Lucas 22:31-62 in San Blas Kuna

³¹ Dummad-Jesús sogdebalid: —Simón, Simón, be dake, nia-saila-Satanás trigo-madubur-omukulegedyob-bemar-imakega bemar-egichis gudiid, adi, isguedgi bemar-egwanegar.

³² Ar andi, Bab-Dummadse bega gochad, adi, ulubgi be angi-bensulid mer galakuegar. Unnila ichesaale be angi bangudoed, gannar be anse aibilisale, be-gwenadgan be ogannogo, adi, gatik anba nagumalagar.

³³ Pedro, Jesús-abin sogded: —Dummad, an beba naegale an guagwar gudiid. An beba esgaryase-melleye sogele, beba an burgweye sogele, an guakwagwad.

³⁴ Jesús, abin-sogded: —Pedro, an bega soged, gannir-namaked-iduar ilapaa be an-osulogoed.

³⁵ Jesús e-sapinganga sogded: —Deunni, sagu suli, mani-seed-sagu suli, degi, sapat suli an be-barmisgu, ¿bemarga ibmar akusmala? Jesús-abin, sogdemalad: —Suli. Unniguar anmar ibmar-nikagusmala.

³⁶ Jesús sogdebalid: —Emisgindi, an bega sogmardo: Dule sagu-nikale, sedo. Mani-urbed-sagu-nikale, sedbalo. Ar dule es-suid sulile, na e-suba uko, adi, a-manigi es-suid bakegar.

³⁷ An bemarga sogmalad, ar angi Bab-Dummad-Gardagi-narmakar-naid-sogedba guergebed. Weyob sognaid: ‘Dulemar-isgumaladyob imaklesmogad.’ Isaías 53:12 ”Ar deyob angi-narmakar-naidyob guergebed.”

³⁸ Geb degi, e-sapingan sogded: —Dummad, anmar es-suid-warbo nikmala. Jesús, abin-sogded: —Mer bar we-ibmargi sunmakmar.

³⁹ Jesús neggweburgi-nodgua, Olivos-yarse nadegusad, ar ade, gusgu a-yarse naddaed. E-sapingan eba nade gusmarmogad.

⁴⁰ Emar-nadapidse warmaksamargu, Jesús e-sapinganga sogded: —Bemar isguedgi-wilubdaklegedgi mer galakumalaga, Bab-Dummadse gormar.

⁴¹ Jesús na e-sapingangi bannabasaar naded. Agi yokorgi sindigar sigisgu, Bab-Dummadse goted.

⁴² Sogded: “Baba, an-idu, ina-gagbid-gobedyob beedse igar-buled-naidgi wilebisur be an-abegele, melle be an-wiogodo. Degi-inigwele, an-sogedbarsuli, unnila be-sogedba be imakoed.”

⁴³ Geb agine, baliwitur-wargwen Jesús-ogannogega nibneg-akar aidenonikid, ese magarononikid.

⁴⁴ Ar Jesús bela-bela nue-surbinsa-itogusgu, bur bule Bab-Dummadse gorsigisad. E-wimakedi abeyob napase dedemaknai gusad.

⁴⁵ Jesús Bab-Dummadse-gorsiid-gwisgusgu, e-sapingan-bukwadse nonikid, daknonikid, bukib-binsamaladba gabmamai.

⁴⁶ Jesús amarga sogded: —¿Ar ibiga bemar gabmamai? Gwisgumala, Bab-Dummadse gormala, adi, isguedse be wilubdaklearmalar melle galakuegar.

⁴⁷ Jesús amba e-sapinganga sunmakgwichi, dulemar-bukidar ese duurmaknonikid. E-ambe-gakabogwad-wargwenad-Judas, emar-idudanikid. A-dule Jesúsʼse warmaknonigu, ega nuedye-sogega ei-wagar unonikid.

⁴⁸ Degi, Jesús ega sogded: —Judas, ¿wagar-uar, Dule-Machi darba be uke?

⁴⁹ Jesúsʼba-gudimalad dakdegu, igi igargan gudagoe, Jesúsʼga sogdemalad: —Dummad, ¿anmar es-suidgi dulemar-eware?

⁵⁰ Jesús amba yoo abin-imake, e-sapin-wargwen dule-irwa-Bab-Dummadse-goled-bur-dummad-e-mai naibi-imaksad, e-uaya-nuedsikid ei siksad.

⁵¹ Geb degi, Jesús ega sogded: —¡Gusa! Mer bar ese achae. Geb Jesús dule-uaya-ebusa imaksad, dule-onudaksad.

⁵² Degi, Jesús dule-irwa-Bab-Dummadse-gormalad-e-dummadga, suar-ibmala-Bab-Dummadse-goled-negdakmalad-e-dummaganga, degi, Judío-girmar-dummagan-ese-nonimaladga sogded: —¿Ibiga bemar dule-ibmar-atursaed-gaeyobi anbina es-suiganyalaba, suarmaryalaba be danimala?

⁵³ Bane-bane an bemar-abargi Bab-Dummadse-goled-neggi gudigusgu, gwen be an-gassurmalad. Ar emigindi, bemar-an-gamalaga, ibagan nonikid, degi, nia-sogedba ibmar-imaked-iba nonibalid.

⁵⁴ Dulemar Jesús-gasmargu, dule-irwa-Bab-Dummadse-goled-bur-dummad-negse sesmalad. Agine, Pedro bannabasaar Jesúsʼba nadap gusad.

⁵⁵ Degi, suar-ibmala neg-imba-abargi soo-ogasmalad, a-dikarba sigismalad. Geb Pedro amar-abargi signonimogad.

⁵⁶ Bunagwa-arbaedi, soo-naba Pedro-sii dakargu, nuu dakded, sogded: —We-dule Jesúsʼba gudigusmoga.

⁵⁷ Pedro osulosad, sogded: —Bunagwa, we-dule aku an dake.

⁵⁸ Degi, doga-nadsuli, dule-baid Pedro-dakarmogad, ega sogdemogad: —Be-dule amba Jesús-sordamogad. Pedro, abin-sogded: —An a-sordasuli.

⁵⁹ A-wachi-irgwen-nasad-sorba dule-baid sokarmogad: —Nabiri, we-dule Jesúsʼba gudigusmoga. Be dake, Galilea-dolad.

⁶⁰ Geb degi, Pedro sogded: —An wissuli ibugi be anga sunmakgwichi. Pedro amba sunmakgwichidgi gannir namakalid.

⁶¹ Geb degi, Dummad-Jesús, Pedro-dakdegu, Pedro, ebinsaas-naded, igi Jesús ega ibmar sogsa: “Gannir-namaked-iduar ilapaa be an-osulogoye.”

⁶² Degi, Pedro magaba nodgu, ise-boar naded.

³¹ Dummad-Jesús sogdebalid: —Simón, Simón, be dake, igi madubur-gwagwaled-e-uka-miega omukulege, deyob nia-saila-Satanás bemar-imakega bemar-egichis-gudiid, adi iskuedgi be-egwanegar.

³² Ar andi bega Bab Dummadse gochad, adi ulubgi be an-bensulid mer galakuegar. Gannar mag-neg-ito be anse aibilisale, be-gwenadgan be oganno nao, adi gatik anba nagumalagar.

³³ Pedro, Jesús-abin sogded: —Dummad, an guagwar gudiid an beba naegar, unnila eskaryasebisur, ar burgweye soger, amba an ginbalid.

³⁴ Jesús, abin sogded: —Pedro, an bega soged, gannir-namaked-iduar ilapaa be an-osulogoed.

³⁵ Jesús na e-sapinganga sogded: —Deun sagu suli, mani-seed-sagu suli, degi, sapat suli an be-barmismargu, ¿bemarga ibmar akusmala? Jesús-abin, sogdemalad: —Suli, unniguar anmar ibmar-nika-gudigusmalad.

³⁶ Degi Jesús sogdebalid: —Emigindi, dule sagu-nikad na sedo, degi, mani-urbed-sagu sedbalo. Ar dule espunyar sulile, na e-suba uko, adi espunyar a-manigi bakegar.

³⁷ Ar an bemarga sogmalad, ar angi Bab-Dummad-Gardagi narmakar naid, amba a-sogedba guer-gebed, sognaid: Dulemar iskudimaladyob imaklesmoye. Is. 53:12 Jesús sogdebalid: —Ar weyob angi narmakar naid, ayob guer-gebed.

³⁸ Geb degi e-sapingan sogded: —Dummad, anmar espunyar-warbo nikmalad. Jesús, abin-sogded: —We unniguar.

³⁹ Jesús mas-gunsiid-neggi nodgua, nade-gusad, bia gusgu Olivos-yarse nad-daedse. E-sapingan eba nade-gusmarmogad.

⁴⁰ Emar-nadapidse warmaksamargu, Jesús e-sapinganga sogde: —Bemar Bab Dummadse gormar, adi iskuedgi wilubdakleged mer bemarse warmakmalagar.

⁴¹ Jesús na e-sapingangi banguded, nabir-akwa-mileged bangued-wilub. Agi yokorgi sindigar sigisgu, Bab Dummadse goted,

⁴² sogded: “Baba, an-idu igar-buled naid, ina-gaibid gobedyob beedse an egi wilegoed. Be anga osulobiele, be osulogo, ar degite an-sogedbarsur, unnila be-sogedbarbi be imakoed.”

⁴³ Geb degi anger-wargwen-nibalid ese magarononikid, Jesús-ogannogegar.

⁴⁴ Ar Jesús bela-bela nue-surbinsa-itogusgu, bur-bule Bab Dummadse gorsigisad. E-wimakedi abeyob napase dedemaknai-gusad.

⁴⁵ Jesús Bab-Dummadse-gorsiid gwisgusgu, e-sapingan-bukwadse nonikid, daknonikid, bukib-binsamaladba gabmamai.

⁴⁶ Jesús amarga sogded: —¿Ar ibiga bemar gabmamai? Bemar gwisgumar, Bab Dummadse gormar, adi iskuedgi wilubdakleged mer bemarse warmakmalagar.

⁴⁷ Jesús amba e-sapinganga sunmakgwichi, dulemar-bukidar ese duurmaknonikid, Judas, e-ambe-gakabogwad-wargwen, a emar-idudanikid. A-dule Jesússe warmaknonigu, ei-wagar unoni ega sogegar, be nued sogeye.

⁴⁸ Degi Jesús ega sogded: —Judas, ¿wegi wagar-uar ani Dule-Machi, darba be an-uke?

⁴⁹ Jesúsba-gudimalad dakdegu, igi igargan gudagoe, Jesúsga sogdemalad: —Dummad, ¿anmar espunyargi dulemar-eware?

⁵⁰ Jesús amba yo abin-imake, e-sapin-wargwen dule-irwa-Bab-Dummadse-gormalad-bur-dummad-e-mai naibi-imaksad, e-uaya-nuedsikid ei siksad.

⁵¹ Geb degi Jesús ega sogded: —Mer ese be bar achae. ¡Be indake! Jesús dule-uaya ebusgu, dule-onudaksad.

⁵² Degi Jesús dule-irwa-Bab-Dummadse-gormalad-e-dummaganga, suar-ibmala-Bab-Dummadse-goled-neg-dakmalad-e-dummaganga, degi, Judiomar-girmar-dummagan-ese-nonimaladga sogded: —¿Ibiga bemar dule-iskana-ibmar-atursaedyob an-gadanimala, emide espunyar, degi, suarmar-yalaba bemar an-gadanimargu?

⁵³ Bane-bane an bemar-abargi Bab-Dummadse-goled-neggi gudigusgu, agi bemar akar gwen an-imaksasurmalad. Ar emigindi bemarga wilubgan nonikid, degi, nia-sogedba ibmar-imaked-iba nonibalid, adi bemar an-gamalagar. Geb degi Jesús-gasmarsunnad.

⁵⁴ Dulemar Jesús-gasmargu, sesmalad, dule-irwa-Bab-Dummadse-goled-bur-dummad-negse. Agine, Pedro bannabasaar Jesúsba nadap-gusad.

⁵⁵ Degi suar-ibmala neg-imba-abargi soo-ogasmargu, a-dikarba sigismarsunnad. Pedro amar-abargi signonimogad.

⁵⁶ Bunagwa-arbaed, Pedro soo-naba sii dakargu, nuu dakdegu, sogded: —We-dule amba Jesúsba gudigusmogad.

⁵⁷ Ar Pedrodi osuloded, sogded: —Bunagwa, we-dule aku an daked.

⁵⁸ Degi Pedro sikwas-ichee-naded-sorba, dule-baid Pedro-dakarbargu, ega sogdemogad: —Be-dule amba Jesús-sordamogad. Pedro, abin-sogded: —Dule, an a-sordasuli.

⁵⁹ A-wachi-irgwen-nasad-sorba dule-baid sogdemogad: —Napiragwa, we-dule Jesúsba gudigusmogad, ar we Galilea-dolad.

⁶⁰ Geb degi Pedro sogded: —Dule, an wichuli ibu be anga obare. Geb degi, Pedro amba sunmakgwichi yog gannir namakalid.

⁶¹ Geb degi Dummad-Jesús, Pedro-dakdegu, Pedro, ebinsaas-naded, igi Jesús ega ibmar sogsad: “Gannir-namaked-iduar ilapaa be an-osulogoed.”

⁶² Degi Pedro magaba nodgu, nue-ise-boar naded.