Lucas 1:23-73

²³Pagtapos ta rilibo Zacarias, guli kanen i.

²⁴Paglambay ta pila na mga adlaw, Elisabet na sawa din gabagnes daw ula galin ta iran na istaran keteb ta limma bulan.

²⁵Elisabet an gambal, “Miad tak Ginuo Dyos an naluoy ki yaken. Ta tabang din, dili aren magayya naan ta mga ittaw tak dili aren baog.”

²⁶Na annem en bulan pagbagnes Elisabet, pasugo isab ta Dyos angil Gabriel na miling naan ta banwa na Nazaret na sakep ta Galilea.

²⁷May ambalen kanen an na alin ta Dyos para ta isya na dlaga na ula pa natandeg ta mama. Ngaran din an Maria daw nakagunan kanen an ta mama na ngaran din Jose na linai Ari David.

²⁸Gabriel i gapakita daw gaprani ki Maria daw gabugno, “Maria, sadya na adlaw para ki kaon. Napili ka para ta bakod na pribiliyo. Ginuo Dyos an gaubay ki kaon.”

²⁹Pagmati Maria, ula din naintindii daw ino beet ambalen ta angil daw gakullaw kanen an man-o tak iling tan ambal ki kanen.

³⁰Ambal pa ta angil, “Maria, dili ka madlek tak patagan ka ta Dyos ta bakod gid na pribiliyo.

³¹Mamati ka! Mabagnes ka daw magbata ta mama. Ngaranan no kanen na Jesus.

³²Kanen an may bakod na katengdanan. Umawen kanen an na Bata Ta Dyos Na Labaw Ta Tanan. Tagan kanen an ta Ginuo Dyos ta katengdanan na mag-ari paryo ta kaapuan din na Ari David.

³³Mag-ari kanen an naan ta mga linai Jacob ta ula katapusan. Dili matapos iya an na pagdumala.”

³⁴Pagmati Maria, gainsa kanen ta angil, “Man-o na mabagnes a na yaken i ula natandeg ta mama?”

³⁵Sabat ta angil ki Maria, “Dyos Ispiritu Santo an mabot ki kaon daw magbagnes ka paagi ta paglekkep ki kaon ta gaem ta Dyos Na Labaw Ta Tanan. Gani, bata an na matao ki kaon alin gid ta Dyos daw umawen kanen an na Bata Ta Dyos.

³⁶Lagen no Elisabet ya na imo na parinti. Dati kanen ya baog, piro anduni gabagnes en ta bata na mama, maskin kanen an manakem en. Anduni annem en bulan pagbagnes din an

³⁷tak ula impusibli ta Dyos.”

³⁸Pagmati Maria, ambal din, “Gapasakep a ta pagbeet ta Ginuo Dyos. Kabay pa na matuman paambal no an ki yaken.” Pagtapos ta ambal Maria, galin angil ya.

³⁹Paglambay ta pila na mga adlaw alin ta pagsugid ta angil ki Maria, giling Maria i ta banwa danen Zacarias na naan ta kabungyuran na lugar ta prubinsya Judea. Gadali kanen an na magsud-o ki danen.

⁴⁰Pag-abot din dya, gaselled kanen i naan ta balay danen Zacarias daw gaatag ta taod ki Elisabet.

⁴¹Pagmati Elisabet ta ambal Maria, gulpi giyo bata an naan ta gettek din daw Elisabet i pagaeman ta Dyos Ispiritu Santo.

⁴²Nalipay gid Elisabet daw bakod iya na kagi na gambal kanen ki Maria, “Miad gid Dyos an ki kaon labaw ta tanan na bai. Miad man kanen an ta bata na matao ki kaon.

⁴³Kino a gid na pasud-o a no, kaon na inay ta Ginuo ko!

⁴⁴Nlaman ko na kaon inay ta Ginuo tak pagmati ko ta kagi no, bata i naan ta gettek ko gulpi nang giyo ta kalipay din.

⁴⁵Malipay ka gid tak gapati ka na ambal ya ta Ginuo Dyos ki kaon matuman!”

⁴⁶Pagtapos ta ambal Elisabet, Maria i gambal, “Gadayaw a ta Ginuo Dyos.

⁴⁷Nalipay a tenged ta Dyos na ake na Manluluwas.

⁴⁸Kademdem kanen an ki yaken na kebes din na suguon. Umpisa anduni, tanan na mga ittaw ta mga timpo na mabot mag-ambal na bakod gid pribiliyo ko

⁴⁹tenged ta mga katingalaan na nabuat ta Dyos Na Makagagaem para ki yaken. Labaw gid kanen an ta tanan.

⁵⁰Bakod gid kaluoy din an naan ta tanan na mga gataod ki kanen umpisa ta una na timpo asta anduni daw ta ula katapusan.

⁵¹Pakita din na bakod iya na gaem paagi ta iya na mga buat. Papirdi din daw pawasak mga ittaw na ugal aged dili matuman iran na malain na mga plano.

⁵²Papalin din mga gadumala an naan ta iran na mga datas na katengdanan, daw paatagan din ta datas na katengdanan mga kebes an.

⁵³Paatagan din mga nakulian an ta iran na mga kinanglanen. Piro, mga manggaranen an papalin din na ula dala.

⁵⁴Patabangan din mga linai Israel na iya na mga ittaw tak ula kanen an nalipat ta iya na pangako na maluoy kanen ki Abraham daw ta mga linai Abraham asta ta ula katapusan.” Yon ambal Maria ta iya na pagdayaw ta Dyos.

⁵⁶Mga tallo bulan na gadayon Maria naan iran Elisabet bag-o muli.

⁵⁷Abot uras na gabata Elisabet i daw mama iya na bata.

⁵⁸Namatian ta mga silingan din daw iya na mga parinti parti ta bakod na kaluoy ta Ginuo Dyos ki kanen daw nalipay man danen an.

⁵⁹Ta pangwallo na adlaw alin ta pagtao ta bata, patuman ta ginikanan din sirimunya an ta pagbuat ta tanda naan ta iya na lawa daw ta pag-atag ta ngaran. Duma na mga ittaw na gatambong ta sirimunya, liag danen na Zacarias ngaran an ta bata aged sangay ta amay din.

⁶⁰Piro, dili miag iya na inay. Ambal inay din, “Dili pwidi tak ngaranan nay kanen an na Juan.”

⁶¹Ambal danen naan ta iya na inay, “Man-o tak Juan na ngaran gusto nyo? Ula kaw man yan parinti na ngaran din an Juan.”

⁶²Pasinyasan danen Zacarias an daw ino liag din na ngaran na para ta iya na bata.

⁶³Gasinyas Zacarias na tagan ta masulatan daw iling ti pasulat din, “Juan ngaran din.” Gatingala gid danen an tanan ta iya na nasulat.

⁶⁴Pagtapos din sulat, dayon kaambal isab kanen an na gadayaw ta Dyos.

⁶⁵Mga kasilingan Zacarias gatingala gid na nadlek tenged ta mga natabo ki danen Zacarias. Balita an parti ki danen galapta ta tanan na mga banwa naan ta kabungyuran na lugar ta prubinsya Judea.

⁶⁶Tanan na mga kamati, paisip-isip danen, “Ino taan plano ta Ginuo Dyos ta yon na bata daw magbakod?” Iling tan iran na isip tak nlaman danen na paubayan kanen an ta Ginuo Dyos.

⁶⁷Na kaambal en isab Zacarias i na amay Juan, pagaeman kanen an ta Dyos Ispiritu Santo daw ambal din:

⁶⁸“Kiten na mga linai Israel, magdayaw ki ta Ginuo na ate na Dyos tak kiten na mga ittaw din pademdem din daw palibri man alin ta ate na mga kuntra.

⁶⁹Padala din ki kiten isya na makagagaem na manluluwas na linai ta pasaligan din na Ari David.

⁷⁰Paagi ta padala din na manluluwas, patuman din iya na pangako na nasugid paagi ta mga prupita anay pa sa na gasirbi ki kanen.

⁷¹Gapangako kanen na luwasen ki din alin ta ate na mga kuntra daw alin ta malain na plano ta mga gademet ki kiten.

⁷²Gapangako man kanen an na maluoy ta mga kaapuan na ate na alinan daw magtuman kanen an ta iya na pangako na dili din gid matalikuran.

⁷³Yon mga pangako din ki Abraham na ate na alinan. Gasumpa kanen an na luwasen ki din alin ta ate na mga kuntra aged kiten i magsirbi ki kanen na ula ki adlek,