Lucas 23:2-48 in San Blas Kuna

² Geb degi, Judío-dummagan weyob Jesúsʼgi sognai guarmalad: —Anmar we-dule dulemar-binsaed-gadii itosad, sogdii, mer Roma-Dummad-Césarʼga mani ukoye. We-Jesús na dukin sogdiid, ede reyye, ede Cristoʼye.

³ Geb degi, Pilato Jesúsʼse egichialid, ega sogded: —¿Ar be Judíoʼmar-e-Rey? Jesús, abin-imakdegu, sogded: —Ar bede soged. Napirado.

⁴ Degine, Pilato, dule-irwa-Bab-Dummadse-gormalad-e-dummaganga, degi, dulemar-bukmaladga sogded: —An dakgua, we-dule gwen ibmar-oakalossur an daked.

⁵ Ar dulemar bur bule sogdemalad: —We-Jesús dulemar-oimakdiid. Bela Judea-yalaganba dulemar-odurdakdiid. Galilea-akar onoalid, emide, wesegus naid.

⁶ Geb degi, Pilato itoargu, dulemar soge, we-dule Galilea-akar noarye, egisdesunnad: —¿We-dulede, Galileaʼginedi?

⁷ Pilato itoargu, Herodes-negdakmaidgi Jesús daniki, Herodesʼse barmissunnad. Ar ade, deun Herodes Jerusalén-neggweburse gudimogad.

⁸ Herodes, Jesús-dakargu, weligwar itosad. Ar ade, dikasurgus Jesús-dakbigudiid. Degi, Herodesʼde, dulemar Jesúsʼgi-bukidar-sunmaked itodiid. Degisoggu, Herodes binsadsunnad, Jesús e-wagab ibmar-dakledisulid ega imakoergebye.

⁹ Herodes, Jesúsʼse bukidar ibmar-egisnai gualid. Ar Jesúsʼdi gwen abin-imaksasulid.

¹⁰ Degine, dule-irwa-Bab-Dummadse-gormalad-e-dummagan, degi, Garda-Narmaked-Dulemar Herodesʼga gannar-gannar Jesúsʼgi sunmaknanai guarmalad.

¹¹ Geb degidbali, Herodes, e-suar-ibganmala, ibgwensur Jesús-dakded, egi dododed. Reymaryob ega mor-nued yosmarsunnad. Geb degi, Herodes, gannar Pilatoʼse Jesús-barmisad.

¹² A-ibagine, Pilato, Herodes-ebo gannar ai-nuedga gunonikid. Ar ade, iduardi ebo urwedimalanad.

¹³ Geb degi, Pilato, dule-irwa-Bab-Dummadse-gormalad-e-dummaganse, negsemamaidse, degi, bela-dulemarse, gochad.

¹⁴ Geb amarga sogded: —We-dule-be-anga-senonimalad, egi be anga sognonimalad, we-dule, neg-gagadiiye. Ar bemar-wagab an ese ibmar egichisad. Degite, we-dule neg-ichodiiye bemar sogedi, gwen an deyob daksulid.

¹⁵ Ar Herodesʼbela gwen-neg-oakalossuli daksamogad. A-ulale, gannar anse we-dule barmialid. Degisoggu, Jesús gwen-neg-oakalossursoggu, oburgwilegewilubsulid.

¹⁶ Unnila an nue-sabsur-odurdakoed. A-sorba, an we-dule onogoed.

¹⁷ Ar ibagi, gusgu Pilatoʼde igar-maidba dule-wargwen-esgaryagi-mellesiid onodaed.

¹⁸ Ar dulemar-bukidar-bukwaddi bela dule-wargwennayob oimakdemalad, sogdemalad: —¡We-Jesús be oburgwe! ¡Barrabás be anmarga onoge!

¹⁹ We-Barrabásʼde Jerusalénʼgi, Roma-dulemargi gwisgusad-ular, degi, dule-oburgwisbalid-ular, esgaryagi metegusmalad.

²⁰ Pilato Jesús-onobiedba idu-sogsadyobi gannar dulemarga sogdebalid.

²¹ Ar dulemardi oimakdemarbalid: —¡Nakrusgi bioke! ¡Nakrusgi bioke!

²² Geb Pilato gannar ilapaagi dulemarga sogdebalid: —Ar degite, we-dulede, ¿ibu-ibmar-isgana-imaksa be dakmarsunna? Ar gwen ibmar-isgana imaksasur an daked. Degisoggu, oburgwilegewilubsulid. Unnila an nue-sabsur-odurdakoed. A-sorba, an we-dule onogoed.

²³ Ar dulemardi binnasuli oimakdemalad, nakrusgi Jesús-biokye, sogdemalad. Ar degite, dule-irwa-Bab-Dummadse-gormalad-e-dummagan, degi, dulemar-oimakbukwad-sogedba bur imaklesad.

²⁴ Geb degi, Pilato dulemar-egisbukwadba imaksasunnad, Jesúsʼga nakrusgi-oburgwed-igar mesissunnad.

²⁵ Pilato, dulemarga, Barrabás-Roma-dulemargi-gwisgusadi, emar-oburgwisad-ular-esgaryagi-mellesiid, onossunnad. Geb Pilato suar-ibmalaga Jesús-uksasunnad, adi, dulemar, e-itolegedba Jesús-imakmalagar.

²⁶ Roma-suar-ibgan Jesús-sesmargu, dule-wargwen Jerusalénʼse-dani abinguarmalad. We-dulede, Cireneʼginedid, Simónʼye nugad. Gandikidgi a-dule-gasmalad, agine, e-gukingi nakrus-mesismalad, adi, Jesús-sorba nakrus-semai guegar.

²⁷ Dulemar-bukidar Jesús-sorba duurmaknadap gusmalad. Omegandi, Jesúsʼga bonadapi, degi, bukib-binsaedba ega oimaknadapi gusmalad.

²⁸ Jesús omegansik aibiridgua, amarga sogded: “Omegan-Jerusalénʼginmalad, mer anga be bomar. Na dukin be bomar, be-mimmiganga be bomar.

²⁹ Ibagan nonikoed, dulemar sogdamaloed: ‘Omegan-geg-mimmi-nikumaladgi ise-nued binsalesye. Omegan-gusgu-muu-neggi-geg-gurgin-nikumaladgi ise-nued binsalesye. Degi, omegan-mimmigan-onussurmaladgi ise-nued binsalesye,’ sogdamaloed. ‘Ar we-omegandi na-e-mimmiganba gwen wilegosulid.’

³⁰ Geb degi, dulemar sabsur-wilenaidba yarmarga sogdemaloed: ‘¡Be anmargi batedage!’ Yar-mulluganga sogdemaloed: ‘¡Be anmar-omursunna!’

³¹ ”Anbela an gwen-neg-oakalossulid-inigwele, weyob an-imaknanaid. Dule-neg-oakalosar-bulesunna, bur bule wiomalodo.”

³² Suar-ibgan dule-isganamar-warbo oburgwemalaga Jesúsʼba semai gusmarbalid.

³³ Nonogarye-neg-nugadse mosmargu, agi nakrusgi Jesús-bioksamalad. Dulemar-isgana-warbogwad nakrusgi bioklesmarmogad. Wargwen, Jesús-argan-nuedsik ogwichismalad. Baiddi, Jesús-argan-sapiledsik ogwichismalad.

³⁴ Degi, Jesús sogded: “Bab-Dummad, we-dulemar isgussuliyob be dako, ar wissurmalad ibu imaknanai.” Degi, suar-ibgan Jesús-morgi dodoarmalad, wilubdaknai-guarmalad, igid-mor emargadga guodibeye. A-sorba, Jesús-mor mimismarsunnad.

³⁵ Degine, dulemar-bukidar neg-gunaid dakbukwa gusmalad. Ar neggwebur-dakmamaidi, Jesúsʼgi dodonai gusmalad, sogdedamalad: —Ar ede, dule-baigandi nabir bendaksad. Ar we Cristoʼle, Bab-Dummad-susadile, na dukin bendakdo.

³⁶ Amba suar-ibgan Jesúsʼgi dodonanai gusmarmogad. Geb gobega, vino-gagbid ega senonimalad,

³⁷ ega sogdemalad: —Ar be Judíoʼmar-e-Reyle, na be dukin bendakdo.

³⁸ Jesús-nakrus-birgi, Griego-gayaba, Latín-gayaba, degi, Hebreo-gayaba, weyob narmakar-nai gusad:

³⁹ Dule-isgana-wargwen, Jesús-dikarba-nakrusgi-biokar-naimogad, Jesúsʼgi isdar-sunmaknai gusmogad, ega sogded: —Ar be Bab-Dummad-dule-yoedse-barmidagoye-sogsad-dulesursi. Degite, na be dukin bendake. Be anmar-bendakmoga.

⁴⁰ Agine, nakrusgi-biokar-naid-baid, Jesúsʼgi-isdar-sunmaknaid-abin-imakded, ese uluded, ega sogded: —Ar Jesús-sunnaa be burgwe-sognaimogad. Degite, ¿be Bab-Dummad-dobsurde?

⁴¹ Ar anmardi nabiridba wilenaid. Ar anmardi, ibmar-isgana-imaksadba odurdaklenaid. Ar we-duledi, gwen ibmar-isgana imaksasulid.

⁴² Geb degi, Jesúsʼga sogded: —Be Reyga-negdakmaidgi-danikir, be an-insao.

⁴³ Geb degi, Jesús, abin-sogded: —Napira an bega soged, emi-ibagi Neg-Nued-naidgi be anba gudiguoed.

⁴⁴ Degine, yorukugusgua, bela napneggi negsichid nagusad, wachi-irbaase naigusad.

⁴⁵ Degine, dad-ibeler gwen bar gassulid. Jerusalénʼgi Bab-Dummadse-goled-neggi, Neg-Islidikid-irwa-mor-naid, negabar achirmakde gusad.

⁴⁶ Geb degi, Jesús binnasur goted, sogded: “Baba, be-argangi an-san-burba an uksun.” Deyob-sogsad-sorba, Jesús burgwided.

⁴⁷ Roma-sorda-dulatar-sediid (100), weyob-ibmar-gusad daksagu, Bab-Dummad-nug ogannoded, sogded: “Ar we-dule, dule-nueddaed-napiragwadid, gwen-ibmar-oakalossulid.”

⁴⁸ Bela dulemar-bukidar, Jesús nakrusgi-burgwenaid-dakbukmalad, bela we-ibmargan-gusad daksamargu, bela-bela na bukib binsadmalad, na dukin-dukin binasgargi sarsonanai negse nadmalad.

² Geb degi Judio-dummagan Jesúsgi sognai-guarmalad, sogdemalad: —We-dule anmar itosad, dulemar-binsaed gadii, sogdii, mer Roma-Dummad-Césarga mani ukoye. We-Jesús na dukin sogdiid, ede reyye, ede Cristoye.

³ Geb degi Pilato Jesússe egichialid, ega sogded: —¿Ar be Judiomar-E-Rey? Jesús, abin-imakdegu, sogded: —Ar bede soged.

⁴ Degine, Pilato sogded, dule-irwa-Bab-Dummadse-gormalad-e-dummaganga, degi, dulemar-bukmaladga: —An dakgua, we-dule ibmar-gwen-oakalossur an daked.

⁵ Ar emar bur-bule sogdemalad: —We-Jesús dulemar-oimakdiid, bela Judea-yalaganba dulemar-odurdakdiid, Galilea-akar onoalid, emide wesegus naigusad.

⁶ Geb degi Pilato itoargu, dulemar soge, Galileaye, egisdesunnad: —¿We-dulede Galileaginedi?

⁷ Pilato itoargu, Herodes-neg-dakmaidgi Jesús daniki, Herodesse barmissunnad. Ar ade deun Herodes Jerusalén-neggweburse gudimogad.

⁸ Herodes, Jesús-dakargu, weligwar itosad, ar ade dikasurgus Jesús-dakbigudiid. Herodesde itodiid, dulemar bukidar Jesús-ibmar-imakdiidgi sunmake. Degisoggu, Herodes binsadsunnad, Jesús e-wagab ibmar-dakledisulid ega imako insaye.

⁹ Herodes ibmar-bukidar Jesússe egisnai-gualid, ar degite Jesús gwen Herodes-abin imaksasulid.

¹⁰ Degine, dule-irwa-Bab-Dummadse-gormalad-e-dummagan, degi, escribamar Herodesga Jesúsgi binnasur sunmaknanai-guarmalad.

¹¹ Geb degi Herodes, na e-suar-ibganmala, Jesús ibgwensur dakded, egi dododed, reymar-mor-nued-yoedyob, ega yosmarsunnad. Geb degi Herodes Pilatose gannar Jesús-barmisad.

¹² A-ibagine Pilato, degi, Herodes-ebo ailesad, ar ade iduardi ebo urwedimalanad.

¹³ Geb degi Pilato, dule-irwa-Bab-Dummadse-gormalad-e-dummaganse, neg-semamaidse, degi, bela-dulemarse gochagu,

¹⁴ amarga sogded: —We be-anga-senonimalad, be anga sognonimalad, we neg-oimakdiiye. Ar bemar-wagab an ese bela ibmar egichisgu, gwen an daksulid, we neg-ichodiid. Deginbali, egi-be-sunmakmalad gwen deyob an daksurbalid.

¹⁵ Ar Herodesse-bakar, an ese barmisgu, Jesús gwen ibmar oakalossuli daksamogad. Ar degisoggu, Jesús ibmar-iskana-gwen-imaksasursoggu, oburgwilege-wilubsulid.

¹⁶ Degisoggu, an nue odurdaksad-sorba an we-dule-onogodo.

¹⁷ Ar ibagi Pilatode gusgu igar-maidba dule-wargwen-eskaryagi-mellesiid ono-daed.

¹⁸ Ar dulemar-bukidar-bukwaddi bela dule-wargwennayob oimakdemalad, sogdemalad: —¡We-Jesús be oburgwe, Barrabás be anmarga bur onoge!

¹⁹ We-Barrabásde eskaryagi-mete-gusmalad, ar ade Jerusaléngi, Roma-dulemargi gwisgusgu, neg-oimakdigu, dule-oburgwisad.

²⁰ Pilato Jesús-onobiedba idu-sogsadgii gannar dulemarga sogdebalid.

²¹ Ar dulemardi gannar oimakdemarbalid: —¡We-dule nakrusgi bioke! ¡We-dule nakrusgi bioke!

²² Geb Pilato gannar ilapaagi dulemarga sogdebalid: —¿Ar degite, we-dulede ibu-ibmar-iskana wede imaksasunna? An dakgua, ibmar-iskana gwen imaksasursoggu, oburgwilege-wilubsulid. Degisoggu, unnila an odurdakodo, geb degi an onosunnoed.

²³ Ar emardi binnasur oimakdemalad, sogdemalad: —¡We-Jesús nakrusgi bioke! Ar degite, dule-irwa-Bab-Dummadse-gormalad-e-dummagan, degi, dulemar-oimakbukwad-sogedba bur imaklesad.

²⁴ Geb degi Pilato dulemar-egisbukwadba imaksasunnad, Jesúsga nakrusgi-oburgwed-igar mesissunnad.

²⁵ Dule Roma-dulemargi gwisgusgu, neg-oimakdii dule-oburgwisad-ular, eskaryagi mellesiid, a-dule Pilatose egichismalad ega onoye, a ega onossunnad. Geb Jesúsdi suar-ibmalaga uksasunnad, adi dulemar na igi Jesús imakbiedba imakmalagar.

²⁶ Roma-suar-ibgan Jesús-sesmargu, dule-wargwen Simón-nugad, Cirenegined, Jerusalénse-dani abinguarmalad. A-Simón ise-gandikidgi gasmargu, e-gukingi nakrus mesismalad, adi Jesús-sorba nakrus-semai-guegar.

²⁷ Dulemar-bukidar Jesús-sorba duurmaknadap-gusmalad. Omegandi ee bonadap, Jesúsga oimaknadap-gusmalad.

²⁸ Ar Jesús omegansik aibiridgua, amarga sogded: “Omegan-Jerusalénginmalad, mer anga be bomar, na dukin be bomar, degi, be mimmiganga be bomar.

²⁹ Ar ade ibagan-bulegan nonikoed, sognonimaloed: ‘Omegan-geg-mimmi-nikumalad, we-omegan-gusgu-geg-muu-neggi-gurgin-nikumalad, gwen-mimmigan-onussurmalad, we-omeganga bur ib-nuedga gusye, ar ade we-omegandi na-e-mimmiganba gwen wilegosulid.’

³⁰ Geb degi dulemar sabsur-wilenaidba Yarmarga sogdamaloed: ‘Anmargi bur be batedamar.’ Degi yar-mulluganaga sogdamarbaloed: ‘Bur be anmar emurmar.’

³¹ “Sapi-dinnagwad bur-bule sapi-makidba gummaked, ar deyobmodo, ar yaisur an wiomalale, ar dulemar-iskudimalad-bursunna, bur-bule wiomalodo.”

³² Suar-ibgan dulemar-iskanamar-warbo Jesúsba semai-gusmarbalid, oburgwemalagar.

³³ Dule-Nonogarye neg-nugadse omosmargu, agi nakrusgi Jesús-bioksamalad. Dulemar-iskanamar-warbogwad nakrusgi bioksamarmogad. Wargwen Jesús-nakrus-argan-nuedsik ogwichismalad, baiddi, Jesús-nakrus-argan-sapiledsik.

³⁴ Degi Jesús sogded: —Bab Dummad, wemar iskunaisuliyob be dakoed, ar wichurmalad ibu imaknanai. Degi, suar-ibgan Jesús-morgi dodoarmalad, wilubdaknai-guarmalad, igid-mor emargadga guo-dibeye. A-sorba Jesús-mor mimmismarsunnad.

³⁵ Degine, dulemar-bukidar dakbukwa-gusmalad, neggwebur-dakmamaidse-bakar Jesúsgi dodonai-gusmalad, sogdemalad: —We-Jesús dule-baigandi nabir bendaksad. Ar we Cristole, Bab Dummad susadile, na dukin bendakdo.

³⁶ Amba suar-ibgan Jesúsgi dodonanai-gusmarmogad, inna-gaibid ega senonimalad, ega uknonimalad,

³⁷ ega sogdemalad: —Ar be Judiomar-E-Reyle, na be dukin bendakdo.

³⁸ Jesús-nakrus-birgi narmakar nai-gusbalid, Griego-gakaba, Latínba, degi, Hebreoba. Sognai-gusad:

³⁹ Dule-iskana-wargwen, Jesús-dikarba-nakrusgi-biokar-naimogad, egi dodonai-gusmogad, ega sogded: —Ar be dule-Bab-Dummad-yoedse-barmidagoye-sogsad-dulele, na be dukin bendakdo, degine, be anmar-bendakmodo.

⁴⁰ Agine, nakrusgi-biokar-naid-baid Jesúsgi-dodonaid-abin-imakded, ese uluded, ega sogded: —¿Ar be we-Jesús sunnaa burgwe sognai-inigwele, degite be Bab-Dummad-dobsuli?

⁴¹ Ar anmardi napiragwadba wilenaid, ar anmar ibmar-imaksadba odurdaklenaid. Ar wedi, ibmar-iskana gwen imaksasulid.

⁴² Geb degi Jesúsga sogded: —Reyga-mai be-neg-dakmaidgi na-be-danikir, be an-insao.

⁴³ Geb degi Jesús, abin-sogded: —Napira an bega soged, emi-ibagi nibneg-nued-naidgi be anba gudiguoed.

⁴⁴ Degine, yorukugusgua, bela napneggi neg-sichid-nagusad, wachi-irbaase naigusad.

⁴⁵ Degine, dad-ibeler gwen-bar-gassulid. Jerusaléngi Bab-Dummadse-goled-neggi, Neg-Islidikid-irwa mor-naid, negabar achirmakde-gusad.

⁴⁶ Geb degi Jesús binnasur gotegu, sogded: —Baba, be-argangi an-san-burba an uksun. Degi-sogsad-sorba, Jesús burkwis naded.

⁴⁷ Roma-sordamar-dulatar-sediid, weyob-ibmar-gusad daksagu, Bab-Dummad-nug ogannoded, sogded: —Ar we-dule ibmar-gwen-oakalossulid, dule-nued-sunnadid.

⁴⁸ Bela dulemar-bukidar, Jesús nakrusgi-burgwenaid-dakbukmalad, bela we-ibmargan-gusad daksamargu, bukib-binsamaladba, na dukin binasgargi na sarsonanai negse nadmalad.