Lucas 17:1-17 in San Blas Kuna

¹ Jesús na e-sapinganga sogded: “Gwage-ichoged-igargandi danikosurdeeye gwen soglesulid. Ar dule gwage-ichogedga-gueddi, nue-wilegoed.

² Ar dule we-mimmigan-anba-nanadimalad Bab-Dummadgi-isguega imakele, sabsur-odurdaklegoed. Akwamuu-dummad e-dukargi-nai demar-wilase melledoed, we-dule nue-dummad wilegoed, burgoed.

³ ”Degisoggu, be nue salakarmar. Ar be-gwenad begi nosale, ega be soge, nue be angi nos-itoleye. Ar be-gwenad nabir be-itosale, ar na gwagegi bukib binsasale, e-daed gwagsale, begi-nossuliyob be dakoed.

⁴ Ar be-gwenad ibagwen ilagugle (7) begi nosale, degi, ilagugle (7) bese gannar-gannar nonikile, bega sognonikile: ‘An-isgusadga an bukib binsaye, bar an deyob guosurye,’ begi nossuliyob be dakoed.”

⁵ Geb degi, Jesús-e-sapingan-bur-dummagan, Jesúsʼga sogdemar: —Dummad, gatik begi bensuli be anmar-imake.

⁶ Geb Dummad-Jesús sogded: —Ar bemar mostaza-e-gwagyob wis bipii be angi bensurmalale, sunna we-Sicómoro-sapiga be sogsamalaled: ‘Wegi be gwichid be unge, demarse be diglenae.’ We-sapi bemar-sogedba imaksaled.

⁷ Jesús sogdebar: “Ar bemar be-mai-wargwen bega napa-imuega be nikadibe, igi, moli akwegardibe, sapurba-arbadii danikid-sorba, ¿ega be sogdimala?: ‘Be doge, mas-gunnega mesese be sigdage.’

⁸ ¿Ar ega be sogdamarsursi? ‘Guakwaa be gudisae, masgunned be anga due, anga be mas dake. An-mas-gucha-sorba, an-gobsad-sorba, geb be mas gunmogoed, geb be gobmogoed.’

⁹ ”Ar degine, be-mai bega be-sogsadba ibmar-imaksadba, ¿dog-nuedye ega be sogdasi? Sulirgebed.

¹⁰ Ar amba bemar deyobmodo, ar bela bemarga Bab-Dummad-ibmar-sogsadba be ibmar imaksamalale, be sogmalodo: ‘Anmar mai-nued arbasurmaladye, ibmar-imakoye-anmarga-soglesadbi an imaksamaladdeeye.’ ”

¹¹ Jesús Jerusalénʼse nadapgu, Samaria, degi, Galilea, a-abargi nadap gusad.

¹² Jesús neggwebur-bipise dognadapgu, machergan-warambe (10) naibe-buna-yaa-maleged-nikmalad egi noarmalad, dikasur egi ambikunonimalad.

¹³ Amar binnasur goted, sogdemalad: —¡Odurdaked-saila-Jesús, wile be anmar-dake!

¹⁴ Jesús amar-dakdegu, amarga sogded: —Be namar, dule-irwa-Bab-Dummadse-gormaladga na be-san oyonamar, adi, amar bemarga sogmalagar bemar nugusmarye. Ar degi, dule-warambegwad (10) amba igarba dule-irwa-Bab-Dummadse-gormaladse nadapmargu, nugudmalad.

¹⁵ E-ambe-gued-wargwen, nugus-itoargu, binnasur Bab-Dummad-nug ogannodani Jesúsʼse gannar nonikid.

¹⁶ Dule-nugusad yokorgi-sindigar e-wagar-napase-ebulegedse dulluu Jesús-mali-naba signonikid, geb Jesúsʼga sogdebalid: —Dog-nued, be an-nudaksagu. Dakargu, we-dulede, Samariaʼginedid.

¹⁷ Jesús sogded: —¿Ar warambe (10) nugusmarsursi? Emide, ¿bia walabakebakaddi (9) nade?

¹ Jesús na e-sapinganga sogded: “Gwage-ichoged-igargandi danikosurdeeye gwen soglesulid. Ar dule gwage-ichogedga gueddi, adi nue wilegoed.

² Ar a-dule akwamu-dummad e-dukargi-nai demar-wilase metemalar, we-dule nue-dummad wilegoed, ar burgoed. Aba bur-bule, dule nue-dummad-wilegoed, dule-wargwen, we-mimmi-burwiganayobid, iskuega imaksar. Degisoggu, dule-ichoged-iduar, we-dulega bur-nuedirdo, akwamu-dummad dukargi-nai burgwed.

³ Degisoggu, na be nue salakarmar. “Ar be-gwenad begi nosale, ega be soge, nue be angi nos-itoleye. Ar be-gwenad nabir be-itosale, ar na gwagegi bukib binsasale, e-daed gwagsale, begi-nossuliyob be dakoed.

⁴ Ar be-gwenad ibagwen ilagugle begi nosale, degi, ilagugle bese gannar-gannar nonikile, bega sognonikile: ‘An-iskusadga an bukib binsaye, bar an deyob guosurye,’ begi nosasuliyob be dakoed.”

⁵ Geb degi Jesús-nuggi-barmilesmalad, Jesúsga sogdemar: —Dummad, gatik begi bensuli be anmar-imake.

⁶ Geb degi Dummad-Jesús sogded: “Bemar wismalad igi mostaza-e-gwag bur-bipigwa, ayob-dungu bemar angi bensulir, sunna we-Sicómoro-sapiga be sogsamalaled: ‘Wegi be gwichid be unge, demarse be diglenae.’ We-sapi bemar-sogedba imaksaled.”

⁷ Jesús sogdebar: “Ar bemar be-mai-wargwen be nika-dibe, bega napa imuega, igi, moli akwegar-dibe, sapurba-arbadii danikid-sorba, ¿ega be sogdimala?: ‘Be doge, mas-gunnega mesase be sigdage.’

⁸ ¿Ar ega bur be sogmarsursi?: ‘Guakwaa be gudi-sae, mas-gunned anga due, anga be mas dake, an mas guchar, degi, an gobsabalir, geb a-sorba be mas gunmogoed, geb be gobmogoed.’

⁹ “Ar degine, ¿dog-nuedye be-maiga be sogdasi, ar ibmar bega be-sogsadba imaksadba? An insagua, sur an insado.

¹⁰ Ar amba bemar deyobmodo, ar bela bemarga Bab-Dummad-ibmar-sogsadba be imaksamalale, be sogmalodo: ‘Anmar mai-nued arbasurmaladye, ar ibmar-imakoye anmarga-soglesadbi an imaksamaladdeye.’ ”

¹¹ Jesús Jerusalénse nadapgu, Samaria, degi, Galilea, a-abargi nadap-gusad.

¹² Jesús neggwebur-bipise dognadapgu, machergan-warambe naibe-buna-ya-maleged-nikmalad egi noarmalad, dikasur egi ambikunonimalad.

¹³ Amar binnasur gote, sogdemalad: —¡Jesús, odurdaked-saila, wile be anmar-dake!

¹⁴ Jesús amar-dakdegu, amarga sogded: —Be namar, dule-irwa-Bab-Dummadse-gormaladga na be-san oyonamar, adi amar bemarga sogmalagar bemar nugusmarye. Ar degi, dule-warambegwad amba igarba dule-irwa-Bab-Dummadse-gormaladse nadapmargu, nugudmalad.

¹⁵ E-ambe-gued-wargwen, na nugus itoargu, gannar Jesússe nonikid, binnasur Bab-Dummad-nug ogannodani.

¹⁶ Dule-nugusad yokorgi sindigar e-wagar-napagi-ise-megar Jesús-mali-naba signonikid, geb Jesúsga sogdebalid: —Dog-nued, be an-nudaksagu. We-dulede Samariaginedid.

¹⁷ Jesús sogded: —¿Ar warambe nugusmarsursi? Emide, ¿bia walabakebakad nade?