús-Nazaretʼginedgi bela-ibmarmar-gusad ¿be wissursi? We-Jesús Bab-Dummad-gayaburba-barsoged, gandikidba nued Bab-Dummad-asabin, degi, dulemar-asabin ibmar saed. Degi, gandikidba-sunmaked-dulebalid.

²⁰ Degine, dule-irwa-Bab-Dummadse-gormalad-e-dummagan, degi, anmar-neggwebur-dakmamaid Roma-dummadga Jesús-uksamalad, adi, oburgwemalagar. Geb nakrusgi Jesús-bioksamalad.

²¹ ”Ar anmardi we-Jesúsʼgi, Israel-dulemar-abonogoedye binsadii gusad. Emide, ibapaagus deyob neggusad-akalad.

²² ”Ar omegan-anmar-abargi-bipirmakdimarmogadi, geger-ito anmar-imaksad. Ar a-omegande wakudaryalaba neg-uanse nadegusmalad,

²³ degi-inigwele, Jesús-mui neg-uangi amissurmarlad. Degisoggu, gannar anmarse nonimargu, anmarga sognonimalad, emarde ibya apurusmarye, baliwiturmar-daksamarye. A-baliwiturmar ega sogsamarye, Jesús dula gudiiye.

²⁴ ”Degine, a-sorba, abala anmar-sordamar neg-uanse nadegusmarmogad. Ar igi-omegan-sogsamala, deyob dakdapmalad. Gwen-Jesús daksasurmarmogad.”

²⁵ Geb degi, Jesús amar-warbogwadga sogded: —Bemar akusunna itomalad. Bemar Bab-gayaburba-barsogmalad-sogsamalad-bengumalad-dulemarbalid.

²⁶ Ar Cristoʼde nibnegse dummadga-megnaed-iduar bela-bela weyob wilegergebed.

²⁷ Geb Jesús we-dulemarga Bab-Garda-narmakar-maidba egi-sunmaklenaid bela sogsad. Moisés-sogsad-narmakar-naidgi onoded, degi, bela Bab-Dummad-gayaburba-barsogsamalad egi-sogsamaladse ega ibmar sogsad.

²⁸ Neggwebur-nadapmaladse warmaksamargu, Jesúsʼdi yamo nadegusaeyob imaksad.

²⁹ Ar emar-warbogwad Jesúsʼgi ise-alamaknai gusmalad, ega sogdemalad: —Anmarba be beeye, bato neg sedogusye, bato neg mutikgudaniye. Degisoggu, Jesús, emarba bessunnad.

³⁰ Degi, mas-gunnega mese-naba sigdemargu, Jesús madu-susa imaksad. Geb Bab-Dummadga dog-nuedye-sogsagu, madu bisge-bisge imaksad, geb emarga uksad.

³¹ Geb degi, e-warbogwad Jesús-mag-dakdemalad. Degi-sii emar-idu binnided, gwen bar daksasurmalad.

³² Geb degi, ebogwad na muchub-muchub sokarmalad: “Anmarga igarba Bab-Dummad-Gardagi sunmakdanigu, anmar-gwagede, ¿nue-weligwar itodani-gussursi?”

³³ Wemar-warbogwad a-gines, a-wachigi, gannar Jerusalénʼse aligusmalad. Jerusalénʼse nonimargu, Jesús-sapingan-ambe-gakagwensakad (11), degi, dulemar-baigan-eba-bukmarmogad danar-bukwa daknonimalad,

³⁴ sogbukmalad: —Ar Dummad-Jesús nue-gannar durgusye, Simónʼse Jesús magarosye.

³⁵ Geb emar-ebogwadi, e-sordagan-bukmaladga sogsamarmogad, igi-igarba gusmala, degine, igi-emarde Jesús madu-bisge-bisge-imaksagu, magar daksamala.

³⁶ Jesús-sapingan amba we-ibmar-gusadgi sunmakbukmala, Jesús emar-abargi gwisgunonikid. Amarga sogded: —¡Na, degite! Ulubgi bogidik be gudii gumarsun.

³⁷ Abin bela-bela gwakidmalad, nue-dobe itodmalad, emarde sergan-dakye bimalad.

³⁸ Ar Jesúsʼdi amarga sogded: —¿Ar ibiga be nue-dobe itomarsunna? ¿Ibiga be beneyob itomarsunna?

³⁹ An-argan be dakmala, an-nag be dakmarbali. Ar amba an-sunnad an gued. Be an-dakmar, be an-ebumar, ar an-sunnad an gued. Ar burbadi san sulid, garmar surbalid. Ar andi san nikad, garmar nikbalid. Be an-dakmalana.

⁴⁰ Deyob-soggwichidgi, emarga e-argan, degi, e-nag oyoded.

⁴¹ Ar e-sapingandi yeer-itogedbali, degi, weligwaledbali, Jesús-durgusad geger dakmalad. Degisoggu, Jesús amarga sogdesunnad: —¿Masgunned be wis nikmala?

⁴² Geb ega ua-naraled bisgar uksamalad.

⁴³ Jesús e-sapingan-annik susgua, amar-asabin guchad.

⁴⁴ Jesús amarga sogded: —Amba an bemar-abargi gudigu, bemarga bato weyob an sogsad: ‘Moisés-Igargi-Angi-Narmakar-Maidi, bela angi guergebye. Degi, Bab-gayaburba-barsogmalad-angi-narmaksamaladba, degine, Salmosʼgi angi-narmakar-maidba bela angi guergebye an bemarga sogsamalad.’

⁴⁵ Degisoggu, Jesús Bab-Dummad-Gardagi-ibmar-sognaid e-sapingan-magar-itogega imaksad.

⁴⁶ Jesús amarga sogded: “Weyob-narmakar-naid: ‘Cristo wilegergebye, ibapaagi gannar durguoye.

⁴⁷ Degine, bela we-napneg-naid-ugakaase angi sunmaklegoye. Adi, na dulemar e-isguedga-bukib-binsamalagarye, e-daed ogwamalagarye, degidbali, Bab-Dummad dulemarga isgued elinonikoye. We-igarmargi sunmaklegedi Jerusalén-akar onodoye sognaid.’

⁴⁸ Ar bemar-sunnad we-igargan-angi-gusad daksamarsoggu, baiganga bemar sogmarmogo.

⁴⁹ ”Emide, an-Bab bemarga sogsagusad, an bemarga ukoye, a an bemarga barmidagoed. Jerusalén-neggweburgi be edarbemalo, nibneg-akar burba-gangued bemarse nonikoedse.”

⁵⁰ Degi, Jesús, Betaniaʼse e-sapingan sesagusad. Agi na e-argan niba-onakwidgu, e-sapingangi ise-nued binsasad.

⁵¹ E-sapingangi-ise-nued-binsagwichidgi, Jesús emargi banguded, nibnegse nakwide gusad.

⁵² Geb e-sapingana, Jesús-nug-ogannodmalad. Nue-weligwaledba gannar Jerusalénʼse aligusmalad.

¹¹ Ar Jesús-nuggi-barmilesmaladdi omegan-emarga-ibmar-soged binsa ee gordimaladyob daksamarsoggu, bengudmalad.

¹² Ar Pedrodi gwisgudgu, neg-uanse abarmakde gusad. Neg-uan mosgu, yaba atakdegu, atuedbi bukwa daksad. Ar Pedro weyob-ibmar-gusad geger dake, negse nade-gusad.

¹³ Degine, amba a-ibagi Jesúsba-nanaimalad-warbo Emaús-neggweburse nadap-gusmalad. A-neggwebur Jerusaléngi wachi-irbo-nanalegedgi egi siid.

¹⁴ Ebo na sunmaknadap-gusmalad bela wemar-ibmarmar gusadgi.

¹⁵ Ebo na sunmaknadapmargu, na muchub-muchub na ese egisnadapmargu, Jesús-sunnad ese warmaknonikid, eba nadap-gusmogad.

¹⁶ Ar wemar-warbogwad e-ibya bargalesad, adi mer Jesús mag-dake-gumalagar.

¹⁷ Jesús amarga sogded: —¿Wede ibigi bemar sunmaknadapi, degine, ibiga bemar bukib-itomala?

¹⁸ Emar-gwensak, Cleofas-nugad, abin-imakdegu ega sogded: —¿Ar unnila bebi-wargwennaa dule-gwapid Jerusaléngi bela emi-ibagangi ibmarmar-gusad wichulid gudiisi?

¹⁹ Geb Jesús, abin-sogded: —¿Ibu-ibmala? Geb abin-imakdemalad: “Jesús-Nazaretginedgi bela ibmarmar gusad. We-Jesús Bab-Dummad-gaya-burba-berbeged, gandikidba nued Bab-Dummad-asabin, degi, dulemar-asabin ibmar-saed, degi, gandikidba-sunmaked-dulebalid.

²⁰ Degine, dule-irwa-Bab-Dummadse-gormalad-e-dummagan, degi, anmar-neggwebur-dakmamaid Roma-dummadga Jesús-uksamalad, adi oburgwemalagar. Geb degine, nakrusgi Jesús-bioksa-gusmarbali.

²¹ “Ar anmardi we-Jesúsgi binsadii-gusad, we-dule Israel-dulemar-abonogoedye. Ar emigindi, ibapaagus we-igargan deyob-gusad-akalad.

²² “Ar omegan-anmar-abargi-bipirmakdimogad, amba yo-nue-neg-ibgued-idu neg-uanse nade-gusmalad. A-omegan geger-ito anmar-imaksad.

²³ Ar ade Jesús-san neg-uangi gwen mai daksasurmarsoggu, anmarga sognonimalad, emarde ibya apurusmarye, angermar-daksamarye. A-angermar ega sogsamarye, Jesús dula gudiiye.

²⁴ “Degine, anmar-sordamar neg-uanse nade-gusmalad, ar igi omegan sogmala, deyob dakdapmalad, ar Jesúsdi gwen daksasurmalad.”

²⁵ Geb degi Jesús amar-warbogwadga sogded: “Bemar non-sered gumar, degine, Bab-Dummad-gaya-burba-berbemalad-sogsamalad-bengumalad-dulemarbalid.

²⁶ ¿Ar Cristode bela-bela e-nug-odunguleged-iduar weyob wileger-gebsursi? Eye, deyob wileger-gebed.”

²⁷ Geb Jesús sogdebar, Moisés sogsad narmakar naidgi, degine, bela Bab-Dummad-gaya-burba-berbesmalad sogsamaladgi, degi, bela Bab-Dummad-Gardagi egi sognaidgi. Amar-warbogwadga Jesús bela sogsa-gusad.

²⁸ Na neggwebur-nadapmaladse warmaksamargu, Jesúsdi yamo-imaksad edi nadegu saoeyob.

²⁹ Ar emar-warbomalad Jesúsgi ise-alamaknai gusmalad, ega sogdemalad: —Bato neg-sedosgussoggu, neg-mutikgualid, degisoggu, anmarba be besun. Degisoggu, Jesús, emarba bessunnad.

³⁰ Geb degi Jesús emar-abargi mesa-naba sii, madu susad, Bab Dummadga dog-nuedye sogsagu, madu biske-biske imaksad, geb emarga uksasunnad.

³¹ Geb degi e-warbogwad mag-Jesús-dakdemalad. Geb agi Jesúsdi egi binnidsunnad, gwen bar daksasurmalad.

³² Geb degi ega na muchub-muchub sokarmalad: —¿Ar igarba danigu, anmarga Bab-Dummad-Gardagi sunmakdanigu, anmar-gwagede nue-weligwar itodani-gussursi?

³³ Wemar-warbomalad a-wachigi yoga gwisguar imaksamalad, gannar Jerusalénse ali-gusmalad. Jerusalénse nonimargu, e-ambe-gakagwensak Jesús-nuggi-barmilesmalad, degi, baigan-eba-bukmarmogad danar-bukwa daknonimalad,

³⁴ sogbukmalad: —Ar Dummad-Jesús nue gannar durgusye, Simónse Jesús na magarosye.

³⁵ Geb degi emar-warbogwad amarga sogdesun, igi igarba gusmala, degine, igi Jesús madu bichidgu, emar mag-Jesús-daksamala.

³⁶ Jesús-sapingan amba we-ibmargangi sunmakbukmala, Jesús emar-abargi gwisgunonikid, emarga sogded: —¡Na, degite! Bemar, gwage bogidikidgi gudigumarsun.

³⁷ Jesús-sapingandi gwakidmargu, dobgudmalad, sergan-dakye binsadmalad.

³⁸ Ar Jesúsdi amarga sogded: —¿Ar ibiga bemar dobe itomarsunna, degine, ibiga deyob bemar ulubgi binsamarsunna?

³⁹ An-argan, degine, an-mali bemar dakmar. Be an-ebumar, adi bemar mag dakmalagar an-sunnad an gudiid. Ar burbadi sana, degine, garmar sulid, ar andi sana, degi, garmar nikad. Be an-dakmalana.

⁴⁰ Ar degi-soggwichi, ega e-argan, degi, e-mali oyoded.

⁴¹ Ar e-sapingandi weligwaledba Jesús-durgusad bengudmalad, geger dakdemalad. Degisoggu, Jesús amarga sogdesunnad: —¿Ar bemar mas-gunned wis nikmala?

⁴² Geb degi e-sapingan ua-naraled bisgar, degi, achanis ega uksamalad.

⁴³ Jesús na e-sapingan-annik susgua, amar-asabin, ua, degi, achanis, guchad.

⁴⁴ Jesús amarga sogded: —Ar bela-angi-gusad we-ibmarmargi an bemarga bato sunmaksamalad, deun amba an bemar-abargi gudigu. Ar bela angi narmakar-naidba guer-gebed, igi Moisés-igargi, degi, Bab-Dummad-gaya-burba-berbemalad-narmaksamalad, degi, Salmosgi narmakar-naidba bela angi deyob guer-gebed.

⁴⁵ Geb degi Jesús na e-sapingan magar-itoged imaksad, adi mag itomalagar, igi Bab-Dummad-Gardagi-narmakar-naid nue sognai.

⁴⁶ Jesús amarga sogded: “Weyob-narmakar-naid, a-narmakar-naidba Cristo-wileger-gebed, degi, burgwar-mai ibapaagwad-sorba gannar durguer-gebed.

⁴⁷ Degine, bela we-napneggi neggweburmar-nanaidgi Cristo-nuggi sunmakleger-gebed, dulemar na e-iskuedga bukib itoged, adi e-daed ogwamalagar, degi, Bab Dummad dulemarga iskued elinoni-daed igargi. We-igargan-sunmakleged Jerusalén-akar onodoed.

⁴⁸ Ar bemar-sunnad we-igargan angi gusad daksamarsoggu, baiganga bemar sogmarmosunnodo.

⁴⁹ “Emide, an-Bab bemarga sogsa-gusad, an bemarga ukoye, a an bemarga barmidagoed. Jerusalén-neggweburgi be edarbemalo, nibneg-akar burba-gangued bemarse nonikoedse.”

⁵⁰ Degi Jesús Jerusaléngi e-sapingan-bukwad-onosad, Betaniase sesa-gusad. Agi na e-argan niba onakwidgu, e-sapinganga sogded: —Bab Dummad bemargi nued binsaena-gadin.

⁵¹ Degine, Jesús na e-sapinganga degi-sunmakgwichi, egi nued binsasgu, banguded, degi, edi nibnegse nakwidsunnad.

⁵² E-sapingandi, Jesús-Bab-Dummadyob-daksadba e-nug ogannodmarsunnad, nue-weligwar gannar Jerusalénse aibirismarsunnad.