Lucas 18:8-14 in Achi

⁸ Quin bij chiwe: i Dios que u to na; cu ʼan la i ʼatbal tzij chique. Xui-ri, are ca cʼun i Achi aj Chicaj, ¿ʼo nawi ʼuri jujun chi cul qui cʼux che? (Queje ile xu bij i Jesus chique.)

⁹ Je ʼo jujun winak quiqui bij ique lic je ʼutz, y xa quiqui kajsaj qui ʼij i juban. Cumal i winak-le, i Jesus xu bij i tijojbal tzij-i:

¹⁰ —Je ʼo queb achiab xe ʼe chu tzʼonoxic pa rachoch i Dios. I jun are aj Fariséo, i jun chic, aj tzʼonol alcawal.

¹¹ I aj Fariséo, tacʼalic queje iri ca tijin chu bixquil: “Dios, quin tioxij chawe, man yin n-in ta queje pacha i juban winak. Ique xa je iliʼom, je mal laj tak winak, xak quiqui kajsaj qui ʼij cuʼ ixokib ne te quixokil. Lic quin tioxij chawe n-in ta pacha i aj alcawal-i.

¹² Camul quin mayij in waʼim pa seman y quin ya wib chu tzʼonoxic chawe. Niʼpa i quin chʼaco, quin ya jun tant re i lajuj chawe.” (Queje xu bij i aj Fariséo ile che i Dios.)

¹³ I aj tzʼonol alcawal n-queje ta xu ʼan ire ile. Ire, naj xcanaj wi, n-xtzun ta chicaj man xqʼuix che. Cʼax xu na u cʼux, xu chʼay u wach u cʼux y xu bij: “¡Dios, chawila toʼbal in wach, xa in ajmac laj winak!” (Queje u tzij ile xu bij che i Dios.)

¹⁴ Yin quin bij chiwe, i aj tzʼonol alcawal xtzalij chi rachoch ʼutz chic chuwach i Dios; n-cumaj taj pacha i aj Fariséo. Queje ile xeʼelok, man pachin coʼon nim che rib, ire ʼut xa ca kajsax ni u ʼij; y pachin coʼon chʼutin che rib, are ca nimarsax na ʼuri u ʼij. (Queje i tijojbal tzij ile xu bij i Jesus chique.)

⁸ Kambꞌiꞌij chiwe: Na jampatana ri Dios kukꞌulubꞌej lo uwach y kuꞌan kꞌu ri usukꞌ chike. Pero echiriꞌ kakꞌun tanchi Ralaxel Chikixoꞌl Tikawex, ¿kꞌa keburiq nawi tikawex che ruwachulew kꞌa kꞌo kubꞌulibꞌal kikꞌuꞌx rukꞌ ri Dios?» xcha ri Jesús.

⁹ E kꞌo jujun kakichꞌobꞌo lik e jusukꞌ; ruma kꞌu riꞌ, lik kꞌu kakikꞌaq bꞌi kiqꞌij ri jujun chik. Ekꞌu ri Jesús xutzijoj wa jun kꞌambꞌal naꞌoj chike:

¹⁰ «E kꞌo kaꞌibꞌ achijabꞌ xebꞌek pa ri Rocho Dios chaꞌ keꞌkiꞌana orar; jun e kukꞌil ri fariseos y ri jun chik, aj tzꞌonol puaq re tojonik.

¹¹ Ekꞌu ri fariseo e riꞌ takꞌalik xujeq kuꞌan orar; lik kuyak uqꞌij chiribꞌil ribꞌ, jewaꞌ kubꞌiꞌij: “Lal Dios, kantioxij cheꞌla ma riꞌin na in ta jelaꞌ pachaꞌ ri juchꞌobꞌ achijabꞌ: ri eleqꞌomabꞌ, ri na e ta jusukꞌ, ri kemakun chirij ri kꞌulanikil. Riꞌin na in tane jelaꞌ pachaꞌ la jun aj tzꞌonol puaq re tojonik.

¹² Riꞌin kalaj kanꞌan ayuno ronoje semana, y kanya ri nudiezmo che ronoje ri kanchꞌako” kacha ri fariseo.

¹³ »Noꞌj raj tzꞌonol puaq re tojonik xa naj xkꞌojiꞌ wi apanoq. Na karaj tane katzuꞌn chikaj; kutꞌiqitꞌaꞌ ruwa ukꞌuꞌx, jewaꞌ kubꞌiꞌij: “Lal Dios Qajawxel, ¡kuyu ko la numak, ma riꞌin lik in aj mak!” kachaꞌ.

¹⁴ »Kambꞌiꞌij kꞌu chiwe: Wa aj tzꞌonol puaq re tojonik xtzelej chirocho ꞌanom chi jusukꞌ che ruma ri Dios; noꞌj ri fariseo, na xkuy ta rumak. Ma china ri kuꞌan nim che ribꞌ, ri Dios kuqasaj uwa uqꞌij; noꞌj china ri kuꞌan chꞌutiꞌn che ribꞌ, ri Dios kuyak uqꞌij» xchaꞌ.

⁸ Cambiꞌij chiwe: Na jampatana ri Dios cucꞌulubej lo uwach y cuꞌan cꞌu ri usucꞌ chique. Pero echiriꞌ cacꞌun tanchi Ralaxel Chiquixoꞌl Ticawex, ¿cꞌa queburik nawi ticawex che ruwachulew cꞌa cꞌo cubulibal quicꞌuꞌx rucꞌ ri Dios?» xcha ri Jesús.

⁹ E cꞌo jujun caquichꞌobo lic e jusucꞌ; ruma cꞌu riꞌ, lic cꞌu caquicꞌak bi quikꞌij ri jujun chic. Ecꞌu ri Jesús xutzijoj wa jun cꞌambal naꞌoj chique:

¹⁰ «E cꞌo caꞌib achijab xebec pa ri Rocho Dios chaꞌ queꞌquiꞌana orar; jun e cuqꞌuil ri fariseos y ri jun chic, aj tzꞌonol puak re tojonic.

¹¹ Ecꞌu ri fariseo e riꞌ tacꞌalic xujek cuꞌan orar; lic cuyac ukꞌij chiribil rib, jewaꞌ cubiꞌij: “Lal Dios, cantioxij cheꞌla ma riꞌin na in ta jelaꞌ pachaꞌ ri juchꞌob achijab: ri elekꞌomab, ri na e ta jusucꞌ, ri quemacun chirij ri cꞌulaniquil. Riꞌin na in tane jelaꞌ pachaꞌ la jun aj tzꞌonol puak re tojonic.

¹² Riꞌin calaj canꞌan ayuno ronoje semana, y canya ri nudiezmo che ronoje ri canchꞌaco” cacha ri fariseo.

¹³ »Noꞌj raj tzꞌonol puak re tojonic xa naj xcꞌojiꞌ wi apanok. Na caraj tane catzuꞌn chicaj; cutꞌikitꞌaꞌ ruwa ucꞌuꞌx, jewaꞌ cubiꞌij: “Lal Dios Kajawxel, ¡cuyu co la numac, ma riꞌin lic in aj mac!” cachaꞌ.

¹⁴ »Cambiꞌij cꞌu chiwe: Wa aj tzꞌonol puak re tojonic xtzelej chirocho ꞌanom chi jusucꞌ che ruma ri Dios; noꞌj ri fariseo, na xcuy ta rumac. Ma china ri cuꞌan nim che rib, ri Dios cukasaj uwa ukꞌij; noꞌj china ri cuꞌan chꞌutiꞌn che rib, ri Dios cuyac ukꞌij» xchaꞌ.