Lucas 15:1-23 in Achi

¹ Je qʼui aj tzʼonol alcawal, xak juban chic ajmaquib xe tejeb ruʼ i Jesus quiqui tabej re u tzij.

² Rumal-i, i aj Fariséo, xak i je tijonel re i ʼatbal tzij xe oc chu chʼachʼaxic i Jesus. —I achi-le que u cʼulaj ajmaquib ruʼ, y n-xui ta la ile, xak cu tij wa cuʼ —xe cha.

³ Are ʼuri i Jesus xu bij jun tijojbal tzij chique:

⁴ —Chixol yix, we ʼo jun achi je ʼo cien u chij, y we xsach jun chique, ¿wach cu ʼan ʼuri ire? Que u canaj can i novénta y nuéve pa i je ʼo wi, y ca ʼe chu tzucuxic i jun. Cu tzucuj cʼa cu rik na.

⁵ Are cu riko, ca quicotic cu ya bi xol u teleb, y cu cʼam bi ruʼ ja.

⁶ Are cupon ruʼ ja, que u siqʼuij i retaʼam qui wach, xak i je u loʼcʼanij, quiqui molbej quib ruʼ ire. Cu bij chique: “Lic quin quicotic, man xin rik in chij chi sachnak teʼek; ¡chix quicot yix wuʼ!” cu bij na chique.

⁷ Quin bij chiwe, xak queje quiqui ʼan i je aj chicaj ile; lic que quicotic we ʼo jun ajmac cu jalwachij u noʼoj chi n-ʼus taj. Mas que quicot rumal i jun-le, chiquiwach i je novénta y nuéve chi je ʼutz laj tak winak chi n-presis taj quiqui jalwachij i qui noʼoj —xu bij i Jesus chique.

⁸ (Teʼuri i Jesus xu bij chic jun tijojbal tzij chique.) Xu bij: —We ʼo jun ixok ʼo lajuj sak pwak ruʼ, we xu tzak jun chique i lajuj, ¿wach cu ʼan ʼuri ire? Cu tzij jun cantil, y cu jek u mesic u paja. Naʼal cu tzucuj cʼa cu rik na.

⁹ Are cu riko, que u siqʼuij i retaʼam qui wach, xak i je u loʼcʼanij, man quiqui molbej quib ruʼ. Cu bij chique: “Lic quin quicotic, man xin rik in mer chi in tzakom teʼek. ¡Chix quicot yix wuʼ!” cu bij chique.

¹⁰ I quicotemal-le, xak queje quiqui na i ángel re i Dios; que quicotic we ʼo jun ajmac cu jalwachij u noʼoj chi n-ʼus taj —xu bij i Jesus chique.

¹¹ Teʼuri, i Jesus xu bij chic chique: —ʼO jun achi, je ʼo queb u cʼojol.

¹² I chaʼaxel xu bij che u kajaw: “Ta, cha ʼana jun utzil chomal chwe; cha ya ni ubitak-we woʼor pacha a chʼobom ca ya na chwe coʼon panok.” Queje ile xu bij che. Teʼuri i u kajaw xu jach bi ubitak-que chique i queb u cʼojol.

¹³ Xoʼon chupan jubiʼ i chaʼaxel ʼis xu cʼayij ronojel ubitak-re chi xjach che. Teʼuri xu mol u chiʼ u mer y xa ʼe che jun tinimit cʼa naj. Chila xoc chu qʼuisic u mer, toʼ xak manal xu ʼano, y xu sach ronojel u mer.

¹⁴ Are xu qʼuis ronojel, xpe jun nim laj waʼjal che i tinimit-le pa ʼo wi ire; lic xu tij numic rumal.

¹⁵ Are ʼuri xa ʼe chu tzucuxic u chac ruʼ jun achi aj chila. I u chac xyaʼ che, xtak bi chi qui chajixic juban ak.

¹⁶ Ire lic xu tij numic; lic cu rayij u wach, wach que tijin i ak ruʼ; mi ta jun xtzukuwic.

¹⁷ Teʼuri xcʼun chic u noʼoj; xu bij pu cʼux: “Chila ruʼ in kajaw, i u mocom lic cu rik rib wach quiqui tijo. Y yin waral, lic quin cam na rumal numic.

¹⁸ Quin tzalij chic ruʼ in kajaw, y quin bij che: Ta, in ʼanom in mac chuwach i Dios, xak chawach yet.

¹⁹ N-ca majaw ta chic ca bij awacʼal chwe, xui-ri, cha ʼana na chwe pacha jun a mocom, quin bij che.” Queje ile xu bij pu cʼux.

²⁰ Juntir xu maj u be, y xa ʼe chic chi rachoch u kajaw. Are ya cuponic, xui-ri, cʼa naj panok ʼo wi che i ja, xak teʼet xa ʼiltajic y xa etamax u wach rumal u kajaw. Ire lic cʼax xu na u cʼojol, y xa ʼe paʼanem chu cʼulaxic. Are xu cʼulaj, xu tzʼulej, y xu tzʼubaj u palaj.

²¹ Teʼuri i u cʼojol xu bij che: “Ta, in ʼanom in mac chuwach i Dios, y xak chawach yet. N-ca majaw ta chic ca bij awacʼal chwe.” Queje ile xu bij che.

²² I u kajaw xa xu bij chique u mocom: “¡Chi bisoj! Chi cʼama li jumolaj ʼuʼ ʼutz, chom, y chi cojo chirij. Chi cʼama li bak re u wi u ʼab, xak i sapatux re i rakan.

²³ Je i cʼama i meʼ chi ka tiʼojersam, y chi ʼana-re. ¡Caka ʼan jun nimaʼij!

¹ Konoje raj tzꞌonol puaq re tojonik y taq raj makibꞌ keqibꞌ rukꞌ ri Jesús chaꞌ kakita ruchꞌaꞌtem.

² Pero ri fariseos y raj kꞌutunel re ri tzijpixabꞌ lik kakichꞌaꞌtibꞌej, jewaꞌ kakibꞌiꞌij: «Waꞌchi kebꞌukꞌul raj makibꞌ y kawaꞌ kukꞌ» kechaꞌ.

³ E uwariꞌche ri Jesús xutzijoj wa jun kꞌambꞌal naꞌoj chike, jewaꞌ xubꞌiꞌij:

⁴ «¿Saꞌ nawi kuꞌan junoq che alaq we e kꞌo jun ciento ubꞌexex yey kasach kꞌu junoq chike? ¿Na kebꞌukꞌol ta nebꞌa kan riꞌ ri noventa y nueve pa ri kiluwar y keꞌek kꞌu che utzukuxik ri jun xsach kanoq? Yey na kuxlan ta che utzukuxik kꞌa echiriꞌ kuꞌriqa loq.

⁵ Ekꞌuchiriꞌ kuriqo, lik kakiꞌkotik kuya lo chirij uqul.

⁶ Y echiriꞌ kopon chirocho, kumol kichiꞌ ri ramigos y ri ratz-uchaqꞌ, y jewaꞌ kubꞌiꞌij chike: “Chixkiꞌkota wukꞌ ma xinriq ri nubꞌexex sachinaq” kachaꞌ.

⁷ »Kambꞌiꞌij kꞌu riꞌin che alaq: Más ne kꞌo kiꞌkotemal chilaꞌ chikaj ruma juna aj mak kutzelej utzij chwach ri Dios, chikiwa noventa y nueve jusukꞌ e kꞌolik y na kajawax taj kakuytaj kimak.

⁸ »We e laꞌ juna ixoq kꞌo lajuj saqil puaq rukꞌ yey kutzaq kꞌu junoq, ¿saꞌ ri kuꞌano? Kutzij aqꞌ y naꞌl kumes rupa ja, kutzukuj kꞌu kokꞌil yey na kuxlan ta che utzukuxik kꞌa echiriꞌ kuꞌriqa loq.

⁹ Y ekꞌuchiriꞌ uriqom chik, kumol kichiꞌ ri ramigos y ri ratz-uchaqꞌ y kubꞌiꞌij kꞌu chike: “Chixkiꞌkota wukꞌ ma xinriq wa saqil puaq nutzaqom” kachaꞌ.

¹⁰ Kambꞌiꞌij kꞌu riꞌin che alaq: Jelaꞌ ri kiꞌkotemal ke ri ángeles chwach ri Dios echiriꞌ juna aj mak kutzelej utzij» xcha ri Jesús.

¹¹ Xutzijoj kꞌu wa jun kꞌambꞌal naꞌoj chike, jewaꞌ xubꞌiꞌij: «Kꞌo jun achi e kꞌo kaꞌibꞌ ukꞌajol.

¹² Jun qꞌij ri chaqꞌixel xubꞌiꞌij che ruqaw: “Tat, jacha la upa ri bꞌeyomalil la y asu yaꞌa la janipa ri taqal chwe riꞌin” xcha che ruqaw. Y ruqaw e xuꞌano. Xujach kꞌu rubꞌeyomalil, xuya ri taqal che rukꞌajol atzixel y ri taqal che ri chaqꞌixel.

¹³ »Kꞌamajaꞌ kꞌu naj ujachik upa, rala chaqꞌixel xukꞌayij ronoje ri xyaꞌ che, xumol bꞌi uchiꞌ ri puaq y xeꞌek naj chupa jun chik tinamit. Chilaꞌ kꞌu riꞌ xutzꞌilaꞌ ronoje rubꞌeyomalil, ma xuꞌan rukꞌ ri puaq ronoje ri xraj rire.

¹⁴ Ekꞌuchiriꞌ xukꞌis ronoje rurajil, xpe jun nimalaj numik chupa laꞌ la tinamit pa kꞌo wi. Y xujeq lik kutij kꞌax.

¹⁵ »Xeꞌek kꞌut che utzukuxik uchak rukꞌ jun achi aj chilaꞌ. Yey rachi xutaq bꞌi pa juyubꞌ che kichajixik ukꞌiyal aq.

¹⁶ Ekꞌu rala xujeq lik kanumik, kurayij uwach tobꞌ ne e ri kechaꞌ ri aq, pero na jinta junoq kayaꞌw re che.

¹⁷ »Tekꞌuchiriꞌ, xkꞌun runaꞌoj y chiribꞌil ribꞌ xuchꞌobꞌ raqan: “Chilaꞌ chirocho ri nuqaw lik kꞌo kakitij rukꞌiyal mokom; yey riꞌin wara kinkam che numik.

¹⁸ Ekꞌu woꞌora kintzelej chirocho ri nuqaw y jewaꞌ kambꞌiꞌij che: Tat, in makuninaq chwach ri Dios y chiwach rilal.

¹⁹ Na taqal ta chik kabꞌiꞌx chwe in kꞌajol la. ꞌAna la chwe pachaꞌ xa in chi jun mokom la” xcha chiribꞌil ribꞌ.

²⁰ Y ekꞌu xuꞌano. Xumaj bꞌi ubꞌe chirocho ruqaw. »Ekꞌu ruqaw, echiriꞌ xril pana rukꞌajol chinimanaj, lik xjuchꞌ kaꞌn pa ranimaꞌ. Lik kꞌu riꞌ kanik xeꞌek y xuꞌkꞌulu apanoq. Xulaqꞌapuj y xutzꞌubꞌ uchiꞌ.

²¹ »Y rala xubꞌiꞌij che ruqaw: “Nuqaw, in makuninaq chwach ri Dios y chiwach rilal. Na taqal ta chik kabꞌiꞌx chwe in kꞌajol la” xchaꞌ.

²² »Pero ruqaw xubꞌiꞌij chike ri raj chakibꞌ: “Jiꞌwesalaꞌ lo ri kꞌul más chom y chiwiqaꞌ. Chikojo juna mapaqꞌabꞌ che ruwi uqꞌabꞌ y uxajabꞌ che ri raqan.

²³ Yey jiꞌkꞌama lo ri meqꞌ lik tiꞌoꞌjirisam y chikamisaj. Qatija kꞌu riꞌ, chojkiꞌkotoq y qaꞌana nimaqꞌij,

¹ Conoje raj tzꞌonol puak re tojonic y tak raj maquib quekib rucꞌ ri Jesús chaꞌ caquita ruchꞌaꞌtem.

² Pero ri fariseos y raj cꞌutunel re ri tzijpixab lic caquichꞌaꞌtibej, jewaꞌ caquibiꞌij: «Waꞌchi quebucꞌul raj maquib y cawaꞌ cucꞌ» quechaꞌ.

³ E uwariꞌche ri Jesús xutzijoj wa jun cꞌambal naꞌoj chique, jewaꞌ xubiꞌij:

⁴ «¿Saꞌ nawi cuꞌan junok che alak we e cꞌo jun ciento ubexex yey casach cꞌu junok chique? ¿Na quebucꞌol ta neba can riꞌ ri noventa y nueve pa ri quiluwar y queꞌec cꞌu che utzucuxic ri jun xsach canok? Yey na cuxlan ta che utzucuxic cꞌa echiriꞌ cuꞌrika lok.

⁵ Ecꞌuchiriꞌ curiko, lic caquiꞌcotic cuya lo chirij ukul.

⁶ Y echiriꞌ copon chirocho, cumol quichiꞌ ri ramigos y ri ratz-uchakꞌ, y jewaꞌ cubiꞌij chique: “Chixquiꞌcota wucꞌ ma xinrik ri nubexex sachinak” cachaꞌ.

⁷ »Cambiꞌij cꞌu riꞌin che alak: Más ne cꞌo quiꞌcotemal chilaꞌ chicaj ruma juna aj mac cutzelej utzij chwach ri Dios, chiquiwa noventa y nueve jusucꞌ e cꞌolic y na cajawax taj cacuytaj quimac.

⁸ »We e laꞌ juna ixok cꞌo lajuj sakil puak rucꞌ yey cutzak cꞌu junok, ¿saꞌ ri cuꞌano? Cutzij akꞌ y naꞌl cumes rupa ja, cutzucuj cꞌu coqꞌuil yey na cuxlan ta che utzucuxic cꞌa echiriꞌ cuꞌrika lok.

⁹ Y ecꞌuchiriꞌ urikom chic, cumol quichiꞌ ri ramigos y ri ratz-uchakꞌ y cubiꞌij cꞌu chique: “Chixquiꞌcota wucꞌ ma xinrik wa sakil puak nutzakom” cachaꞌ.

¹⁰ Cambiꞌij cꞌu riꞌin che alak: Jelaꞌ ri quiꞌcotemal que ri ángeles chwach ri Dios echiriꞌ juna aj mac cutzelej utzij» xcha ri Jesús.

¹¹ Xutzijoj cꞌu wa jun cꞌambal naꞌoj chique, jewaꞌ xubiꞌij: «Cꞌo jun achi e cꞌo caꞌib ucꞌajol.

¹² Jun kꞌij ri chakꞌixel xubiꞌij che rukaw: “Tat, jacha la upa ri beyomalil la y asu yaꞌa la janipa ri takal chwe riꞌin” xcha che rukaw. Y rukaw e xuꞌano. Xujach cꞌu rubeyomalil, xuya ri takal che rucꞌajol atzixel y ri takal che ri chakꞌixel.

¹³ »Cꞌamajaꞌ cꞌu naj ujachic upa, rala chakꞌixel xucꞌayij ronoje ri xyaꞌ che, xumol bi uchiꞌ ri puak y xeꞌec naj chupa jun chic tinamit. Chilaꞌ cꞌu riꞌ xutzꞌilaꞌ ronoje rubeyomalil, ma xuꞌan rucꞌ ri puak ronoje ri xraj rire.

¹⁴ Ecꞌuchiriꞌ xuqꞌuis ronoje rurajil, xpe jun nimalaj numic chupa laꞌ la tinamit pa cꞌo wi. Y xujek lic cutij cꞌax.

¹⁵ »Xeꞌec cꞌut che utzucuxic uchac rucꞌ jun achi aj chilaꞌ. Yey rachi xutak bi pa juyub che quichajixic uqꞌuiyal ak.

¹⁶ Ecꞌu rala xujek lic canumic, curayij uwach tob ne e ri quechaꞌ ri ak, pero na jinta junok cayaꞌw re che.

¹⁷ »Tecꞌuchiriꞌ, xcꞌun runaꞌoj y chiribil rib xuchꞌob rakan: “Chilaꞌ chirocho ri nukaw lic cꞌo caquitij ruqꞌuiyal mocom; yey riꞌin wara quincam che numic.

¹⁸ Ecꞌu woꞌora quintzelej chirocho ri nukaw y jewaꞌ cambiꞌij che: Tat, in macuninak chwach ri Dios y chiwach rilal.

¹⁹ Na takal ta chic cabiꞌx chwe in cꞌajol la. ꞌAna la chwe pachaꞌ xa in chi jun mocom la” xcha chiribil rib.

²⁰ Y ecꞌu xuꞌano. Xumaj bi ube chirocho rukaw. »Ecꞌu rukaw, echiriꞌ xril pana rucꞌajol chinimanaj, lic xjuchꞌ caꞌn pa ranimaꞌ. Lic cꞌu riꞌ canic xeꞌec y xuꞌcꞌulu apanok. Xulakꞌapuj y xutzꞌub uchiꞌ.

²¹ »Y rala xubiꞌij che rukaw: “Nukaw, in macuninak chwach ri Dios y chiwach rilal. Na takal ta chic cabiꞌx chwe in cꞌajol la” xchaꞌ.

²² »Pero rukaw xubiꞌij chique ri raj chaquib: “Jiꞌwesalaꞌ lo ri cꞌul más chom y chiwikaꞌ. Chicojo juna mapakꞌab che ruwi ukꞌab y uxajab che ri rakan.

²³ Yey jiꞌcꞌama lo ri mekꞌ lic tiꞌoꞌjirisam y chicamisaj. Katija cꞌu riꞌ, chojquiꞌcotok y kaꞌana nimakꞌij,