Lucas 1:2-66 in San Blas Kuna

² Igi gebesaila Jesús-sapingan na e-sunnad Jesús-daksamala, deyobi a-igargi anmar-odurdaksamarmogad. Ar Bab-Jesús we-dulemar e-igargi-sunmakega barmisgusad.

³ Dummad-Teófilo, nue an we-igargi ise-nergusmogad. Degisoggu, an dakdo, bur an bega Jesús-igar gebesaila-onoded-akar, nue ilemakar narmakergebe.

⁴ Adi, be nue-wisgumogagar Jesús-igargi-be-odurdaklesadi we napiragwadi, gakansuli.

⁵ Deunni, Rey-Herodes, Judea-yargi negdakmaigu, dule-irwa-Bab-Dummadse-goled-wargwen, Abíasʼsikid mai-gusad. A-dulede, Zacaríasʼye nugad, e-omedi Aarón-wagansikidid, Elisabetʼye-nugad.

⁶ Emide, ebobela, Bab-Dummad-asabin igar-innikigwadba damaladid. Bab-igar-uksadba, degine, Bab-Dummad-sogsadbali nanamalad-dulemalad. Agala, Bab-Dummad egi ibmar akarsoged sated.

⁷ Ar amarde, mimmi-satemalad, ar ade, Elisabet geg mimmi-baked, degine, bato amarde, seredgusmarbalid.

⁸ Ibagwengine, Abías-e-gwenadgansikmaladga Bab-Dummadse-goled-neggi-arbaega ibagan nonikid. Deunni, Zacarías Bab-Dummadse-goled-neggi dule-irwa-Bab-Dummadse-golega arbanonimogad.

⁹ Na gusgu igi dule-irwa-Bab-Dummadse-gormalad nugsalege, deyob Zacarías nugsalealid, adi, Bab-Dummadse-Goled-Neg-Islidikidgi dogegar, ina-wawadikid obupurmakegar.

¹⁰ Degine, ina-wawadikid-ogumaked-wachigi, deun bela-dulemar magaba Bab-Dummadse gorbukwa gusmalad.

¹¹ Zacarías, Bab-Dummad-Neg-Islidikidgi ina-wawadikid ogumaknaidgi, Bab-Dummad-baliwitur-wargwen, Zacaríasʼse ukiar magar-gunonikid. Ina-wawadikid-ogumakleged-aila-naba, argan-nuedsik gwichi dakalid.

¹² Zacarías, deyob Bab-Dummad-baliwitur-dakargu, gwakided, bela nue-dobee ito naded.

¹³ Ar baliwiturdi ega sogded: “Zacarías, melle be dobgu, ar Bab-Dummadse-be-goledi Bab-Dummad be-itosad, be-ome-Elisabet bega mimmi-wargwen-bakoedi, Juanʼye be onugsao.

¹⁴ Be mimmi-nikuoedba, be yeer itogoed, be weligwar itogoed, degine, be-mimmi gwalulenonikir, bukidar dulemar egi weligwar itomarmogoed.

¹⁵ ”Ar be-mimmide, Bab-Dummad-asabin dule-dummadga guoed. Vino gobosulid, degi, inna-gagbid gobosurbalid. Degine, amba muu-neggi mai, bato Bab-Dummad-Burba-Isligwaled bela-bela nika guoed.

¹⁶ Deginbali, we-mimmi gannar Israel-dulemar Bab-Dummad-Jehováʼba-nanamalaga imakoed.

¹⁷ Ar be-mimmi-Juan, Elíasʼyobi Dule-Dummad-idu-nadapi guoed. Deyob Bab-Dummad-Burba, degi, Bab-Dummad-gangued-nika guoed. Adi, babgan gannar na e-mimmiganbina itogerba guega, degi, dule-galagwensuli-gudimaladi dule-nueganga imakega, binsaed-nikaa damalaga, degi, guagwar dulemar-urbega, adi, Bab-Dummad-abingamalagar.”

¹⁸ Degi, Zacarías baliwiturga sogded: —Degite we-deyob-guoedi, ¿igi-an wisguosunna? Ar ande seredgusad, an-omede bato seredgusmogad.

¹⁹ Baliwitur abin-imakdegu, ega sogded: —Ani an Gabriel-gued, Bab-Dummad-asabin, Bab-Dummad-sogedba an ibmar imakega an gwichid. Ani an bega sunmakega, we-gayaburba-nued-sogega an barmilealid.

²⁰ We-ibmar-an-bega-sogsad e-ibagan mosale, we deyob gunonikoed. Emide, be an-bengussoggu, geg bar sunmake be guoed. Be-mimmi-gwalulesad-sorba, geb be gannar sunna sunmake gunonibaloed.

²¹ Ar dulemardi, magaba Zacarías edarbebukmalad. Degi, ibiga Zacarías dikasurgus Bab-dummadse-goled-neg-islidikidyaba yoggumaiye binsaarmalad.

²² Zacarías agi noargu, geg emarga sunmake gusad. Agi magar daksamalad, we, Bab-Dummadse-Goled-Neg-Islidikidgi wis ibya-apurus danikirgebye. Zacarías dulemarga sunmaksasulid, unnila argangi-oyogar emarga sunmaksad.

²³ Geb Zacarías, dule-irwa-Bab-Dummadse-goled-ibmar-imaked bergusgu, na e-negse nadsunnad.

²⁴ Geb a-ibagan-sorbali, e-ome-Elisabet gurgin-nika gunonikid. Agine, Elisabet nii-walatar bar nossulid. Agi sokalid:

²⁵ “Bab-Dummad angi nabir binsanonikid. An mimmi-niksulidba dulemar-mer-bar-isdar-an-dakmalaga, aga anga mimmi-uknonikid.”

²⁶ Elisabet nii-walanergwagus (6) bonigwar gudiidgi, Bab-Dummadi, Galilea-yarse, Nazaret-neggweburse, yagwa-gwensak Maríaʼye-nugadse baliwitur-Gabriel-barmialid.

²⁷ A-yagwade, na Joséʼye-nugad-ebo-nikuega bato igar-nabogar gudiid. Joséʼde Rey-David-wagwad.

²⁸ Baliwitur María-maidse dognonigu, ega sognonikid: —¡Naa, degite! ¡Bab-Dummad begi nued binsasad! Bab-Dummad beba gudiguad. Baigan-omeganba Bab-Dummad bur nued begi binsasad.

²⁹ Maríaʼdi baliwitur-dakargu, ibmar-ega-sogedba dobe-itoded, binsaded, wede, baliwitur weyob anse gornonikid ibi obarsunye.

³⁰ Degi, baliwitur ega sogdesunnad: —María, mer be dobgu, ar Bab-Dummad nabir begi binsasad.

³¹ Emigindi, be gurgin-nika gunonikoed, mimmi-gwensak be nikuoed, Jesúsʼye a-mimmi be onugsaoed.

³² We-mimmide dule-dummadga guoed, Bab-Dummad-Bur-Birigined-e-Machiye soglegoed, degine, Bab-Dummad, igi epenne Rey-David, reyga-mesisgusa, deyobi Bab-Dummadi Rey-David-e-wagwa-imakmogoed.

³³ Degine, we-Jesús, Jacob-dulemar-negsemai degisadegu guoed. E-negsemai-guoedi gwen berguosulid.

³⁴ Geb degi, María, baliwiturga sogded: —¿Ar wede igi guosunna? Ar amba an yagwad.

³⁵ Baliwitur, Maríaʼga sogded: —Bab-Dummad-Burba-Isligwaled begi aidenonikoed. Bab-Dummad-Bur-Birigined-e-gangued be-edunonikoed. Degisoggu, Dule-gwage-islidikid-gwalulegoedi, Bab-Dummad-Machiye soglenonikoed.

³⁶ Degine, be-gwenad-Elisabet, bato seredgusadgi, geg mimmi-bakye-enik sogmaladi a-bela gurgin-nika gunonikid. Emide, nii-walanergwagus (6) gurgin-nika gudiid.

³⁷ Ar ade, Bab-Dummadgardi ibmar-geg-gudeeye soglesulid, bela ega ibmar guedbiid.

³⁸ Geb degi, María sogdesunnad: —Andi, Bab-Dummad-e-mai gued. Be-sogedba be anga imakdo. Degi, baliwitur, Maríaʼgi banguded.

³⁹ A-ibagangi, María, Judea-yalaganba neggwebur-gwagwense gwae nade gusad.

⁴⁰ Zacarías-negse dogdapgu, Elisabetʼse gordapid.

⁴¹ Elisabet, María-ese-gole-itosgu, dule-e-sapi-dukugi-maid ber dulagwar itoded. Degi, Elisabet bela-bela Bab-Dummad-Burba-Isligwaled-nika gunonikid.

⁴² Elisabet binnasur goted, sogded: —Baigan-omeganba bur nued Bab-Dummad begi binsasad, be-dula-sapi-dukugi-maidgi bur-nued binsasbalid.

⁴³ Ar wede, ¿ibiga weyob angi nued binsalesa, emide, an-Dummad-e-nan anse ataknonigu?

⁴⁴ ”Be anse gornonikid-itodeyalaba, an-sapi-dukugi-maid weligwar-itogedba ber dulagwar itoded.

⁴⁵ Be we-ibmar bengussulidba begi nued-binsalesad. Ar Bab-Dummad-bega-ibmar-sogsadba we-ibmar bela bega guoed.”

⁴⁶ Geb degi, María, sogdemogad: “An-ulub-akar Bab-Dummad-nug an odummosun.

⁴⁷ An-burba, Bab-Dummad-an-abonogedgi weligwar itosun.

⁴⁸ An e-mai-bundor-binsaled-inigwele, Bab-Dummad an-sunonikid, nued angi binsanonikid, emigindi, bela dulemar angi sogmaloed, nued-egi-binsalesad-duleye.

⁴⁹ Bab-Dummad-Bela-Gangued-Nikadi, anga ibmar-dummagan imaksad, e-nug, Isligwaledye nugad.

⁵⁰ Bab-Dummad dulemar-e-dobee-nanadimalad wile daked, degine, a-e-waganse-bakar, wiledakdii sadeguoed.

⁵¹ Bab-Dummadi, e-gangued na e-arbaedgi oyosad, dulemar-na-san-dummarba-imakdimalad-osulosad.

⁵² Bab-Dummadi, dule-dummagan-negsemamaid-obelosad. Dulemar-na-san-bipi-imakdimalad-odummosad.

⁵³ Degine, dulemar-ukumesdimaladga ibmar-bukidar uksad. Degine, dulemar-mani-ibgan, ibmar-sate barmisad.

⁵⁴ Bab-Dummadi, e-mai-Israel-dulamar-bendaksad, amar-wile-daked gwen iessulid.

⁵⁵ Bab-Dummadi deyob anmar-dad-Abrahamʼga sogsad, degi, e-waganga sogsagusad, e-wiledaked degisadeguoye.”

⁵⁶ María, Elisabet-walik nii-walapaa megialid, geb a-sorba María, na e-negse gannar aligusad.

⁵⁷ Elisabet e-ibagan warmaknonigu, mimmi-nikunonikid, susugwa ega uklenonikid.

⁵⁸ E-neg-dikarba-mamaid, degine, e-gwenadgan itoarmargu, Bab-Dummad Elisabetʼgi nabir binsasye, degi, nue wile daksaye, Elisabetʼba wergusmarmogad.

⁵⁹ Geb ibabaabakgine (8), susugwa-gwalulesad-sorba, e-abgan-uka-duku-sikega, Moisés-Igar-Maidba-imakega, senonimalad. Degine, e-bab-Zacaríasʼba mimmi-nug-imakbiguarmalad.

⁶⁰ Ar e-nandi, weyob sokalid: —Suli. Deyob-nugguosuli. Juanʼye nugguoe.

⁶¹ Elisabetʼga sogdemalad: —¿Ibiga deyob be onugsabie? Ar be-gwenadgande deyob nugsurmalad.

⁶² Geb e-babse argangi-sunmakar egichiarmalad, goe igi-onugsaoye.

⁶³ Zacarías urgo-bipigwa egichisad, agi susugwa-nug narmaksad. Juanʼye nugguoye sogsad. Bukmaladi bela geger itoarmalad, wede ibiga deyob onugsabie.

⁶⁴ Geb a-gines, Zacarías gannar nabir sunmakded. E-gwabin-bipinmakdegu, Bab-Dummad-nug ogannoded.

⁶⁵ Bela-e-neg-dikarba-mamaid dobe itonadmalad. Bela Judea-yalaganba we-ibmar-deyob-gusadi gaya mimileded.

⁶⁶ Ar dulemar deyob bela-we-gayagan-itoarmalale, na e-gwagegi binsadmalad, sogdemalad: “Ar we-mimmide, ¿doa-dulega guosunna?” Ar dulemar bela wismalad, we-mimmibali Bab-Dummad-gangued gudii.

² ar gebesaila Jesús-sapingan na e-sunnad Jesús-daksamalad, igi anmar-odurdaksamala, amarde, Bab-Jesús-igargi sunmakdii-gusmalad.

³ Dummad-Teófilo, nue an baiganse egichisad-sorba, an dakmogua, ib-nueddo, Jesús-igar gebesaila onoded-akar, nue ilekwaa bega an narmaker,

⁴ adi be nue wisgumogagar Jesús-igargi-be-odurdaklesad we napiragwadid, gakansulid.

⁵ Rey-Herodes, Judea-yargi neg-dakmaigu, deun dule-irwa-Bab-Dummadse-gormalad-wargwen, Abías-sikid, mai-gusad. A-dulede Zacarías-nugad, e-omedi Aarón-wagan-sikidid, Elisabetye-nugad.

⁶ Emide ebobela Bab-Dummad-asabin dule-igar-napiragwadba-damalad gumalad, degine, Bab Dummad egi ibmar akar-soged sated. Bab-na-e-igar-uksadba, degine, Bab-Dummad-sogsadbali-nanadimalad-dulemalad.

⁷ Ar amarde mimmi-satemalad, ar ade Elisabet geg mimmi-baked, degine, bato amarde sered gusmarbalid.

⁸ Ibagwengine, Abías-sikmaladga wilub nonikid Bab-Dummadse-goled-neggi arbaegar. Deunni, Zacarías Bab-Dummadse-goled-neggi dule-irwa-Bab-Dummadse-golega arbanonimogad.

⁹ Na gusgu igi dule-irwa-Bab-Dummadse-gormala, deyob Zacarías nugsalealid, Bab-Dummad-Neg-Islidikidgi dogegar, ina-wawadikid ase obupurmaknaegar.

¹⁰ Degine, ina-wawadikid-ogumaked-wachigi, deun bela-dulemar magaba Bab Dummadse gorbukwa-gusmalad.

¹¹ Zacarías Bab-Dummad-Neg-Islidikidgi ina-wawadikid ogumaknaidgi, Bab-Dummad-anger-wargwen, Zacaríasse ukiar magargunonikid, daklealid ina-wawadik ogumakleged-galu-naba, argan-nuedsik gwichi.

¹² Zacarías deyob Bab-Dummad-anger-dakargu, gwakided, bela nue-dobee ito naded.

¹³ Ar angerdi ega sogded: “Zacarías, melle dobgu, ar Bab-Dummadse-be-goledi Bab Dummad be-itosad, be-ome-Elisabet bega machi-wargwen-bakoed, e-nug Juanye be onugsao.

¹⁴ Be machi-nikuoedba, be yeer itogoed, be weligwar itogoed, degine, be-machi gwalulenonikir, bukidar egi weligwar itomarmogoed.

¹⁵ “Ar be-machide Bab-Dummad-asabin dule-dummadga guoed. Vino, degi, inna-gaibid gobosulid, degine, amba muu-neggi mai, bato Bab Dummad Burba Nued bela-bela nika-guoed.

¹⁶ Deginbali, we-machi gannar Bab-Dummad-Jehováse, Israel-dulemar-bukidar obirnai-guoed.

¹⁷ Ar be-machi-Juan, Dule-Dummad-idu nadap-guoed, Elíasyob. Deyob Bab-Dummad-Burba, degi, Bab-Dummad-gangued nika-gumogoed, adi babgan gannar na e-mimmigangi binsa imakegar, sabguegar, degi, dulemar-galagwensuli-gudimalad dulemar-nuegan-binsaed-nikaa-damaladga imakegar, degine, adi, dulemar guagwar urbegar, Bab-Dummad-abingamalagar.”

¹⁸ Degi Zacarías angerga sogded: —¿Degite igi an wisguosunna be-anga-soged we deyob guoed? Ar ande seredgusad, degi, an-omede bato seredgusmogad.

¹⁹ Anger, abin-imakdegu, sogded: —Ani an Gabriel, Bab-Dummad-asabin an gwichid, Bab-Dummad-sogedba an ibmar imakegar. Ani an barmilealid, bega sunmakegar, bega we-gaya-burba-nued sogegar.

²⁰ We-ibmar-an-bega-sogsad e-ibagan mosale, we deyob gunonikoed. Ar be an-bengussoggu, geg bar sunmak be guoed. Be-machi-gwalulesad-sorba geb be gannar sunna sunmak-gunonibaloed.

²¹ Ar dulemardi magaba Zacarías-edarbebukmalad, geger dakarmalad, ibiga dikasurgus Bab-Dummadse-goled-Neg-Islidikidgi Zacarías gunaid yoggud-dibeye.

²² Zacarías agi noargu, geg emarga sunmaked. Agi mag daksamala, we Bab-Dummadse-goled-Neg-Islidikidgi wis ibya-apurus danikir-gebye. Zacarías dulemarga sunmaksasulid, unnila argangi emarga wis sunmaksad.

²³ Geb Zacarías dule-irwa-Bab-Dummadse-goled-imaked bergusgu, na e-negse nadsunnad.

²⁴ Geb a-ibagan-sorbali, e-ome-Elisabet gurgin-nika gunonikid. Agine, Elisabet nii-walatar bar nodsuli na neg-yaba megisad. Agi sokalid:

²⁵ “Bab Dummad nabir an-daknonikid, an mimmi sulidba, adi dulemar mer istar bar an-dakmalaga anga mimmi-uknonikid.”

²⁶ Elisabet nii-walanergwagus bonigwar gudiidgi, Bab Dummad, anger-Gabriel-barmialid, Galilease, Nazaret-neggweburse,

²⁷ yagwa-gwensak María-nugadse. A-yagwade, dule-wargwen, José-nugad-ebo igar-nabosad, na nikumalagar. Joséde Rey-David-wagwad.

²⁸ Bia-María-maidse anger dognonigu, ega sognonikid: —¡Na, degite! ¡Bab Dummad begi nabir binsasad! Bab Dummad beba gudiguad. Baigan-omeganba Bab Dummad bur nued begi binsasad.

²⁹ Ar Maríadi anger-dakargu, ibmar-ega-sogedba dobe ito naded, binsaded, wede anger weyob anse gornonikid ibi obarsunye.

³⁰ Degi anger ega sogdesunnad: —María, mer be dobgu, ar Bab Dummad nabir begi binsasad.

³¹ Ar emigindi, be gurgin-nika gunonikoed, mimmi-gwensak be nikuoed, Jesúsye a-machigwa be onugsaoed.

³² We-machide dule-dummad guoed, Bab-Dummad-Bur-Dummadid a-e-Machiye soglegoed, degine, Bab Dummad, anmar-Dummad, igi epenne Rey-David, reyga mai-gusa, deyob e-wagwa-imakmogoed.

³³ Degine, we-Jesús, Israel-neggwebur-neg-dakmai degi-sadeguoed, e-neg-dakmai-guoedi gwen bar berguosulid.

³⁴ Geb degi María angerga sogded: —¿Ar wede igi guosunna? Ar amba an yaagwad.

³⁵ Anger abin-imakdegu ega sogded: —Bab Dummad Burba Nued begi aidenonikoed, Bab-Dummad-Bur-Dummadid a-e-gangued be-edunonikoed. Degisoggu, Dule-gwage-swilidikid-gwalulegoed, soglenonikoed, Bab-Dummad-Machiye.

³⁶ Emi be-gwenad-Elisabet, bato sered gusadgi, geg mimmi-bakye-nik sogmaladi bonigwar gunonikid. Emide nii-walanergwagus gurgin-nika gudiid.

³⁷ Ar ade Bab Dummadgardi ibmar-geg-gued nik-deeye soglesulid, ar bela ega ibmar nabir guedbiid. Deggisoggu, a-ular an bega sogsadyob bega gunonimogoed.

³⁸ Geb degi María sogdesun: —Ar andi Bab-Dummad-mai gued, ar be-ibmar-sogedba be anga imakdo. Degi anger Maríagi banguded.

³⁹ A-ibagangi, María Judá-yalaganba, a-neggwebur-gwagwense gwae nade-gusad.

⁴⁰ Zacarías-negse dogdapgu, Elisabetse gordapid.

⁴¹ Elisabet itosgu, María ese gole, dule-e-sapi-dukugi-maid ber dulagwar itoded, degi, Elisabet bela-bela Bab Dummad Burba Nued nika-gunonikid.

⁴² Degine, Elisabet binnasur gote, sogded: —Baigan-omeganba Bab Dummad begi bur nued binsasad, degine, be-anagi bur-nued egi binsasbalid.

⁴³ ¿Ar wede ibiga weyob angi nued binsalesa, emide, an-Dummad-e-nan anse ataknonigu?

⁴⁴ Ar be anse gornonikid an itodeyalaba, an-sapi-dukugi-maid weligwar-itogedba ber dulagwar naded.

⁴⁵ Ar be we-ibmar bengussulidba begi nued-binsalesad, ar Bab-Dummad-bega-ibmar-sogsadba we-ibmar bela bega guoed.

⁴⁶ Geb degi María sogdemogad: An ulub-akar an Bab-Dummad-nug odummosun.

⁴⁷ Degine, an-burba, Bab-Dummad-an-abonogedgi weligwar an itosun,

⁴⁸ ar an e-mai-bundor-binsalegwad-inigwele, Bab Dummad an-sunonikid, nued angi binsanonikid, ar emigindi, bela dulemar angi sogmaloed, nued egi binsalesad duleye.

⁴⁹ Ar Bab-Dummad-Na-Gangued-Bela-Nikad, anga ibmar-dummagan imaksad, e-nug, ber swilidikidye nugad.

⁵⁰ Ar Bab Dummad dulemar-e-dobee-nanadimalad wile daked, degine, a e-waganse-bakar, a-wile-daked eba sadegumogoed.

⁵¹ Bab Dummad e-gangued na e-arbaedgi oyosad, dulemar-na-san-dummarba-imakdimalad-osulosad.

⁵² Bab Dummad dule-dummagan-neg-semamaid-obelosad, degine, dulemar-na-san-bipii-imakdimalad-odummosad.

⁵³ Degine, dulemar-ukumesdimaladga ibmar-bukidar uksad, degine, dulemar-mani-ibgan, ibmar-sate barmisad.

⁵⁴ Bab Dummad na e-mai-Israel-dulemar-bendaksad, deun amar-wile-daked gwen iessurgu.

⁵⁵ Ar Bab Dummad deyob anmar-dad-Abrahamga sogsad, degi, e-waganga sogsa-gusad, e-wile-daked degi-sadeguoye.

⁵⁶ María, Elisabet-walik nii-walapaa megialid, geb a-sorba na e-negse gannar ali-gusad.

⁵⁷ Elisabet e-ibagan warmaknonigu, mimmi-nikunonikid, machigwa ega uklenonikid.

⁵⁸ E-neg-dikarba-mamaid, degine, e-gwenadgan itoarmargu, Bab Dummad Elisabetgi nabir binsasye, degi, nue wile daksaye, Elisabetba wergudmarmogad.

⁵⁹ Degine, ibabaabakgus susugwa-gwalulesad-sorba senonimalad, e-abgan-duku sikegar, adi Moisés-igar-maidba imakegar. Degine, e-bab-Zacaríasba mimmi nug-imakarmalad.

⁶⁰ Ar e-nan sunmakdegu, sogded: —Suli, degi nugguosur. Juanye nugguoed.

⁶¹ Elisabetga sogdemalad: —¿Ibiga degi be onugsabie? Ar be-gwenadgan degi-gwen-nugsurmalad.

⁶² Geb degi e-babse egichiarmalad, argangi sunmakar, igi machigwa onugsaoye.

⁶³ Zacarías urgo-bipigwa egichisad, agi machigwa-nug narmaksad, Juanye nugguoye. Bukmaladi bela geger dakdemalad, deyob onugsabied.

⁶⁴ Geb degi Zacarías nabir sunmakded, e-gwabin bipinmakded. Sunmakdegu, Bab-Dummad-nug ogannoded.

⁶⁵ Bela-e-neg-dikarba-mamaid dobe itonadmalad. Bela Judea-yalaganba we-ibmar-deyob-gusadi gaya mimmileded.

⁶⁶ Ar bela-we-gayagan-itoarmalad na nue e-gwagegi binsadmalad, sogdemalad: “¿Ar we-mimmide doaga guosunna?” Dulemar daksamalad, a-mimmiba Bab-Dummad-gangued gudigu.