Lucas 17:12-30 in Achi

¹² Are xe upon che jun aldéa, xe ʼel li lajuj achiab chu cʼulaxic. Ique, ʼo i yobil lépra chique, rumal-i xe canaj can cʼa naj,

¹³ y xe siqʼuin che: —¡Nim laj winak Jesus, chawila ni toʼbal ka wach! —xe cha che.

¹⁴ I Jesus, are xe rilo, xu bij chique: —Jix, ji cʼutu iwib che i sacerdóte —xu bij. Ique xqui maj qui be; are que tijin chi be, juntir xutzir i cʼax chique.

¹⁵ ʼO jun chique ique, are xrilo chi chom chic u chʼacul, xtzalijic, ca siqʼuin chu cojic u ʼij i Dios.

¹⁶ Are xupon ruʼ i Jesus, xuqui chuwach, xu ʼaj rib chuwach cʼa xkaj u palaj pulew. Lic xu tioxij che. I achi-le, aj Samária winak, n-aj Israel taj.

¹⁷ Teʼuri i Jesus xu bij: —Je lajuj xe utzir na, ¿pa je ʼo wi i bele-jeb?

¹⁸ ¿Xui nawi i jun-i xtzalij lok cu cojbej u ʼij i Dios? ¿Xui ire-le xcʼunic, chi n-kach taj tinimit? —xu bij.

¹⁹ Teʼuri xu bij che i achi: —Chat walijok, y jat; xat utziric rumal u cubibal a cʼux chwe —xu bij.

²⁰ ʼO jujun aj Fariséo xqui tzʼonoj che i Jesus umpa ca jekan u ʼatbal tzij i Dios chuwach i jyub taʼaj. Ire xu bij chique: —I u cʼunic u ʼatbal tzij i Dios, n-ca ʼiltaj taj.

²¹ Mi jun crilo, mi jun cu bij: “¡Ri ʼolic-i!” o xak “¡Le ʼo jela-le!” n-que cha taj; man i ʼatbal tzij re i Dios ya ʼo chic chiquixol i winak, ya ʼo chic piqui cʼux. (Queje xu bij i Jesus ile chique.)

²² Teʼuri xu bij chique i u tijoxelab: —Ca pe tak i ʼij chi yix qui rayij na quiwil jun che tak u ʼij re i Achi aj Chicaj, péro n-quiwil taj.

²³ ʼO ni jujun quiqui bij chiwe: “¡Ri ʼolic-i!” que cha; o xak quiqui bij: “¡Le ʼo jela-le!” que cha. Xui-ri, mix ʼec, mix terej chiquij.

²⁴ Are cu rik i ʼij re i Achi aj Chicaj, coʼon na pacha coʼon u wach i caj, are ca pe jun nim laj u rep ray, ca repcan u tzunbal cʼulala. Queje ile u ʼij i Achi aj Chicaj —xu bij.

²⁵ Xak xu bij: —Xui-ri, nabe ʼo u chac cu tij ni cʼax, xak ca xutux na cumal i winak je re i woʼor.

²⁶ Are cu rik i ʼij re i Achi aj Chicaj, quiqui ʼan i winak pacha xqui ʼan che tak i ʼij re i mam Noe ujer.

²⁷ Ique toʼ xqui tij qui wa, xqui tuʼ qui yaʼ, xak toʼ xe cʼuliʼic, chi achiab, chi ixokib. Queje que tijin ile chu ʼanic cʼa xu rik i ʼij are xoc i mam Noe chupam u bárco, are ʼuri xpe i nim laj jab y conojel xe camic.

²⁸ Xak queje ile xqui ʼan i winak ujer, pa tinimit Sodóma are cʼas i mam Lot. Toʼ xqui tij qui wa, xqui tuʼ qui yaʼ; toʼ xe cʼayinic, xe loʼonic; toʼ xe ticanic, xe jachʼanic; xak toʼ xqui yac i cachoch.

²⁹ Xui-ri, are xel i mam Lot pa tinimit Sodóma, juntir xtzak li ʼaʼ chicaj, xak i asufra pacha abaj aʼal; ʼis xe cam conojel.

³⁰ Queje coʼon ile coʼon panok, are ca ʼiltaj u wach i Achi aj Chicaj.

¹² Echiriꞌ katajin rokik chupa jun aldea, lajuj achijabꞌ kꞌo ri yabꞌil lepra chike xebꞌel lo che ukꞌulik yey chinimanaj xetakꞌiꞌ wi lo che ri Jesús.

¹³ Xkijeq kꞌu kesikꞌin che, jewaꞌ kakibꞌiꞌij: —¡Jesús, lal tijonel, choj-juchꞌ kaꞌn ko cheꞌla! —kechaꞌ.

¹⁴ Ekꞌuchiriꞌ xeril pan ri Jesús, jewaꞌ xubꞌiꞌij chike: —Oj alaq, jeꞌkꞌutu ibꞌ alaq chikiwach raj chakunel pa Rocho Dios —xcha chike. Xebꞌek kꞌut, y echiriꞌ ketajin chi bꞌe, xekunutaj che ri kiyabꞌil.

¹⁵ Kꞌo kꞌu jun chike, echiriꞌ xrilo kunutajinaq chik, xtzelej loq y xujeqo kasikꞌinik, lik kuyak uqꞌij ri Dios.

¹⁶ Xuxukubꞌaꞌ kꞌu ribꞌ xeꞌraqan uqꞌabꞌ ri Jesús, xuqasaj rupalaj kꞌa chuꞌlew y lik katioxin chwach, yey waꞌ waꞌchi aj Samaria.

¹⁷ Ekꞌu ri Jesús jewaꞌ xubꞌiꞌij: —¿Na e ta nebꞌa lajuj ri xekunutajik? Yey ri bꞌelejebꞌ chik, ¿pa e kꞌo wi?

¹⁸ ¿Suꞌchak na xetzelej ta lo rike chaꞌ kakiyak uqꞌij ri Dios? Ma xew xtzelej lo wa jun achi yey rire na aj tane Israel —xchaꞌ.

¹⁹ Xubꞌiꞌij kꞌu che rachi: —Chatyaktajoq y chamaja bꞌi abꞌe. Ma ruma ri kubꞌulibꞌal akꞌuꞌx wukꞌ, xatkolobꞌetaj che ri yabꞌil —xchaꞌ.

²⁰ Ri fariseos xkitzꞌonoj che ri Jesús: —¿Jampalaꞌ kakꞌun rutaqanik ri Dios che ruwachulew? —xechaꞌ. Y ri Jesús xukꞌul uwach: —Ri jeqebꞌal rutaqanik ri Dios na jinta kꞌutubꞌal re kilitajik.

²¹ Na jinta ne junoq kubꞌiꞌij: “¡Riꞌ kꞌo wara!” o “¡Leꞌ kꞌolik!” Ma tape alaq: Rutaqanik ri Dios kꞌo chi chixoꞌl alaq —xcha chike.

²² Ekꞌuchiriꞌ ri Jesús xubꞌiꞌij tanchi chike rutijoꞌn: «Kopon kꞌu ri qꞌij echiriꞌ lik kiwaj kiwil tobꞌ ne xa juna qꞌij che ruqꞌijol Ralaxel Chikixoꞌl Tikawex echiriꞌ kataqan che ruwachulew; pero na kiwil taj.

²³ Kuꞌana kꞌu riꞌ e kꞌo kakibꞌiꞌij chiwe: “¡Riꞌ kꞌo wara!” o “¡Leꞌ kꞌolik!” Pero riꞌix mixꞌek, na kebꞌiternabꞌej ta nenareꞌ.

²⁴ Ma echiriꞌ kakꞌun Ralaxel Chikixoꞌl Tikawex, konoje kakil rukꞌunibꞌal jelaꞌ pachaꞌ kuꞌano echiriꞌ kayokꞌ kaꞌn ruxeꞌ kaj y ruwonibꞌal waꞌ kuwonisaj ronoje.

²⁵ Pero lik kꞌu chirajawaxik nabꞌe na kutij ri kꞌax y lik kakꞌaq bꞌi uqꞌij kuma ri winaq re waqꞌij ora.

²⁶ »Ma jelaꞌ pachaꞌ ri xuꞌan chupa taq ri qꞌij re ri Noé, jelaꞌ kuꞌana pa rukꞌunibꞌal Ralaxel Chikixoꞌl Tikawex.

²⁷ Ma konoje ri winaq kakitij kiwa, kakitij kiyaꞌ, kekꞌuliꞌik y kekiya ri kalkꞌoꞌal pa kꞌulanikil. Ekꞌu ketajin riꞌ che uꞌanikil, echiriꞌ xopon ruqꞌijol xok bꞌi ri Noé chupa ri nimalaj barco; kꞌa tekꞌuchiriꞌ xpe ri unimal jabꞌ y jelaꞌ xusach kiwach konoje.

²⁸ Jekꞌuriꞌlaꞌ xuꞌan ojertan chupa taq ri qꞌij re ri Lot: taq ri winaq kakitij kiwa, kakitij kiyaꞌ, keloqꞌowik, kekꞌayinik, ketikoꞌnajik y kakiyak kocho.

²⁹ Yey chupa kꞌu ri qꞌij echiriꞌ xel bꞌi ri Lot chupa ri tinamit Sodoma, xpe lo aqꞌ chikaj kajinow rukꞌ azufre y xekam konoje ri e kꞌo chupa ri tinamit.

³⁰ Jekꞌuriꞌlaꞌ kuꞌana pa ruqꞌijol echiriꞌ kaqꞌalajin uwach Ralaxel Chikixoꞌl Tikawex, ma taq ri winaq na kakoyꞌej ta rukꞌunibꞌal.

¹² Echiriꞌ catajin roquic chupa jun aldea, lajuj achijab cꞌo ri yabil lepra chique xebel lo che ucꞌulic yey chinimanaj xetaqꞌuiꞌ wi lo che ri Jesús.

¹³ Xquijek cꞌu quesiqꞌuin che, jewaꞌ caquibiꞌij: —¡Jesús, lal tijonel, choj-juchꞌ caꞌn co cheꞌla! —quechaꞌ.

¹⁴ Ecꞌuchiriꞌ xeril pan ri Jesús, jewaꞌ xubiꞌij chique: —Oj alak, jeꞌcꞌutu ib alak chiquiwach raj chacunel pa Rocho Dios —xcha chique. Xebec cꞌut, y echiriꞌ quetajin chi be, xecunutaj che ri quiyabil.

¹⁵ Cꞌo cꞌu jun chique, echiriꞌ xrilo cunutajinak chic, xtzelej lok y xujeko casiqꞌuinic, lic cuyac ukꞌij ri Dios.

¹⁶ Xuxucubaꞌ cꞌu rib xeꞌrakan ukꞌab ri Jesús, xukasaj rupalaj cꞌa chuꞌlew y lic catioxin chwach, yey waꞌ waꞌchi aj Samaria.

¹⁷ Ecꞌu ri Jesús jewaꞌ xubiꞌij: —¿Na e ta neba lajuj ri xecunutajic? Yey ri belejeb chic, ¿pa e cꞌo wi?

¹⁸ ¿Suꞌchac na xetzelej ta lo rique chaꞌ caquiyac ukꞌij ri Dios? Ma xew xtzelej lo wa jun achi yey rire na aj tane Israel —xchaꞌ.

¹⁹ Xubiꞌij cꞌu che rachi: —Chatyactajok y chamaja bi abe. Ma ruma ri cubulibal acꞌuꞌx wucꞌ, xatcolobetaj che ri yabil —xchaꞌ.

²⁰ Ri fariseos xquitzꞌonoj che ri Jesús: —¿Jampalaꞌ cacꞌun rutakanic ri Dios che ruwachulew? —xechaꞌ. Y ri Jesús xucꞌul uwach: —Ri jekebal rutakanic ri Dios na jinta cꞌutubal re quilitajic.

²¹ Na jinta ne junok cubiꞌij: “¡Riꞌ cꞌo wara!” o “¡Leꞌ cꞌolic!” Ma tape alak: Rutakanic ri Dios cꞌo chi chixoꞌl alak —xcha chique.

²² Ecꞌuchiriꞌ ri Jesús xubiꞌij tanchi chique rutijoꞌn: «Copon cꞌu ri kꞌij echiriꞌ lic quiwaj quiwil tob ne xa juna kꞌij che rukꞌijol Ralaxel Chiquixoꞌl Ticawex echiriꞌ catakan che ruwachulew; pero na quiwil taj.

²³ Cuꞌana cꞌu riꞌ e cꞌo caquibiꞌij chiwe: “¡Riꞌ cꞌo wara!” o “¡Leꞌ cꞌolic!” Pero riꞌix mixꞌec, na quebiternabej ta nenareꞌ.

²⁴ Ma echiriꞌ cacꞌun Ralaxel Chiquixoꞌl Ticawex, conoje caquil rucꞌunibal jelaꞌ pachaꞌ cuꞌano echiriꞌ cayocꞌ caꞌn ruxeꞌ caj y ruwonibal waꞌ cuwonisaj ronoje.

²⁵ Pero lic cꞌu chirajawaxic nabe na cutij ri cꞌax y lic cacꞌak bi ukꞌij cuma ri winak re wakꞌij ora.

²⁶ »Ma jelaꞌ pachaꞌ ri xuꞌan chupa tak ri kꞌij re ri Noé, jelaꞌ cuꞌana pa rucꞌunibal Ralaxel Chiquixoꞌl Ticawex.

²⁷ Ma conoje ri winak caquitij quiwa, caquitij quiyaꞌ, quecꞌuliꞌic y quequiya ri calcꞌoꞌal pa cꞌulaniquil. Ecꞌu quetajin riꞌ che uꞌaniquil, echiriꞌ xopon rukꞌijol xoc bi ri Noé chupa ri nimalaj barco; cꞌa tecꞌuchiriꞌ xpe ri unimal jab y jelaꞌ xusach quiwach conoje.

²⁸ Jecꞌuriꞌlaꞌ xuꞌan ojertan chupa tak ri kꞌij re ri Lot: tak ri winak caquitij quiwa, caquitij quiyaꞌ, quelokꞌowic, quecꞌayinic, queticoꞌnajic y caquiyac cocho.

²⁹ Yey chupa cꞌu ri kꞌij echiriꞌ xel bi ri Lot chupa ri tinamit Sodoma, xpe lo akꞌ chicaj cajinow rucꞌ azufre y xecam conoje ri e cꞌo chupa ri tinamit.

³⁰ Jecꞌuriꞌlaꞌ cuꞌana pa rukꞌijol echiriꞌ cakꞌalajin uwach Ralaxel Chiquixoꞌl Ticawex, ma tak ri winak na cacoyꞌej ta rucꞌunibal.